Share With Friends
ಭಾರತದ ಮೊದಲ ಖಾಸಗಿ ವೈದ್ಯಕೀಯ ಸಂಗ್ರಹಾಲಯವಾದ ಮ್ಯೂಸಿಯಂ ಆಫ್ ಮೆಡಿಕಲ್ ಆರ್ಕೈವ್ಸ್ (Museum of Medical Archives) ಅನ್ನು 2026ರ ಮೇ 25ರಂದು ಕೇರಳದ Thiruvananthapuramನ ಉಲ್ಲೂರಿನಲ್ಲಿ ಉದ್ಘಾಟಿಸಲಾಯಿತು. ಇದು ಕೇರಳದ ಮೊದಲ ಖಾಸಗಿ ವೈದ್ಯಕೀಯ ಸಂಗ್ರಹಾಲಯವಾಗಿದ್ದು, ವೈದ್ಯಕೀಯ ಶಿಕ್ಷಣ ಮತ್ತು ವೈದ್ಯಕೀಯ ಇತಿಹಾಸಕ್ಕೆ ಸಂಬಂಧಿಸಿದ ಅಪರೂಪದ ಸಂಗ್ರಹಗಳನ್ನು ಒಳಗೊಂಡಿದೆ.
ಸಂಗ್ರಹಾಲಯದ ರೂವಾರಿ ಮತ್ತು ವಿಶೇಷತೆ
ಈ ಐತಿಹಾಸಿಕ ಸಂಗ್ರಹಾಲಯವನ್ನು ತಿರುವನಂತಪುರಂನ ಸರ್ಕಾರಿ ವೈದ್ಯಕೀಯ ಕಾಲೇಜಿನ ಮಾಜಿ ಕಲಾವಿದ-ಮಾಡೆಲರ್ (Artist-Modeler) ಆಗಿದ್ದ ಎ. ಶಿವರಾಮನ್ (A. Sivaraman) ಅವರು ಸ್ಥಾಪಿಸಿದ್ದಾರೆ. ಶಿವರಾಮನ್ ಅವರು ತಮ್ಮ ಹಲವು ದಶಕಗಳ ವೃತ್ತಿಜೀವನದಲ್ಲಿ ವೈದ್ಯಕೀಯ ಶಿಕ್ಷಣಕ್ಕಾಗಿ ಸ್ವತಃ ಕೈಯಾರೆ ಸಿದ್ಧಪಡಿಸಿದ ನೂರಾರು ಬೋಧನಾ ಸಾಮಗ್ರಿಗಳು ಮತ್ತು ವೈಜ್ಞಾನಿಕ ಮಾದರಿಗಳನ್ನು ಇಲ್ಲಿ ಪ್ರದರ್ಶನಕ್ಕಿಡಲಾಗಿದೆ.
| ವೈದ್ಯಕೀಯ ಸಂಗ್ರಹಾಲಯ ಎಂದರೇನು..? |
|---|
| ವೈದ್ಯಕೀಯ ಸಂಗ್ರಹಾಲಯಗಳು ವೈದ್ಯಕೀಯ ಶಿಕ್ಷಣಕ್ಕೆ ಸಂಬಂಧಿಸಿದ ಮಾದರಿಗಳು, ಶರೀರ ರಚನಾ ಮಾದರಿಗಳು (Anatomical Specimens), ಚಾರ್ಟ್ಗಳು, ದಾಖಲೆಗಳು ಮತ್ತು ಇತಿಹಾಸದ ವಸ್ತುಗಳನ್ನು ಸಂರಕ್ಷಿಸುವ ಕೇಂದ್ರಗಳಾಗಿವೆ. ಇವುಗಳನ್ನು ಮುಖ್ಯವಾಗಿ ಅನಾಟಮಿ, ಎಂಬ್ರಿಯಾಲಜಿ, ಪ್ಯಾಥಾಲಜಿ, ಮೈಕ್ರೋಬಯಾಲಜಿ ಹಾಗೂ ವೈದ್ಯಕೀಯ ಇತಿಹಾಸದ ಅಧ್ಯಯನಕ್ಕಾಗಿ ಬಳಸಲಾಗುತ್ತದೆ. |
ಸಂಗ್ರಹಾಲಯದಲ್ಲಿ ಏನಿದೆ..?
ಸಂಗ್ರಹಾಲಯದಲ್ಲಿರುವ ಪ್ರದರ್ಶನಗಳಲ್ಲಿ ಕೈಯಿಂದ ನಿರ್ಮಿಸಲಾದ ಶರೀರ ರಚನಾ ಮಾದರಿಗಳು, ಭ್ರೂಣಶಾಸ್ತ್ರ (Embryology) ಪ್ರದರ್ಶನಗಳು, ವೈದ್ಯಕೀಯ ಚಿತ್ರಕಲೆಗಳು, ಮೈಕ್ರೋಬಯಾಲಜಿ ದಾಖಲೆಗಳು ಮತ್ತು ಐತಿಹಾಸಿಕ ಛಾಯಾಚಿತ್ರಗಳು ಇರಲಿವೆ.
ಇವುಗಳ ಜೊತೆಗೆ ಭ್ರೂಣದ ರಕ್ತಸಂಚಾರ (Fetal Circulation), ಭ್ರೂಣದ ಬೆಳವಣಿಗೆ, ಕೋಶ ವಿಭಜನೆಯ ಹಂತಗಳು (Mitosis), ಹಲ್ಲಿನ ರಚನೆ, ಸಂತಾನೋತ್ಪತ್ತಿ ಅಂಗಗಳ ವಿನ್ಯಾಸ, ಹೃದಯದ ಬೆಳವಣಿಗೆ ಹಾಗೂ ರಕ್ತನಾಳಗಳ ರಚನೆಗಳ ಕುರಿತು ವಿವರವಾದ ಮಾದರಿಗಳನ್ನು ಪ್ರದರ್ಶಿಸಲಾಗಿದೆ.
ಮೂರು ಆಯಾಮಗಳಲ್ಲಿ (3D) ಮಾನವ ದೇಹದ ರಚನೆಯನ್ನು ಅರ್ಥಮಾಡಿಕೊಳ್ಳಲು ವೈದ್ಯಕೀಯ ಮಾದರಿಗಳು ಪ್ರಮುಖ ಪಾತ್ರ ವಹಿಸುತ್ತವೆ. ಅನಾಟಮಿ, ಎಂಬ್ರಿಯಾಲಜಿ, ಮಾನವ ಬೆಳವಣಿಗೆ, ಅಂಗಾಂಗ ವ್ಯವಸ್ಥೆಗಳು ಮತ್ತು ಮೂಲಭೂತ ಹಿಸ್ಟಾಲಜಿ ಬೋಧನೆಯಲ್ಲಿ ಇಂತಹ ಮಾದರಿಗಳು ವಿದ್ಯಾರ್ಥಿಗಳಿಗೆ ಪರಿಣಾಮಕಾರಿ ಕಲಿಕಾ ಸಾಧನಗಳಾಗಿವೆ.
ಕೇರಳದ ವೈದ್ಯಕೀಯ ವಿಜ್ಞಾನದ ಪರಂಪರೆ ಮತ್ತು ಶಿಕ್ಷಣದ ಬೆಳವಣಿಗೆಯನ್ನು ಮುಂದಿನ ಪೀಳಿಗೆಗೆ ಪರಿಚಯಿಸುವಲ್ಲಿ ಈ ಸಂಗ್ರಹಾಲಯವು ಪ್ರಮುಖ ಕೇಂದ್ರವಾಗಿ ಕಾರ್ಯನಿರ್ವಹಿಸಲಿದೆ.