ಬೆಂಗಳೂರು, ಏ.8: ಪರಮ್ ಫೌಂಡೇಶನ್ ವತಿಯಿಂದ (Param Foundation) ಇದೇ ಏಪ್ರಿಲ್ 20ರಿಂದ ಮೇ 8ರವರೆಗೆ ಬೆಂಗಳೂರಿನ ಜಯನಗರದಲ್ಲಿರುವ ParSEC ಗ್ಯಾಲರಿಯಲ್ಲಿ 11ರಿಂದ 16 ವರ್ಷದೊಳಗಿನ ಮಕ್ಕಳಿಗಾಗಿ ವಿನೂತನ ಬೇಸಿಗೆ ಶಿಬಿರ ಏರ್ಪಡಿಸಲಾಗಿದೆ. ಶಿಬಿರದಲ್ಲಿ ಕೇವಲ ತಾಂತ್ರಿಕ ಕಲಿಕೆಯಲ್ಲದೆ, ಹಳೆಯ ನೀತಿ ಕಥೆಗಳಿಗೆ ಆಧುನಿಕ ಸಮಾಜದ ಸವಾಲುಗಳನ್ನು ಬೆರೆಸಿ ಕಿರುಚಿತ್ರ ತಯಾರಿಸುವ ವಿನೂತನ 'ಸ್ಟಾಪ್ ಮೋಷನ್ ಅನಿಮೇಷನ್' ಶಿಬಿರ ಆಯೋಜಿಸಲಾಗಿದೆ.
ಶಿಬಿರದ ಪ್ರಮುಖ ಆಕರ್ಷಣೆಯೆಂದರೆ ಚಿತ್ರರಂಗ ಹಾಗೂ ಕಲಾ ಲೋಕದ ಖ್ಯಾತರಾದ ರಘು ದೀಕ್ಷಿತ್ (ಸಂಗೀತ), ಎಂ.ಡಿ. ಪಲ್ಲವಿ ಮತ್ತು ಶ್ವೇತಾ (ಧ್ವನಿ ಸಂಯೋಜನೆ), ಕಾರ್ತಿಕ್ ಸರಗೂರು (ದೃಶ್ಯಕಾವ್ಯ) ಹಾಗೂ ಸಿದ್ಧಾರ್ಥ್ ಭರತ್ (ವಿಜ್ಞಾನ) ಅವರು ವಿದ್ಯಾರ್ಥಿಗಳ ಜತೆ ನೇರವಾಗಿ ಸಂವಾದ ನಡೆಸಿ ಮಾರ್ಗದರ್ಶನ ನೀಡುವುದು.
ಯಾವ್ಯಾವ ಸೆಲೆಬ್ರಿಟಿಯಿಂದ ಏನು ಕಲಿಕೆ?
- ರಘು ದೀಕ್ಷಿತ್: ತಮ್ಮ ವಿಶಿಷ್ಟ ಸಂಗೀತದ ಮೂಲಕ ಸಿನೆಮಾದಲ್ಲಿ ಭಾವನೆಗಳನ್ನು (Sound & Mood) ತುಂಬುವ ಕಲೆ ಕಲಿಸಲಿದ್ದಾರೆ.
- ಎಂ.ಡಿ. ಪಲ್ಲವಿ ಮತ್ತು ಶ್ವೇತಾ: ಕಥೆಯ ಪಾತ್ರಗಳಿಗೆ ಪ್ರಾಣ ತುಂಬುವ ಧ್ವನಿ ಸಂಯೋಜನೆ (Voice & Performance) ಕುರಿತು ತರಬೇತಿ ನೀಡಲಿದ್ದಾರೆ.
- ಕಾರ್ತಿಕ್ ಸರಗೂರು: ದೃಶ್ಯಕಾವ್ಯವನ್ನು ಕಟ್ಟಿಕೊಡುವ ಪರಿ ಹಾಗೂ ಇತಿಹಾಸದ ಮಹತ್ವವನ್ನು (Visual Storytelling) ವಿವರಿಸಲಿದ್ದಾರೆ.
- ಸಿದ್ಧಾರ್ಥ್ ಭರತ್: ಅನಿಮೇಷನ್ನಲ್ಲಿ ವಿಜ್ಞಾನದ ಆವಿಷ್ಕಾರಗಳನ್ನು (Science in Art) ಹೇಗೆ ಅಳವಡಿಸಬಹುದು ಎಂಬ ವಿಭಿನ್ನ ನೋಟ ನೀಡಲಿದ್ದಾರೆ.
- ರಾಬಿನ್ ಸ್ಟ್ಯಾಪ್ಲಿ: ಅಮೆರಿಕದ ರಾಷ್ಟ್ರೀಯ ಅನಿಮೇಷನ್ ವಸ್ತುಸಂಗ್ರಹಾಲಯದ ರಾಬಿನ್ ಸ್ಟ್ಯಾಪ್ಲಿ ಅವರು ಕೂಡ ಈ ಶಿಬಿರದಲ್ಲಿ ಭಾಗಿಯಾಗಲಿದ್ದಾರೆ.
ಮೂರು ವಾರಗಳ ರೋಚಕ ಸಿನೆಮಾ ಪಯಣ
ವಾರ 1 (ಫೌಂಡೇಶನ್): ಈ ಹಂತವು ಅನಿಮೇಷನ್ ಕ್ಷೇತ್ರಕ್ಕೆ ಪದಾರ್ಪಣೆ ಮಾಡಲು ಭದ್ರ ಬುನಾದಿಯನ್ನು ಹಾಕಿಕೊಡಲಿದೆ. ಇಲ್ಲಿ ವಿದ್ಯಾರ್ಥಿಗಳು ಸ್ಟಾಪ್ ಮೋಷನ್ ಅನಿಮೇಷನ್ನ ಮೂಲಭೂತ ತತ್ವಗಳನ್ನು ಅತ್ಯಂತ ಆಳವಾಗಿ ಕಲಿಯಲಿದ್ದಾರೆ. ಕೇವಲ ಡಿಜಿಟಲ್ ಜಗತ್ತಷ್ಟೇ ಅಲ್ಲದೆ, ಫ್ಲಿಪ್ಬುಕ್ ಮತ್ತು ಫೆನಾಕಿಸ್ಟೋಸ್ಕೋಪ್ಗಳಂತಹ ಸಾಂಪ್ರದಾಯಿಕ ಅನಿಮೇಷನ್ ತಂತ್ರಗಳಲ್ಲಿ ಪ್ರಾವೀಣ್ಯತೆ ಸಾಧಿಸಲಿದ್ದಾರೆ. ಅಷ್ಟೇ ಅಲ್ಲದೆ, ವಸ್ತು ಆಧಾರಿತ (Object-based) ಅನಿಮೇಷನ್ಗೆ ಅಗತ್ಯವಿರುವ ಭೌತಿಕ ಪರಿಸರ ಮತ್ತು DIY ಸ್ಟುಡಿಯೋವನ್ನು ತಾವೇ ಸ್ವತಃ ನಿರ್ಮಿಸುವ ತಾಂತ್ರಿಕ ಕಲೆಯನ್ನು ಇಲ್ಲಿ ಮೈಗೂಡಿಸಿಕೊಳ್ಳಲಿದ್ದಾರೆ.
ವಾರ 2 (ಮೆಂಟರ್ಶಿಪ್): ಈ ವಾರವು ಕಥಾವಸ್ತು ಮತ್ತು ಸೃಜನಶೀಲತೆಗೆ ಮೀಸಲಾಗಿದ್ದು, ಸೆಲೆಬ್ರಿಟಿ ತಜ್ಞರೊಂದಿಗೆ ನೇರ ಸಂವಾದಗಳು ನಡೆಯಲಿವೆ. ರಘು ದೀಕ್ಷಿತ್, ಎಂ.ಡಿ. ಪಲ್ಲವಿ ಮತ್ತು ಕಾರ್ತಿಕ್ ಸರಗೂರು ಅವರಂತಹ ದಿಗ್ಗಜರು ಕಥೆಯ ಭಾವನೆಗಳು, ಧ್ವನಿ ಮತ್ತು ದೃಶ್ಯ ರೂಪಕಗಳ ಕುರಿತು ಸ್ಫೂರ್ತಿ ನೀಡಲಿದ್ದಾರೆ. ಈ ಅವಧಿಯಲ್ಲಿ ವಿದ್ಯಾರ್ಥಿಗಳು ಹಳೆಯ ನೀತಿ ಕಥೆಗಳಿಗೆ ಆಧುನಿಕ 'ಟ್ವಿಸ್ಟ್' ನೀಡಿ ಸ್ಕ್ರಿಪ್ಟ್ ಸಿದ್ಧಪಡಿಸಲಿದ್ದಾರೆ. ವಿಜ್ಞಾನ ತಜ್ಞರ ಜೊತೆಗಿನ ಚರ್ಚೆಗಳು ಈ ಕಥೆಗಳಲ್ಲಿ ನಾವೀನ್ಯತೆ ತುಂಬಲು ಸಹಾಯ ಮಾಡಲಿವೆ.
ವಾರ 3 (ಫೈನಲ್ ಕಟ್): ಇದು ಅಂತಿಮ ಚಿತ್ರೀಕರಣ ಮತ್ತು ಸಂಕಲನದ ಹಂತ. ಚಿತ್ರೀಕರಣಗೊಂಡ ನೂರಾರು ಫ್ರೇಮ್ಗಳನ್ನು ಒಟ್ಟುಗೂಡಿಸಿ ಸಿನೆಮಾದ ರೂಪ ನೀಡುವ ಸಂಕೀರ್ಣವಾದ 'ಪೋಸ್ಟ್-ಪ್ರೊಡಕ್ಷನ್' ಕೆಲಸಗಳು ಇಲ್ಲಿ ನಡೆಯುತ್ತವೆ. ಸೌಂಡ್ ಡಿಸೈನ್ ಮತ್ತು ಅಂತಿಮ ಎಡಿಟಿಂಗ್ ಮೂಲಕ ವಿದ್ಯಾರ್ಥಿಗಳು ತಯಾರಿಸಿದ ಕಲ್ಪನೆಗಳು ಒಂದು ಪರಿಪೂರ್ಣವಾದ ಫೀಚರ್ ಫಿಲ್ಮ್ ರೂಪ ಪಡೆದು ಪ್ರದರ್ಶನಕ್ಕೆ ಸಿದ್ಧವಾಗಲಿವೆ.
ಬಾನಂಗಳದಲ್ಲಿ ಈಸ್ಟರ್ ಹಬ್ಬದೂಟ: ಪ್ರಯಾಣಿಕರಿಗಾಗಿ ವಿಶೇಷ ಮೆನು ಬಿಡುಗಡೆ ಮಾಡಿದ ಆಕಾಸ ಏರ್
ಮೇ 9ರಂದು ನಡೆಯಲಿರುವ ಗ್ರ್ಯಾಂಡ್ ಶೋಕೇಸ್ನಲ್ಲಿ ಪೋಷಕರು, ಪ್ರೇಕ್ಷಕರ ಸಮ್ಮುಖದಲ್ಲಿ ಮಕ್ಕಳೇ ಸಿದ್ಧಪಡಿಸಿದ ಈ ಅದ್ಭುತ ಕಿರುಚಿತ್ರಗಳನ್ನು ಪ್ರದರ್ಶಿಸಲಾಗುವುದು. ಹೆಚ್ಚಿನ ಮಾಹಿತಿಗಾಗಿ: Paramfoundation.org ಹಾಗೂ 84312 66867 ಸಂಪರ್ಕಿಸಬಹುದು ಎಂದು ಪ್ರಕಟಣೆಯಲ್ಲಿ ತಿಳಿಸಿದೆ.