ഉദുമ: (KasargodVartha) ബാരയിലും സമീപ പ്രദേശങ്ങളിലും കാട്ടുപോത്തുകള്‍ ഇറങ്ങിയതോടെ പ്രദേശവാസികള്‍ ആശങ്കയില്‍.

2026 ജൂണ്‍ ഒന്ന് തിങ്കളാഴ്ച രാവിലെ എട്ട് മണിയോടെയാണ് മൂന്ന് കാട്ടുപോത്തുകളെ പ്രദേശവാസികളുടെ ശ്രദ്ധയില്‍പ്പെട്ടത്.

സ്കൂള്‍ പരിസരത്തെത്തി

ജനങ്ങള്‍ ബഹളം വെച്ചതോടെ ഒരു പോത്ത് ബാര ഭണ്ഡാരത്തുകാവ് ഭാഗത്തേക്കും മറ്റ് രണ്ടെണ്ണം വെടിക്കുന്ന്, ബാര സ്‌കൂളിന് താഴെയുള്ള പ്രദേശത്തേക്കും ഓടിപ്പോയതായി പ്രദേശവാസികള്‍ പറഞ്ഞു.

പിന്നീട് മൂന്ന് പോത്തുകളും വിവിധ ഭാഗങ്ങളിലായി നിലയുറപ്പിച്ചതായി വിവരമുണ്ട്. ഇതിൻ്റെ വീഡിയോ പുറത്തുവന്നിട്ടുണ്ട്.

നിലവില്‍ രണ്ട് കാട്ടുപോത്തുകള്‍ ബാര സ്‌കൂളിന് സമീപം തുടരുന്നതായും പ്രദേശവാസികള്‍ പറഞ്ഞു. സംഭവത്തെ തുടർന്ന് വനംവകുപ്പ് ഉദ്യോഗസ്ഥരെയും പോലീസിനെയും സ്‌കൂള്‍ അധികൃതരെയും വിവരം അറിയിച്ചിട്ടുണ്ട്. പോലീസ് സ്ഥലത്തെത്തി സ്ഥിതിഗതികള്‍ നിരീക്ഷിക്കുന്നുണ്ട്.

വിദ്യാർഥികള്‍ക്ക് ആശങ്ക

കാട്ടുപോത്തുകള്‍ ജനവാസ മേഖലയിലെത്തിയത് പ്രദേശവാസികളെയും സ്‌കൂള്‍ വിദ്യാർഥികളെയും ഭീതിയിലാഴ്ത്തിയിരിക്കുകയാണ്. അധ്യയന വർഷാരംഭ ദിനമായതിനാല്‍ സ്‌കൂളിലേക്ക് നടന്നുപോകേണ്ട കുട്ടികളെ രക്ഷിതാക്കള്‍ വാഹനങ്ങളിലൂടെയാണ് സ്‌കൂളിലെത്തിച്ചത്. വന്യമൃഗങ്ങള്‍ സ്‌കൂള്‍ പരിസരത്ത് തുടരുന്നതിനാല്‍ കുട്ടികളുടെയും നാട്ടുകാരുടെയും സുരക്ഷ സംബന്ധിച്ച്‌ ആശങ്ക ഉയർന്നിട്ടുണ്ട്.

കഴിഞ്ഞ ഏതാനും ദിവസങ്ങളായി സമീപ പ്രദേശങ്ങളായ മുല്ലച്ചേരി, കരിച്ചേരി, തൂവല്‍ എന്നിവിടങ്ങളിലും കാട്ടുപോത്തുകളുടെ സാന്നിധ്യം റിപ്പോർട്ട് ചെയ്തിരുന്നു. അവിടെ കണ്ട കാട്ടുപോത്തുകളാണ് തിങ്കളാഴ്ച രാവിലെ ബാര ഭാഗത്ത് എത്തിയതെന്നാണ് നാട്ടുകാരുടെ സംശയം. വനമേഖലയില്‍ നിന്ന് ഭക്ഷണവും വെള്ളവും തേടി ജനവാസ മേഖലയിലേക്ക് ഇറങ്ങിയതാകാമെന്നാണ് പ്രാഥമിക നിഗമനം.