ದೇವರ ಕೋಣೆಯೆನ್ನುವುದು ಕೇವಲ ಧಾರ್ಮಿಕ ಆಚರಣೆಯನ್ನು ಮಾಡುವ ಸ್ಥಳವಲ್ಲ. ಅದೊಂದು ಮನಸ್ಸು ಮತ್ತು ಶಕ್ತಿಯನ್ನು ಶುದ್ಧೀಕರಿಸುವ ಸ್ಥಳವಾಗಿದೆ. ಈ ಪವಿತ್ರವಾದ ಸ್ಥಳವಾದ ದೇವರ ಕೋಣೆಯನ್ನು ಪ್ರವೇಶಿಸುವ ಮುನ್ನ ಕೆಲವೊಂದು ನಿಯಮಗಳನ್ನು ನಾವು ಗಮನದಲ್ಲಿಟ್ಟುಕೊಳ್ಳಬೇಕು.
ದೇವರ ಕೋಣೆಯನ್ನು ಪ್ರವೇಶಿಸುವುದಕ್ಕೂ ಮುನ್ನ ನಾವು ಏನು ಮಾಡಬೇಕು.? ದೇವರ ಕೋಣೆಯನ್ನು ಪ್ರವೇಶಿಸುವುದು ಹೇಗೆ ನೋಡಿ.
ಮನೆಯಲ್ಲಿರುವ ದೇವರ ಕೋಣೆಯು ನಾವು ಪ್ರತಿನಿತ್ಯ ದೇವರನ್ನು ಪೂಜಿಸುವ ಮತ್ತು ಮಾನಸಿಕ ಶಾಂತಿಯನ್ನು ಪಡೆದುಕೊಳ್ಳುವ ಸ್ಥಳವಾಗಿದೆ. ದೇವರ ಕೋಣೆಯನ್ನು ಪ್ರವೇಶಿಸುವುದಕ್ಕೂ ಮುನ್ನ ಕೆಲವೊಂದು ನಿಯಮಗಳನ್ನು, ಕೆಲಸವನ್ನು ಮಾಡುವ ಮೂಲಕ ನಾವು ಆ ಸ್ಥಳದಲ್ಲಿನ ದೈವಿಕ ಶಕ್ತಿಯೊಂದಿಗೆ ಸಂಪರ್ಕವನ್ನು ಸಾಧಿಸಲು ಸಹಾಯವಾಗುವುದು. ಈ ಅಭ್ಯಾಸಗಳು ದೇವರ ಕೋಣೆಯನ್ನು ಶುದ್ಧವಾಗಿಡುವುದಲ್ಲದೆ ನಮ್ಮ ಮನಸ್ಸಿಗೆ ಶಾಂತಿಯನ್ನು ತರುತ್ತವೆ. ಮನೆಯ ದೇವರ ಕೋಣೆಯನ್ನು ಪ್ರವೇಶಿಸುವ ಮೊದಲು ಕೆಲವು ಅಭ್ಯಾಸಗಳನ್ನು ಅಳವಡಿಸಿಕೊಳ್ಳುವುದು ಅತ್ಯಗತ್ಯ. ಪ್ರತಿನಿತ್ಯ ನಾವು ದೇವರ ಕೋಣೆಯನ್ನು ಪ್ರವೇಶಿಸುವ ಮುನ್ನ ಯಾವ ಕೆಲಸ ಮಾಡಬೇಕು ಎಂಬುದನ್ನು ನಾವಿಲ್ಲಿ ತಿಳಿದುಕೊಳ್ಳೋಣ.ಪಾದರಕ್ಷೆಗಳನ್ನು ತೆಗೆದುಹಾಕಿ
ದೇವಸ್ಥಾನವನ್ನಾಗಿರಬಹುದು ಅಥವಾ ಮನೆಯಲ್ಲಿರುವ ದೇವರ ಕೋಣೆಯನ್ನಾಗಿರಬಹುದು ಪ್ರವೇಶಿಸುವ ಮುನ್ನ ಪಾದರಕ್ಷೆಗಳನ್ನು ತೆಗೆದುಹಾಕುವುದು ತುಂಬಾನೇ ಒಳ್ಳೆಯದು. ದೇವರ ಕೋಣೆಗೆ ಹೋಗುವ ಮುನ್ನ ಪಾದರಕ್ಷೆಗಳನ್ನು ತೆಗೆದು ಹಾಕಿ, ಕಾಲಿನಲ್ಲಿರುವ ಧೂಳು ಮತ್ತು ಕೊಳೆಯನ್ನು ತೆಗೆದುಹಾಕಿ. ಪಾದರಕ್ಷೆಯನ್ನು ಧರಿಸಿ ದೇವಸ್ಥಾನವನ್ನು ಪ್ರವೇಶಿಸುವುದರಿಂದ ಅದು ದೇವಸ್ಥಾನದ ಪಾವಿತ್ರತೆಯನ್ನು ಹಾಳು ಮಾಡುತ್ತದೆ. ಬರಿಗಾಲಿನಲ್ಲಿ ನಡೆಯುವುದರಿಂದ ನಿಮಗೆ ಹೆಚ್ಚು ಸೂಕ್ಷ್ಮತೆಯ ಭಾವನೆ ಉಂಟಾಗುತ್ತದೆ ಮತ್ತು ಸ್ಥಳದ ಪಾವಿತ್ರ್ಯಕ್ಕೆ ಗೌರವವೂ ಆಗುತ್ತದೆ.PC; unsplash
ಇವುಗಳ ಬಗ್ಗೆ ಗಮನವಿರಲಿ
ದೇವರ ಕೋಣೆಯನ್ನಾಗಲಿ ಅಥವಾ ದೇವಸ್ಥಾನವನ್ನಾಗಲಿ ಪ್ರವೇಶಿಸುವ ಮುನ್ನ ನೀವು ನಿಮ್ಮ ಫೋನ್‌ನ್ನು ಆಫ್‌ ಮಾಡಬೇಕು. ಅತಿಯಾದ ಗೊಂದಲವನ್ನು ತಪ್ಪಿಸಬೇಕು. ಯಾವಾಗಲೂ ದೇವರ ಪ್ರಾರ್ಥನೆಗೆ ಮತ್ತು ಪೂಜೆಗೆ ಶಾಂತವಾದ ವಾತಾವರಣದ ಅಗತ್ಯವಿರುತ್ತದೆ. ದೇವರ ಪೂಜೆಯನ್ನು ಮಾಡುವ ಸ್ಥಳದ ಶುದ್ಧತೆಯನ್ನು ಗಮನಿಸಿ. ಆ ಸ್ಥಳದಲ್ಲಿ ಹಳೆಯ ಹೂವುಗಳು, ಧೂಳುಗಳಿದ್ದರೆ ಅದನ್ನು ತೆಗೆದುಹಾಕಿ. PC: unsplash
ಮನಸ್ಸನ್ನು ಶಾಂತಗೊಳಿಸಿ
ದೇವರ ಪೂಜೆಯನ್ನು ಮಾಡುವುದಕ್ಕೆ ಶಾಂತವಾದ ಹಾಗೂ ಶುದ್ಧವಾದ ಮನಸ್ಸು ತುಂಬಾನೇ ಮುಖ್ಯವಾಗಿರುತ್ತದೆ. ಹಾಗಾಗಿ, ದೇವರ ಕೋಣೆಯನ್ನು ನಾವು ಪ್ರವೇಶಿಸುವುದಕ್ಕೂ ಮುನ್ನ ಒಂದು ಕ್ಷಣ ಸ್ವಚ್ಛವಾದ ಸ್ಥಳದಲ್ಲಿ ಕುಳಿತು ವಿರಾಮ ತೆಗೆದುಕೊಳ್ಳಿ. ನಂತರ ಒಂದಿಷ್ಟು ಸಮಯ ಆಳವಾದ ಉಸಿರನ್ನು ತೆಗೆದುಕೊಳ್ಳಿ. ಈ ಉಸಿರ ಮೂಲಕ ನೀವು ನಿಮ್ಮ ಒತ್ತಡವನ್ನು ಮನಸ್ಸಿನಿಂದ ಹೊರಹಾಕಲು ಪ್ರಯತ್ನಿಸಿ. ಶಾಂತವಾದ ಮನಸ್ಸಿನಿಂದ ದೇವರ ಕೋಣೆಯನ್ನು ಪ್ರವೇಶಿಸಿ, ಪೂಜೆಯನ್ನು ಮಾಡಿ. PC: pexel
ಸ್ವಚ್ಛವಾದ ಬಟ್ಟೆಯನ್ನು ಧರಿಸಿ
ದೇವರ ಕೋಣೆಯನ್ನು ಪ್ರವೇಶಿಸುವ ಮುನ್ನ ಅಥವಾ ದೇವರ ಪೂಜೆಯನ್ನು ಮಾಡುವ ಸಮಯದಲ್ಲಿ ಯಾವಾಗಲೂ ನಾವು ಶುದ್ಧವಾದ ಹಾಗೂ ಸರಳವಾದ ಬಟ್ಟೆಯನ್ನು ಮಾತ್ರ ಧರಿಸಬೇಕು. ವಿಶೇಷವಾದ ಅಥವಾ ಹೊಸ ಬಟ್ಟೆಯನ್ನು ಧರಿಸಬೇಕೆನ್ನುವ ನಿಯಮವಿಲ್ಲ. ನೀವು ಅಚ್ಚುಕಟ್ಟಾದ ರೀತಿಯಲ್ಲಿ ಬಟ್ಟೆಯನ್ನು ಧರಿಸಿದರೆ ಅದೇ ನಿಮ್ಮನ್ನು ಸಾಂಪ್ರದಾಯಿಕ ರೂಪದಲ್ಲಿ ಪ್ರಸ್ತುತಪಡಿಸುತ್ತದೆ.
CP: unsplash
ಕೈ ಕಾಲು ತೊಳೆಯುವುದು
ನಾವು ಮನೆಯ ದೇವರ ಕೋಣೆಯನ್ನು ಪ್ರವೇಶಿಸುವ ಮುನ್ನ ಕಡ್ಡಾಯವಾಗಿ ನಮ್ಮ ಕೈಕಾಲುಗಳನ್ನು ತೊಳೆದುಕೊಳ್ಳಬೇಕು. ಸ್ವಚ್ಛವಾದ ಕೈಕಾಲುಗಳು ದೇವರಿಗೆ ಗೌರವವನ್ನು ಸೂಚಿಸುವಂತಹ ಒಂದು ವಿಧಾನವಾದರೆ, ನಮ್ಮನ್ನು ಪೂಜೆಗೆ ಸಿದ್ಧಗೊಳಿಸುವ ಇನ್ನೊಂದು ವಿಧಾನವೂ ಆಗಿದೆ. ಒಂದು ವೇಳೆ ನಿಮಗೆ ಆ ಕ್ಷಣದಲ್ಲಿ ಕೈಕಾಲುಗಳನ್ನು ತೊಳೆಯಲು ನೀರು ಲಭ್ಯವಿಲ್ಲದೇ ಇದ್ದರೆ ಅಂತಹ ಸಂದರ್ಭದಲ್ಲಿ ನಿಮ್ಮ ಕೈ ಮತ್ತು ಕಾಲುಗಳನ್ನು ಸ್ವಚ್ಛವಾದ ಬಟ್ಟೆಯಿಂದ ಒರೆಸಿಕೊಳ್ಳಬಹುದು. PC: unsplash
ಮೊದಲು ಈ ಕೆಲಸ ಮಾಡಿ
ದೇವರ ಕೋಣೆಯನ್ನು ನಾವು ಆತುರಾತುರದಿಂದ ಪ್ರವೇಶಿಸಬಾರದು. ನಿಧಾನವಾಗಿ ದೇವರ ಕೋಣೆಯನ್ನು ಪ್ರವೇಶಿಸುವುದು ಒಳ್ಳೆಯದು. ದೇವರ ಕೋಣೆಯನ್ನು ಪ್ರವೇಶಿಸುವಂತಹ ಸಂದರ್ಭದಲ್ಲಿ ಆಗಿರಬಹುದು, ದೇವರ ಪೂಜೆಯನ್ನು ಮಾಡುವಂತಹ ಸಂದರ್ಭದಲ್ಲಿ ಜೋರಾಗಿ ಮಾತನಾಡಬಾರದು. ಶಾಂತವಾದ ಮನಸ್ಸಿನಿಂದ, ಸದ್ದಿಲ್ಲದೆ ನಾವು ದೇವರ ಕೋಣೆಯನ್ನು ಪ್ರವೇಶಿಸಬೇಕು. ಪ್ರವೇಶಿಸಿದ ನಂತರ ಮೊದಲು ದೀಪವನ್ನು ಹಚ್ಚಬೇಕು. PC:unsplash