വര്ക്കല: റെയില്വേ അധികൃതര് വഴി അടച്ചതോടെ ഗുഡ് ഷെഡ് റോഡിലെ ചെറുകുന്നം പ്രദേശവാസികളുടെ യാത്രാസൗകര്യം ബുദ്ധിമുട്ടില്. റെയില്വേ സ്റ്റേഷന് കിഴക്കുവശത്ത് താമസിക്കുന്നവരാണ് കാല്നടയാത്രാ സൗകര്യമില്ലാതെ ദുരിതത്തിലായത്. പഴയ ചങ്ങല ഗേറ്റിനും വി.ആര് കോളേജിനും സമീപത്തുള്ള ട്രാക്കുകള് മറികടന്നാണ് ഇവര് പ്രധാന റോഡിലേക്ക് ഇറങ്ങിയിരുന്നത്. കുറച്ചുമാസം മുമ്ബ് റെയില്വേ അധികൃതര് പൊതുജനങ്ങള് ഉപയോഗിച്ചിരുന്ന വഴി കോണ്ക്രീറ്റ് ഭിത്തി നിര്മ്മിച്ച് കെട്ടിയടച്ചിരുന്നു. മഴക്കാലത്ത് റോഡില് നിന്ന് ട്രാക്കിലേക്ക് മണ്ണ് ഒലിച്ചിറങ്ങുന്നുവെന്നാണ് റെയില്വേയുടെ പരാതി. പൊതുജനങ്ങളുടെ പരാതികള്ക്ക് പരിഹാരം കണ്ടശേഷം മാത്രമേ നടപടികള് സ്വീകരിക്കാവൂ എന്ന് വി.
ജോയി എം.എല്.എ ഡിവിഷണല് മാനേജര് ഉള്പ്പെടെയുള്ളവരോട് അഭ്യര്ത്ഥിച്ചിരുന്നു. അതിനുശേഷം കോണ്ക്രീറ്റ് ഭിത്തിക്ക് സമീപത്തെ ചെറിയ വിടവ് ചാടിക്കടന്നാണ് പ്രധാന റോഡിലേക്ക് പ്രദേശവാസികള് എത്തിയിരുന്നത്. കഴിഞ്ഞ ദിവസം അധികൃതര് കാടുവെട്ടിത്തെളിച്ച വേസ്റ്റ് കൂട്ടിയിട്ട് ഈ ഭാഗവും അടയ്ക്കുകയായിരുന്നു. യാത്രാസൗകര്യം തടസപ്പെടുത്തരുതെന്ന് ആവശ്യപ്പെട്ട് ചെറുകുന്നം സ്റ്റാര്ലെയിന് റസിഡന്റ്സ് അസോസിയേഷനും നേതാജി റസിഡന്റ്സ് അസോസിയേഷനും വിവിധ സംഘടനകളും നിവേദനങ്ങള് സമര്പ്പിച്ചെങ്കിലും ഫലമുണ്ടായില്ല. വി. ജോയി എം.എല്.എ ഇന്നലെ സ്ഥലം സന്ദര്ശിച്ചു. റെയില്വേ ഡിവിഷണല് ജനറല് മാനേജര്ക്ക് എം.എല്.എ ഇ മെയില് വഴി നിവേദനം നല്കിയിട്ടുണ്ട്.