വ്യാഴാഴ്ച സന്ധ്യയോടെയാണ് മുതിരേരി വാളുമായി എടയാർ മൂഴിയോട്ടില്ലത്തെ സുരേഷ് നമ്പൂതിരി ഇക്കരെ കൊട്ടിയൂരില്‍ എത്തിയത്. വാള്‍ എഴുന്നള്ളത്ത് വേളയില്‍ നെയ്യമൃത് വ്രതക്കാർ ഇക്കരെ നടയില്‍ ഭക്തിപൂർവം പങ്കെടുത്തു. വാള്‍ എത്തിയതിന് ശേഷം ആചാര്യന്മാരും അടിയന്തര യോഗവും സ്ഥാനികരും അക്കരെ സന്നിധാനത്തില്‍ പ്രവേശിച്ചു.ചോതി വിളക്ക് തെളിച്ച ശേഷം മണിത്തറയില്‍ പ്രവേശിച്ച ബ്രാഹ്മണർ ചേർന്ന് അഷ്ടബന്ധം നീക്കി സ്വയംഭൂ വിഗ്രഹം കുടികൊള്ളുന്ന നാളം തുറന്നു. നെയ്യ് ഒഴുകാനുള്ള പാത്തിവച്ച്‌ രാശിവിളിച്ചതോടെ പെരുമാള്‍ക്ക് നെയ്യാട്ടം തുടങ്ങി.

ക്രമം അനുസരിച്ച്‌ വില്ലിപ്പാലൻ കുറുപ്പും തമ്മങ്ങാടൻ നമ്പ്യാരും എത്തിച്ച നെയ് കുടങ്ങള്‍ തുറന്ന് ആദ്യം അഭിഷേകം നടത്തി. തുടർന്ന് ക്രമം അനുസരിച്ച്‌ വിവിധ മഠങ്ങളില്‍ നിന്നുള്ള വ്രതക്കാർ സമർപ്പിച്ച നെയ്യും അഭിഷേകം ചെയ്തു. എല്ലാവരും സമർപ്പിച്ച നെയ് പൂർണമായും അഭിഷേകം ചെയ്തതോടെയാണ് നെയ്യാട്ടം പൂർത്തിയായത്. നെയ്യാട്ടം ഇന്നലെ പുലർച്ച വരെ നീണ്ടു.