ಇರಾನ್‌ ಸರಿಯಾಗಿ ವರ್ತಿಸದಿದ್ದರೆ ಆ ದೇಶವನ್ನು ಸಂಪೂರ್ಣವಾಗಿ ಸ್ಫೋಟಿಸಬೇಕೆ ಅಥವಾ ಆರ್ಥಿಕವಾಗಿ ಧ್ವಂಸಗೊಳಿಸಬೇಕೆ ಎಂಬುದೂ ಸೇರಿದಂತೆ ಮೂರು ಆಯ್ಕೆಗಳು ತಮ್ಮ ಮುಂದಿವೆ ಎಂದು ಅವರು ಹೇಳಿದ್ದಾರೆ.

ಫಾಕ್ಸ್‌ ನ್ಯೂಸ್‌ಗೆ ನೀಡಿದ ಸಂದರ್ಶನದಲ್ಲಿ ಮಾತನಾಡಿದ ಟ್ರಂಪ್‌, ಇರಾನ್‌ ಜೊತೆ ವ್ಯವಹರಿಸಲು ತಮ್ಮ ಮುಂದೆ ಮೂರು ಮಾರ್ಗಗಳಿವೆ ಎಂದಿದ್ದಾರೆ. ಇರಾನ್‌ ದೇಶವನ್ನು ಸಂಪೂರ್ಣವಾಗಿ ಅಳಿಸಿಹಾಕುವುದು, ಅದರ ಆರ್ಥಿಕತೆಯನ್ನು ಸಂಪೂರ್ಣವಾಗಿ ಕುಸಿಯಲು ಬಿಡುವುದು ಅಥವಾ ರಾಜತಾಂತ್ರಿಕ ಮಾತುಕತೆಯ ಮೂಲಕ ಒಪ್ಪಂದಕ್ಕೆ ಬರುವುದು ಈ ಮೂರು ಆಯ್ಕೆಗಳಾಗಿವೆ. ವಿಶ್ವಸಂಸ್ಥೆಯ ಸಾಮಾನ್ಯ ಸಭೆಯಲ್ಲಿ ಭಾಗವಹಿಸಲು ನ್ಯೂಯಾರ್ಕ್‌ಗೆ ಆಗಮಿಸಲಿರುವ ಇರಾನ್‌ ಅಧ್ಯಕ್ಷ ಮಸೌದ್‌ ಪೆಜೆಶ್ಕಿಯಾನ್‌ ಅವರೊಂದಿಗೆ ಮಾತುಕತೆ ನಡೆಸಲು ತಾವು ಬಹುಶಃ ಮುಕ್ತರಾಗಿದ್ದೇವೆ ಎಂದು ಟ್ರಂಪ್‌ ಹೇಳಿರುವುದು ರಾಜತಾಂತ್ರಿಕ ಕುತೂಹಲ ಮೂಡಿಸಿದೆ.

ಜುಲೈ 14ರಿಂದ ಇರಾನ್‌ ಬಂದರುಗಳ ಮೇಲೆ ಹೇರಲಾಗಿರುವ ನೌಕಾ ದಿಗ್ಬಂಧನವನ್ನು ಯುಎಸ್‌ ಮಿಲಿಟರಿ ತೀವ್ರಗೊಳಿಸಿದೆ. ನಿಯಮ ಪಾಲಿಸದ 109 ವಾಣಿಜ್ಯ ಸರಕು ಸಾಗಣೆ ಹಡಗುಗಳನ್ನು ಯುಎಸ್‌ ಸೆಂಟ್ರಲ್‌ ಕಮಾಂಡ್‌ ಪಡೆಗಳು ಹಾರ್ಮುಜ್‌ ಜಲಸಂಧಿಯ ಬಳಿ ಮಾರ್ಗ ಬದಲಿಸಿ ಮರುನಿರ್ದೇಶಿಸಿವೆ ಎಂದು ವರದಿಯಾಗಿದೆ.

ಸಂಘರ್ಷದ ಪರಿಣಾಮವಾಗಿ ವಿಶ್ವದ ಪ್ರಮುಖ ಇಂಧನ ಸಾಗಣೆ ಮಾರ್ಗವಾದ ಹಾರ್ಮುಜ್‌ ಜಲಸಂಧಿಯಲ್ಲಿ ಹಡಗು ಸಂಚಾರ ಗಣನೀಯವಾಗಿ ಕುಸಿದಿದೆ. ರಾಯಿಟರ್ಸ್‌ ವರದಿ ಪ್ರಕಾರ, ಸೆಪ್ಟೆಂಬರ್‌ 17ರಂದು ಕೇವಲ 4 ಸರಕು ಹಡಗುಗಳು ಜಲಸಂಧಿಯ ಮೂಲಕ ಸಂಚರಿಸಿದ್ದವು. ಇತ್ತೀಚಿನ ವರದಿಗಳ ಪ್ರಕಾರ, ವಾರಾಂತ್ಯದಲ್ಲಿ ಕೇವಲ 17 ಸರಕು ಹಡಗುಗಳು ಜಲಸಂಧಿಯನ್ನು ದಾಟಿದ್ದು, ಹಿಂದಿನ ವಾರದ 37ಕ್ಕೆ ಹೋಲಿಸಿದರೆ ಸಂಚಾರ ಮತ್ತಷ್ಟು ಕುಸಿದಿದೆ.

ಸೆಪ್ಟೆಂಬರ್‌ ಕೊನೆಯ ವಾರದಲ್ಲಿ ವಿಶ್ವಸಂಸ್ಥೆಯ ಸಾಮಾನ್ಯ ಸಭೆ ನಡೆಯಲಿದ್ದು, ಜಗತ್ತಿನ ಕಣ್ಣು ಈಗ ನ್ಯೂಯಾರ್ಕ್‌ ಮೇಲೆ ನೆಟ್ಟಿದೆ. ಒಂದೆಡೆ ಕದನದ ಬೆದರಿಕೆ, ಇನ್ನೊಂದೆಡೆ ಮುಖಾಮುಖಿ ಸಭೆಯ ಸಾಧ್ಯತೆಗಳಿರುವುದು ಉಭಯ ದೇಶಗಳ ನಡುವಿನ ತೀವ್ರ ರಾಜತಾಂತ್ರಿಕ ಹಗ್ಗಜಗ್ಗಾಟವನ್ನು ತೋರಿಸುತ್ತದೆ.

ವಿಶ್ವದ ತೈಲ ಸಾಗಣೆಯಲ್ಲಿ ಹಾರ್ಮುಜ್‌ ಜಲಸಂಧಿಯು ಪ್ರಮುಖ ಮಾರ್ಗವಾಗಿದ್ದು, ಅಲ್ಲಿನ ಸಂಚಾರಕ್ಕೆ ಉಂಟಾಗಿರುವ ಅಡಚಣೆ ಜಾಗತಿಕ ಇಂಧನ ಮಾರುಕಟ್ಟೆಯ ಮೇಲೆ ಪರಿಣಾಮ ಬೀರುವ ಸಾಧ್ಯತೆಯನ್ನು ಹೆಚ್ಚಿಸಿದೆ. ಇರಾನ್‌ ಈಗಾಗಲೇ ಅಮೆರಿಕದ ಯುದ್ಧನೌಕೆಗಳನ್ನು ಗುರಿಯಾಗಿಸಬಲ್ಲ ಮಲ್ಟಿ-ವಾರ್‌ಹೆಡ್‌ ಕ್ಷಿಪಣಿಗಳನ್ನು ಸನ್ನದ್ಧವಾಗಿರಿಸಿದ್ದು, ಅಮೆರಿಕ ತನ್ನ ಯುಎಸ್‌ಎಸ್‌ ಜಾನ್‌ ಪಾಲ್‌ ಜೋನ್ಸ್‌ ಸೇರಿದಂತೆ ಬಲಿಷ್ಠ ಯುದ್ಧನೌಕೆಗಳನ್ನು ಗಲ್ಫ್‌ ಕರಾವಳಿಯಲ್ಲಿ ಜಮಾವಣೆ ಮಾಡಿದೆ.

ವಾಷಿಂಗ್ಟನ್‌, ಸೆ. 21- ಯುದ್ಧ ನಿಲ್ಲಿಸಲು ಕತಾರ್‌ ಮೂಲಕ ಇರಾನ್‌ ವಿಧಿಸಿರುವ 7 ಷರತ್ತುಗಳಿಗೆ ಅಮೆರಿಕ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ಆಕ್ರಮಣಕಾರಿ ಪ್ರತಿಕ್ರಿಯೆ ನೀಡಿದ್ದಾರೆ.ತಾವು ಇರಾನ್‌ ವಿಚಾರದಲ್ಲಿ ಅಂತಿಮ ನಿರ್ಧಾರ ತೆಗೆದುಕೊಳ್ಳುವ ಮನಃಸ್ಥಿತಿಯಲ್ಲಿದ್ದೇವೆ ಎಂದು ಹೇಳಿರುವ ಟ್ರಂಪ್‌, ಮುಂಬರುವ ದಿನಗಳಲ್ಲಿ ಬಹಳ ದೊಡ್ಡ ವಿಷಯಗಳು ಸಂಭವಿಸಲಿವೆ ಎಂದು ಮುನ್ಸೂಚನೆ ನೀಡಿದ್ದಾರೆ.