ചെപ്പോക്ക്: ഐപിഎല്‍ പത്തൊമ്പതാം സീസണിലെ ആദ്യ ജയം തേടി ചെന്നൈ ഇന്നിറങ്ങും. ആവേശ പോരാട്ടത്തില്‍ പഞ്ചാബ് കിങ്സ് ആണ് എതിരാളികള്‍.

ആദ്യ മത്സരത്തില്‍ രാജസ്ഥാനോടേറ്റ എട്ട് വിക്കറ്റിൻ്റെ ഞെട്ടിക്കുന്ന തോല്‍വിയാണ് ചെന്നൈയുടെ നില പരുങ്ങലിലാക്കിയത്. -4.171 എന്ന നെറ്റ്‌റണ്‍റേറ്റിൻ്റെ അടിസ്ഥാനത്തിലാണ് ചെന്നൈ താഴേക്ക് പതിച്ചത്. ഇന്ന് ജയിച്ചാല്‍ പോയിൻ്റ് നിലയില്‍ ഏഴാം സ്ഥാനത്തേക്ക് ഉയരാൻ ചെന്നൈയ്ക്ക് സാധിക്കും.

ഗുജറാത്ത് ടൈറ്റൻസിനെതിരായ കഴിഞ്ഞ മത്സരത്തില്‍ കൂപ്പർ കൊണോളിയുടേയും (44 പന്തില്‍ 72) പ്രഭ്‌സിമ്രാൻ സിങ്ങിൻ്റേയും (24 പന്തില്‍ 37) ബാറ്റിങ് കരുത്തിലും, ഫാസ്റ്റ് ബൗളറായ പ്രസിദ്ധ് കൃഷ്ണയുടെ മൂന്ന് വിക്കറ്റ് പ്രകടനത്തിൻ്റേയും മികവിലാണ് പഞ്ചാബ് കിങ്സ് മൂന്ന് വിക്കറ്റിൻ്റെ ജയം നേടിയത്.

സിഎസ്‌കെ സ്ക്വാഡില്‍ നിറയുന്ന ഫ്രഷ്‌നസ്!

ഐപിഎല്‍ 2026 സീസണിലേക്ക് വരുമ്പോള്‍ കുറേക്കൂടി പവർ പാക്ക്ഡാണ് ചെന്നൈ സൂപ്പർ കിങ്സ്. യുവത്വത്തിൻ്റെ പ്രസരിപ്പാണ് ചെന്നൈയുടെ ടി20 സ്ക്വാഡിനെ കൂടുതല്‍ കരുത്തുറ്റതാക്കുന്നത്. ക്യാപ്റ്റൻ റുതുരാജിൻ്റേയും സഞ്ജു സാംസണിൻ്റേയും സാന്നിധ്യവുമാണ് ചെന്നൈയുടെ കരുത്ത് വിളിച്ചോതുന്നത്. പവർപ്ലേയില്‍ പരമാവധി റണ്ണടിച്ച്‌ കൂട്ടാൻ ഇരുവർക്കും കഴിയുമെന്നാണ് മാനേജ്മെൻ്റിൻ്റെ പ്രതീക്ഷ. കഴിഞ്ഞ സീസണില്‍ ഓപ്പണറായിരുന്നു ആയുഷ് മാത്രെയെ ടീം വണ്‍ഡൗണിലേക്ക് മാറ്റിയിരുന്നു.

മധ്യനിരയില്‍ ശിവം ദുബെ, ഡിവാള്‍ഡ് ബ്രെവിസ് എന്നിവർക്ക് കൂട്ടായി വിക്കറ്റ് കീപ്പർ ബാറ്റർ കാർത്തിക് ശർമയും ഓള്‍റൗണ്ടർ പ്രശാന്ത് വീറും സർഫറാസ് ഖാനും കൂടി എത്തുന്നതോടെ ടീം കൂടുതല്‍ സന്തുലിതമാകും. ഇവർക്കൊപ്പം എം.എസ്. ധോണിയുടെ വാലറ്റത്തെ ഫയർ പവർ കൂടിയാകുന്നതോടെ ടീം സ്കോർ ഡെത്ത് ഓവറുകളില്‍ കുതിച്ചുയരും.

യുവത്വത്തിൻ്റെ ചുറുചുറുക്കില്‍ സിഎസ്‌കെ

ചെന്നൈ ടീമിലെ ഏറ്റവും പ്രായം കൂടിയ താരം ലെജൻഡ് എം.എസ്. ധോണിയാണ്. 44 വയസുള്ള ധോണിയെ മാറ്റിനിർത്തിയാല്‍ ചെന്നൈ ടീമില്‍ 32 വയസിന് മുകളില്‍ പ്രായമുള്ളവർ ആരും തന്നെ ഇല്ല. ശ്രേയസ് ഗോപാല്‍,അകേല്‍ ഹൊസെയ്ൻ എന്നിവർക്ക് 32 വയസാണ് പ്രായം. 31 വയസുള്ള മലയാളി താരം സഞ്ജു സാംസണും ജാമി ഓവർട്ടണുമാണ് തൊട്ടു താഴെയുള്ളവർ. ചെന്നൈ ടീമിലെ ബാക്കിയുള്ള താരങ്ങളെല്ലാം 30 വയസില്‍ താഴെ പ്രായമുള്ളവരാണ്.