ഒരു കാരണവശാലും ഇറാനിലേക്ക് യാത്ര ചെയ്യരുതെന്നും യുഎസ് പൗരന്മാർക്ക് മുന്നറിയിപ്പ് നല്‍കി. മേഖലയിലെ സുരക്ഷാ സാഹചര്യം സങ്കീർണമാണെന്നും വിമാന സർവീസുകള്‍ റദ്ദാകാനും വ്യോമപാതകള്‍ അടയ്ക്കാനും മറ്റ് യാത്രാ തടസ്സങ്ങള്‍ ഉണ്ടാകാനും സാധ്യതയുണ്ടെന്നും ഇറാനിലെ യുഎസ് വെർച്വല്‍ എംബസി പുറത്തിറക്കിയ സുരക്ഷാ മുന്നറിയിപ്പില്‍ പറയുന്നു.

"ഒരു കാരണവശാലും ഇറാനിലേക്ക് യാത്ര ചെയ്യരുത്. ഇറാനിലുള്ള യുഎസ് പൗരന്മാർ ഉടൻ രാജ്യം വിടണം," എന്ന് മുന്നറിയിപ്പില്‍ വ്യക്തമാക്കി. മേഖലയിലുള്ള അമേരിക്കക്കാർ അതീവ ജാഗ്രത പാലിക്കണമെന്നും വിമാനത്താവളങ്ങള്‍, വിമാനക്കമ്പനികള്‍, അതിർത്തി കവാടങ്ങള്‍ എന്നിവയുമായി ബന്ധപ്പെട്ട പുതിയ വിവരങ്ങള്‍ നിരീക്ഷിക്കണമെന്നും യുഎസ് നിർദേശിച്ചു. ഇറാന്റെ കര അതിർത്തികളിലെ നടപടിക്രമങ്ങള്‍ മുൻകൂട്ടി അറിയിക്കാതെ മാറിയേക്കാമെന്നും മുന്നറിയിപ്പിലുണ്ട്.

ഇറാൻ പിന്തുണയ്ക്കുന്ന ഹൂതി സേന സൗദി അറേബ്യയില്‍ നടത്തിയ ആക്രമണങ്ങളും യുഎസ് ചൂണ്ടിക്കാട്ടി. സിവിലിയൻ വിമാനത്താവളങ്ങള്‍ക്കെതിരായ ആക്രമണങ്ങളും ഇതില്‍ ഉള്‍പ്പെടുന്നു. മേഖലയിലെ സൈനിക സംഘർഷം അതിവേഗം രൂക്ഷമാകാൻ സാധ്യതയുണ്ടെന്നും യുഎസ് മുന്നറിയിപ്പ് നല്‍കി. മിഡില്‍ ഈസ്റ്റിന് പുറത്തുള്ളതടക്കം യുഎസ് നയതന്ത്ര സ്ഥാപനങ്ങള്‍ മുൻകാലങ്ങളില്‍ ആക്രമിക്കപ്പെട്ടിട്ടുണ്ടെന്നും യുഎസ് വ്യക്തമാക്കി.

ഇറാനോ ഇറാനെ പിന്തുണയ്ക്കുന്ന സംഘങ്ങളോ വിദേശത്തുള്ള യുഎസ് താല്‍പര്യങ്ങള്‍, സ്ഥാപനങ്ങള്‍, വ്യാപാര കേന്ദ്രങ്ങള്‍ എന്നിവ ലക്ഷ്യമിടാൻ സാധ്യതയുണ്ടെന്നും മുന്നറിയിപ്പില്‍ പറയുന്നു. അടിയന്തര സാഹചര്യങ്ങളില്‍ സുരക്ഷാ വിവരങ്ങള്‍ ലഭിക്കുന്നതിനും യുഎസ് നയതന്ത്ര അധികൃതരുമായി ബന്ധപ്പെടുന്നതിനുമായി സ്റ്റേറ്റ് ഡിപ്പാർട്ട്മെന്റിന്റെ സ്മാർട്ട് ട്രാവലർ എൻറോള്‍മെന്റ് പ്രോഗ്രാമില്‍ (STEP) രജിസ്റ്റർ ചെയ്യാനും പൗരന്മാരോട് ആവശ്യപ്പെട്ടു. പ്രകടനങ്ങളും വലിയ ജനക്കൂട്ടങ്ങളും ഒഴിവാക്കണമെന്നും യുഎസുമായി പരസ്യമായി ബന്ധപ്പെട്ടിരിക്കുന്ന സ്ഥലങ്ങളില്‍ ജാഗ്രത പാലിക്കണമെന്നും നിർദേശമുണ്ട്.

വ്യോമാക്രമണമുണ്ടായാല്‍ ജനലുകളില്‍ നിന്നും ഗ്ലാസ് വാതിലുകളില്‍ നിന്നും അകന്നു നില്‍ക്കണമെന്നും വീണുകിടക്കുന്ന അവശിഷ്ടങ്ങള്‍ ഒഴിവാക്കണമെന്നും ഔദ്യോഗിക അറിയിപ്പുകള്‍ നിരീക്ഷിക്കണമെന്നും യുഎസ് നിർദേശിച്ചു. അമേരിക്കയും ഇറാനും തമ്മിലുള്ള സംഘർഷം കൂടുതല്‍ രൂക്ഷമാകുന്നതിനിടെയാണ് പുതിയ മുന്നറിയിപ്പ്. ഇറാനെതിരെ യുഎസ് സൈനിക, സമുദ്ര സമ്മർദം തുടരുന്നതിനിടെ മേഖലയിലെ യുഎസ് താല്‍പര്യങ്ങള്‍ക്കെതിരെ തിരിച്ചടിയുണ്ടാകുമെന്ന് ഇറാൻ അധികൃതരും മുന്നറിയിപ്പ് നല്‍കിയിട്ടുണ്ട്.

ഇതിനിടെ സൗദി അറേബ്യയിലുള്ള യുഎസ് പൗരന്മാർക്കും സർക്കാർ ജീവനക്കാർക്കും യുഎസ് പ്രത്യേക സുരക്ഷാ മുന്നറിയിപ്പ് നല്‍കിയിരുന്നു. ഹൂതി ആക്രമണങ്ങളുടെ പശ്ചാത്തലത്തില്‍ തായിഫിലേക്കും യൻബുവിലേക്കുമുള്ള ഔദ്യോഗിക, വ്യക്തിഗത യാത്രകള്‍ക്ക് സർക്കാർ ജീവനക്കാർ പ്രത്യേക അനുമതി നേടണമെന്നും നിർദേശിച്ചിരുന്നു. റിയാദിലേക്ക് ബാലിസ്റ്റിക് മിസൈല്‍ വിക്ഷേപിച്ചതിന് പിന്നാലെ സൗദി അധികൃതർ 'ശത്രുതാപരമായ വ്യോമ ഭീഷണി' സംബന്ധിച്ചും അടിയന്തര മുന്നറിയിപ്പ് നല്‍കിയിരുന്നു. മിസൈല്‍ തടഞ്ഞതായി സൗദിയുടെ നേതൃത്വത്തിലുള്ള സഖ്യസേന അറിയിച്ചു. ബിഷ്, തായിഫ്, ഫറസാൻ, യൻബു എന്നിവിടങ്ങളില്‍ സാധാരണക്കാരെയും അടിസ്ഥാന സൗകര്യങ്ങളെയും ലക്ഷ്യമിട്ട് ആക്രമണശ്രമങ്ങള്‍ ഉണ്ടായതായും സഖ്യസേന വ്യക്തമാക്കി.

US tells citizens to leave Iran immediately, warns of travel disruptions