ഒരു ലക്ഷം രൂപയും പ്രശസ്ത ശില്പി കാനായി കുഞ്ഞിരാമൻ വെങ്കലത്തില്‍ രൂപകല്‍പ്പന ചെയ്ത ശില്പവും പ്രശസ്തിപത്രവും അടങ്ങുന്നതാണ് വയലാർ അവാർഡ്. മലയാള സാഹിത്യരംഗത്തെ ശ്രദ്ധേയമായ പുരസ്‌കാരങ്ങളിലൊന്നായ വയലാർ അവാർഡിന്റെ അമ്പതാം പതിപ്പിലാണ് രാജശ്രീയുടെ ആത്രേയകം തിരഞ്ഞെടുക്കപ്പെട്ടത്.

1977 ജൂലായ് 22ന് കണ്ണൂർ ജില്ലയിലെ പറശ്ശിനിക്കടവിലാണ് രാജശ്രീയുടെ ജനനം. പി.എൻ. രാജപ്പൻ മാസ്റ്ററുടെയും ആർ. രാജമ്മയുടെയും മകളാണ്. വിവിധ ആനുകാലികങ്ങളില്‍ കഥകളും ലേഖനങ്ങളും പ്രസിദ്ധീകരിച്ചിട്ടുണ്ട്. നായികാനിർമിതി: വഴിയും പൊരുളും, അപസർപ്പകാഖ്യാനങ്ങള്‍: ഭാവനയും രാഷ്ട്രീയവും എന്നിവയാണ് പ്രസിദ്ധീകരിച്ച പുസ്തകങ്ങള്‍.

കല്യാണിയെന്നും ദാക്ഷായണിയെന്നും പേരായ രണ്ടു സ്ത്രീകളുടെ കഥ എന്ന കൃതിക്ക് 2021ലെ കേരള സാഹിത്യ അക്കാദമി അവാർഡ് ലഭിച്ചിരുന്നു. ഇന്ന് പുരസ്കാരം ലഭിച്ച ആത്രേകയമാണ് പ്രധാന കൃതി. 'കമലാലക്ഷണം' എന്ന നോവല്‍ നിലവില്‍ ഒരു ആഴ്ചപ്പതിപ്പില്‍ പ്രസിദ്ധീകരിച്ചുവരികയാണ്.

തലശ്ശേരി ഗവ. ബ്രണ്ണൻ കോളേജിലെ മലയാള വിഭാഗം ഗവേഷണകേന്ദ്രത്തില്‍ അദ്ധ്യാപികയായി പ്രവർത്തിക്കുന്ന രാജശ്രീ സാഹിത്യരചനയ്‌ക്കൊപ്പം അദ്ധ്യാപനരംഗത്തും സജീവമാണ്. നന്ദ ശ്രീപാർവതിയും നിരഞ്ജൻ ശ്രീപതിയുമാണ് മക്കള്‍.

അവാർഡ് നിർണയ സമിതിയില്‍ ഒ.വി. ഉഷ, സുഭാഷ് ചന്ദ്രൻ, വി. വിജയകുമാർ എന്നിവർ അംഗങ്ങളായിരുന്നു.വയലാർ രാമവർമ്മയുടെ ചരമദിനമായ ഒക്ടോബർ 27ന് വൈകിട്ട് 5.30ന് തിരുവനന്തപുരത്തെ നിശാഗന്ധി ഓഡിറ്റോറിയത്തില്‍ പുരസ്‌കാര സമർപ്പണം നടക്കും.