കൊച്ചി: ഇന്ത്യൻ ഉപഭോക്താക്കളുടെ മാറുന്ന മൊബിലിറ്റി ആവശ്യങ്ങള് ലക്ഷ്യമിട്ട് ഹോണ്ട മോട്ടോർസൈക്കിള് ആൻഡ് സ്കൂട്ടർ ഇന്ത്യ (എച്ച്എംഎസ്ഐ) പത്ത് പുതിയ ഉത്പന്നങ്ങളുടെ പോർട്ട്ഫോളിയോ അവതരിപ്പിച്ചു.
ഏഴ് പുതിയ മോഡലുകളും മൂന്ന് പുതുക്കിയ മോഡലുകളുമാണ് ലഭ്യമാക്കുന്നത്. 'മേക്ക് ഇൻ ഇന്ത്യ' പദ്ധതിയുടെ ഭാഗമായാണ് ഐ.സി.ഇ, ഇലക്ട്രിക്, ഫ്ളെക്സ് ഫ്യൂവല് സാങ്കേതികവിദ്യകള് ഉള്ക്കൊള്ളുന്ന മോഡലുകള് വിപണിയിലെത്തിക്കുന്നത്.
ഹോണ്ട എഡിവി 160 സിറ്റി അഡ്വഞ്ചർ സ്കൂട്ടർ, സിബി500 റോഡ്സ്റ്റർ, റെബെല് 300, റെബെല് 500 ക്രൂസർ ബൈക്കുകള്, എക്സ്ആർ 300എല്, എക്സ്ആർ 300 റാലി അഡ്വഞ്ചർ മോട്ടോർസൈക്കിളുകള്, ക്യൂസി3 ഇലക്ട്രിക് സ്കൂട്ടർ എന്നിവയാണ് പുതിയ മോഡലുകള്. സി.ബി350 ശ്രേണിയിലെ വാഹനങ്ങള് പുതിയ നിറങ്ങളോടെ പുതുക്കി അവതരിപ്പിച്ചിട്ടുണ്ട്.
തിരഞ്ഞെടുത്ത മോഡലുകളില് ഹോണ്ടയുടെ ഇ ക്ലച്ച് സാങ്കേതികവിദ്യയും ലഭ്യമാകും. ഉല്പ്പന്നങ്ങളുടെ വില, ലോഞ്ച് തീയതി, വിപണിയിലെ ലഭ്യത തുടങ്ങിയ വിവരങ്ങള് പിന്നീട് പ്രത്യേകം പ്രഖ്യാപിക്കുമെന്ന് കമ്പനി അറിയിച്ചു. ഇന്ത്യയിലെ പ്രാദേശിക ഉല്പ്പാദനവും എൻജിനീയറിംഗ് ശേഷിയും കൂടുതല് ശക്തിപ്പെടുത്തുന്നതിന്റെ ഭാഗമായാണ് പുതിയ പോർട്ട്ഫോളിയോ അവതരിപ്പിച്ചതെന്ന് ഹോണ്ട വ്യക്തമാക്കി.