കാസർകോട്: പാമ്പ് കടിയുടെ ഭീതിയിലേക്ക് കാസർകോട് ജില്ലയും. മൂർഖൻ പാമ്പിന്റെ കടിയേറ്റ് ചികിത്സയില്‍ കഴിയുകയായിരുന്ന എളേരിയിലെ നാലരവയസുകാരി ഋതുചന്ദ്ര കണ്ണീരോർമ്മയായതിന്റെ ഞെട്ടലിലാണ് നാട്.

നാലുദിവസത്തെ കഠിനശ്രമവും ഫലവത്താകാതെയാണ് ഈ കുരുന്നിന് ജീവൻ നഷ്ടപെട്ടത്.

ജില്ലയിലെ പലയിടത്തും വീടുകളിലും പറമ്പുകളിലും പാമ്പുകള്‍ വ്യാപകമായി എത്തുന്ന സ്ഥിതിയുണ്ട്. എടാട്ടുമ്മലിലെ ഒരു വീടിന് മുന്നിലേക്ക് ഇന്നലെ വലിയ പാമ്പ് ഇഴഞ്ഞെത്തി. വീട്ടുകാർ കണ്ടതിനാല്‍ അകത്തേക്ക് കയറിയില്ല. മേശവലിപ്പില്‍ ഒളിച്ച പാമ്പ് സ്വർണ്ണ മോതിരം അണിഞ്ഞ സംഭവം കാസർകോട് അഡൂരില്‍ നിന്ന് കഴിഞ്ഞ ദിവസം പുറത്തുവന്നിരുന്നു.

വേനല്‍ക്കാലം കടുക്കുന്നതോടെ അന്തരീക്ഷത്തിലെ ചൂട് വർദ്ധിക്കുന്നത് പാമ്പുകള്‍ തങ്ങളുടെ സ്വാഭാവിക വാസസ്ഥലങ്ങളില്‍ നിന്നും തണുപ്പ് തേടി ജനവാസ മേഖലകളിലേക്കും വീടുകള്‍ക്കുള്ളിലേക്കും ഇറങ്ങുന്നതാണ് സ്ഥിതി അപകടകരമാക്കുന്നത്. ഈ സാഹചര്യത്തില്‍ പാമ്പ് കടിയേല്‍ക്കാനുള്ള സാദ്ധ്യത വളരെ കൂടുതലായതിനാല്‍ അതീവ ജാഗ്രത പുലർത്തണമെന്ന് വനം, ആരോഗ്യവകുപ്പുകള്‍ മുന്നറിയിപ്പ് നല്‍കിയിട്ടുണ്ട്. പരിഭ്രാന്തരാകാതെ കൃത്യമായ മുൻകരുതലുകള്‍ എടുത്താല്‍ അപകടങ്ങള്‍ ഒഴിവാക്കാൻ സഹായിക്കുമെന്നും അധികൃതർ വിശദീകരിക്കുന്നു.

പാമ്പ് കടിയേറ്റാല്‍ ഉടൻ ചെയ്യേണ്ടത്

കടിയേറ്റ സഥലത്ത് നിന്നും സാവധാനം സുരക്ഷിതമായ സ്ഥലത്തേക്ക് മാറുക.

കടിയേറ്റയാളിന് ആത്മവിശ്വാസം പകരുക ഭയവും പരിഭ്രാന്തിയുമുണ്ടായാല്‍ രക്തചംക്രമണം കൂടുകയും വൃക്ക, മസ്തിഷ്‌കം, ഹൃദയം തുടങ്ങിയ അവയവങ്ങളിലേക്ക് വിഷം പെട്ടെന്ന് എത്തുകയും ചെയ്യും

 കടിയേറ്റ ഭാഗത്ത് ഒന്നും ചെയ്യാതെ അതുപോലെ തന്നെ വെക്കുക / ചലിപ്പിക്കാതിരിക്കുക.

കടിയേറ്റ കൈകാലുകളില്‍ നിന്നും ഷൂസ്, ബെല്‍റ്റ്, മോതിരം, വാച്ച്‌, ആഭരണങ്ങള്‍, മുറുകിക്കിടക്കുന്ന വസ്ത്രം എന്നിവ അഴിച്ചു മാറ്റുക.

കടിയേറ്റയാളിനെ തല ചരിച്ചു വെച്ച്‌, കൈകൊണ്ട് മുഖത്തെ താങ്ങി നിർത്തുന്ന രീതിയില്‍, ഇടത്തോട്ട് ചരിച്ച്‌ വലതു കാല്‍ മടക്കി കിടത്തുക

വാഹന സൗകര്യം ലഭ്യമായാലുടൻ കടിയേറ്റയാളെ അടിയന്തിര ചികിത്സക്കായി തൊട്ടടുത്ത ആന്റി സ്നേക്ക് വെനം (ASV) നല്‍കുന്ന ആശുപത്രിയില്‍ എത്തിക്കുക.

കടിച്ച പാമ്പിനെ പിടിക്കാൻ ശ്രമിക്കരുത്