ഇസ്ലാമാബാദ് : സുരക്ഷ ഭീഷണിയുണ്ടെന്ന മുന്നറിയിപ്പ് ലഭിച്ചതിനാല് മത്സരം ആരംഭിക്കാന് മിനിട്ടുകള് ശേഷിക്കേ പാകിസ്ഥാനില് നിന്നും ന്യൂസിലാന്റ് ടീം പിന്വാങ്ങിയതിനെ തുടര്ന്നുണ്ടായ നാണക്കേടിലാണ് പാക് ഭരണകൂടം.
എന്നാല് പാകിസ്ഥാന് വാര്ത്താവിതരണ പ്രക്ഷേപണ മന്ത്രി ഫവാദ് ചൗധരി പത്രസമ്മേളനത്തില് 'തെഹ്രീക് ഇതാലിബാന് പാകിസ്ഥാന്' എന്ന തീവ്രവാദ സംഘടനയുടെ വ്യാജ അക്കൗണ്ടില് നിന്നാണ് ഭീഷണിയുണ്ടെന്ന് പ്രസ്താവിച്ചു. ഭീകര സംഘടനയുടെ വ്യാജ അക്കൗണ്ടുണ്ടാക്കിയത് ഇന്ത്യക്കാരനായ ഓം പ്രകാശ് മിശ്ര എന്ന വ്യക്തിയാണെന്നും മന്ത്രി വെളിപ്പെടുത്തി. പാക് മന്ത്രിയുടെ പ്രസ്താവന വന്നതോടെ സമൂഹ മാദ്ധ്യമങ്ങളില് മന്ത്രിക്കെതിരെ ട്രോള് മഴയാണ്. ഗായകനായ ഓം പ്രകാശ് മിശ്രയെയാണോ മന്ത്രി ഉദ്ദേശിച്ചതെന്ന മട്ടിലാണ് ട്രോളുകള്, ഇദ്ദേഹം ന്യൂസിലാന്റ് ടീമിനെ ഭീഷണിപ്പെടുത്തുന്ന ചിത്രങ്ങളും ട്രോളുകളായി പ്രചരിക്കുന്നുണ്ട്.