ശരീരഭാരം നിയന്ത്രിക്കാന്‍ ആഗ്രഹിക്കുന്ന പലര്‍ക്കുമുള്ള സംശയമാണ് ബദാം കഴിക്കുന്നത് എത്രത്തോളം ഗുണം ചെയ്യും എന്നുളളത്. ബദാം കലോറി നിറഞ്ഞതാണെന്നും, ശരീരഭാരം വര്‍ദ്ധിപ്പിക്കുമെന്നും മിക്ക ആളുകളും വിശ്വസിക്കുന്നുണ്ട്. എന്നാല്‍ അവ ശരീരഭാരം കുറയ്ക്കാന്‍ ആഗ്രഹിക്കുന്നവര്‍ക്ക് ഡയറ്റില്‍ ഉള്‍പ്പെടുത്താന്‍ കഴിയുന്ന ഒന്നാണ്.

ബദാം കഴിക്കേണ്ടത് എങ്ങനെ

ബദാം എപ്പോഴും കുതിര്‍ത്ത് കഴിക്കുന്നതാണ് ആരോഗ്യത്തിന് കൂടുതല്‍ ഗുണം ചെയ്യുക. കുതിര്‍ക്കാതെ കഴിച്ചാല്‍ ബദാമിലെ തവിട്ട് നിറത്തിലുള്ള തൊലി(അതില്‍ ടാനിനുകള്‍ അടങ്ങിയിട്ടുണ്ട്) പോഷകങ്ങളുടെ ആഗിരണം തടയുന്നു. കുതിര്‍ക്കുന്നതിലൂടെ തൊലി ഒഴിവാക്കാന്‍ സാധിക്കുന്നതോടൊപ്പം എല്ലാ ഗുണങ്ങളും ശരീരത്തിലെത്തുകയും ചെയ്യുന്നു. മാത്രമല്ല കുതിര്‍ത്ത ബദാം ദഹിക്കാനും എളുപ്പമാണ്.

തണ്ണിമത്തനിലും വ്യാജനുണ്ട്; എങ്ങനെ തിരിച്ചറിയാമെന്നല്ലേ?; വഴിയുണ്ട്‌

കുതിര്‍ത്ത ബദാമിന്റെ ഗുണം

കുതിര്‍ത്ത ബദാം കഴിക്കുമ്പോള്‍ വയറ് നിറഞ്ഞതായി തോന്നും. ഇത് അനാവശ്യമായി ഭക്ഷണം കഴിക്കാന്‍ നിങ്ങളെ പ്രേരിപ്പിക്കില്ല. മാത്രമല്ല വിശപ്പ് കുറയ്ക്കാനും മെറ്റബോളിസം വര്‍ദ്ധിപ്പിക്കാനും സഹായിക്കുന്ന പ്രോട്ടീനും നാരുകളും ബദാമില്‍ ധാരാളം അടങ്ങിയിട്ടുണ്ട്.

എങ്ങനെയാണ് ബദാം കുതിര്‍ക്കേണ്ടത്

ഒരുപിടി നല്ല ബദാം എടുത്ത് അര കപ്പ് വെള്ളത്തില്‍ ഇട്ടുവയ്ക്കുക. 6-8 മണിക്കൂര്‍ അല്ലെങ്കില്‍ ഒരു രാത്രി മുഴുവന്‍ മൂടിവയ്ക്കുക. പിറ്റേദിവസം രാവിലെ വെള്ളം കളഞ്ഞശേഷം ബദാമിന്റെ തൊലി കളഞ്ഞ് വെറും വയറ്റില്‍ കഴിക്കാവുന്നതാണ്.

കുതിര്‍ത്ത ബദാമിന്റെ ഗുണങ്ങള്‍

മെച്ചപ്പെട്ട ദഹനവും പോഷക ആഗിരണവും

പച്ച ബദാമില്‍ 'എന്‍സൈം ഇന്‍ഹിബിറ്ററുകള്‍' അടങ്ങിയിട്ടുണ്ട്. ഇത് ഒരു പരിധിവരെ ദഹനത്തെ സങ്കീര്‍ണ്ണമാക്കുന്നു. ബദാം രാത്രി മുഴുവന്‍ കുതിര്‍ക്കുന്നത് ഈ ഇന്‍ഹിബിറ്ററുകളെ ഇല്ലാതാക്കുന്നു. ഇത് ബദാമിനെ കൂടുതല്‍ എളുപ്പത്തില്‍ ദഹിപ്പിക്കാനും ശരീരത്തിന് പോഷകങ്ങള്‍ കൂടുതല്‍ ആഗിരണം ചെയ്യാനും സഹായിക്കുന്നു.

തലച്ചോറിന്റെ പ്രവര്‍ത്തനത്തെ സഹായിക്കുന്നു

ബദാം 'തലച്ചോറിന്റെ ഭക്ഷണ' മാണെന്ന് പറയുന്നതിന് ഒരു കാരണമുണ്ട്. ബദാമില്‍ റൈബോഫ്‌ലേവിന്‍, എല്‍-കാര്‍നിറ്റൈന്‍ എന്നിവ അടങ്ങിയിട്ടുണ്ട്. ഇവ തലച്ചോറിന്റെ പ്രവര്‍ത്തനക്ഷമതയും ഓര്‍മ്മശക്തിയും വര്‍ദ്ധിപ്പിക്കുന്ന രണ്ട് പോഷകങ്ങളാണ്. ഒഴിഞ്ഞ വയറ്റില്‍ ബദാം കഴിക്കുന്നത് ഏറെ ഗുണപ്രദമാണ്. കാരണം ഇത് തലച്ചോറിനെ പോഷകങ്ങള്‍ എളുപ്പത്തില്‍ ആഗിരണം ചെയ്യാന്‍ സഹായിക്കുന്നു. കൂടാതെ ദിവസം മുഴുവനുളള ഏകാഗ്രതയും മെച്ചപ്പെടുന്നു.

ഹൃദയാരോഗ്യം നിലനിര്‍ത്തുന്നു

കുതിര്‍ത്ത ബദാമിന്റെ ഏറ്റവും മികച്ച ആരോഗ്യ ഗുണങ്ങളിലൊന്ന് അവ നിങ്ങളുടെ ഹൃദയാരോഗ്യം നിലനിര്‍ത്തുന്നു എന്നതാണ്. അവയില്‍ മോണോസാച്ചുറേറ്റഡ് കൊഴുപ്പുകള്‍, വിറ്റാമിന്‍ ഇ, മഗ്‌നീഷ്യം എന്നിവ അടങ്ങിയിട്ടുണ്ട്. ഇത് ചീത്ത കൊളസ്‌ട്രോള്‍ (എല്‍ഡിഎല്‍) കുറയ്ക്കാനും നല്ല കൊളസ്‌ട്രോള്‍ (എച്ച്‌ഡിഎല്‍) വര്‍ദ്ധിപ്പിക്കാനും സഹായിക്കുന്നു.ഹൃദ്രോഗ സാധ്യത കുറയ്ക്കുകയും ധമനികള്‍ അടഞ്ഞുപോകുന്നത് തടയുകയും ചെയ്യുന്നു .

ഒരു പ്രകൃതിദത്ത ഊര്‍ജ്ജ ബൂസ്റ്റര്‍

രാവിലെ ഊര്‍ജ്ജം വര്‍ദ്ധിപ്പിക്കണോ? എങ്കില്‍ കാപ്പി കുടിക്കുന്നതിനു പകരം, വെറും വയറ്റില്‍ ബദാം കഴിക്കാന്‍ ശ്രമിക്കുക. കുതിര്‍ത്ത ബദാം സാവധാനത്തിലും കൂടുതല്‍ സമയത്തേക്കും ഊര്‍ജ്ജം പുറത്തുവിടുന്നു. ഇത് ദിവസമുഴുവന്‍ ഉന്മേഷത്തോടെയും സജീവമായും നിലനിര്‍ത്തുന്നു. ആരോഗ്യകരമായ കൊഴുപ്പുകള്‍, പ്രോട്ടീന്‍, നാരുകള്‍ എന്നിവ രക്തത്തിലെ പഞ്ചസാരയുടെ അളവ് സ്ഥിരമായി നിലനിര്‍ത്താന്‍ സഹായിക്കുന്നു.

ചര്‍മ്മത്തിന് തിളക്കവും യുവത്വവും നല്‍കുന്നു

സ്വാഭാവികമായി തിളങ്ങുന്ന ചര്‍മ്മം ആഗ്രഹിക്കുന്നുണ്ടെങ്കില്‍ കുതിര്‍ത്ത ബദാം കഴിച്ചുകൊണ്ട് നിങ്ങളുടെ ദിവസം ആരംഭിക്കുക. ബദാമിലെ ആന്റിഓക്സിഡന്റുകളും വിറ്റാമിന്‍ ഇയും ഓക്സിഡേറ്റീവ് സമ്മര്‍ദ്ദത്തെ ചെറുക്കുകയും ചര്‍മ്മത്തെ യുവത്വവും മൃദുവും ആയി നിലനിര്‍ത്തുകയും ചെയ്യുന്നു. ഇവ മുഖക്കുരുവും പാടുകളും കുറയ്ക്കുകയും ആരോഗ്യകരവും തിളക്കമുള്ളതുമായ മുഖം നല്‍കുകയും ചെയ്യുന്നു.

എല്ലുകളും പല്ലുകളും ശക്തമാക്കുന്നു

അസ്ഥികള്‍ക്ക് ആവശ്യമായ ഒരേയൊരു ധാതു കാല്‍സ്യം മാത്രമല്ല. അസ്ഥികളുടെ സാന്ദ്രതയ്ക്കും ശക്തിക്കും ഫോസ്ഫറസും മഗ്‌നീഷ്യവും അത്യന്താപേക്ഷിതമാണ്. ഓസ്റ്റിയോപൊറോസിസ് സാധ്യത കുറയ്ക്കുകയും ആരോഗ്യകരമായ പല്ലുകള്‍ പ്രോത്സാഹിപ്പിക്കുകയും ചെയ്യുന്നത് കുതിര്‍ത്ത ബദാമിന്റെ ആരോഗ്യ ഗുണങ്ങളാണ്.

രക്തത്തിലെ പഞ്ചസാരയുടെ അളവ് നിയന്ത്രിക്കുന്നു

പ്രമേഹരോഗികള്‍ക്കും ഇന്‍സുലിന്‍ പ്രതിരോധശേഷിയുള്ളവര്‍ക്കും ബദാം ഒരു അത്ഭുതമാണ്. ഗ്ലൈസെമിക് സൂചിക കുറഞ്ഞ ഭക്ഷണങ്ങളും ഉയര്‍ന്ന മഗ്‌നീഷ്യം അളവും അവയില്‍ അടങ്ങിയിരിക്കുന്നതിനാല്‍, പ്രമേഹരോഗികള്‍ക്ക് ബദാം ഒരു മികച്ച തിരഞ്ഞെടുപ്പാണ്.

ദഹനവും കുടലിന്റെ ആരോഗ്യവും മെച്ചപ്പെടുത്തുന്നു

കുതിര്‍ത്ത ബദാം പ്രീബയോട്ടിക് ആണ്. അതായത് അവ വയറ്റിലെ നല്ല ബാക്ടീരിയകള്‍ക്ക് പ്രകൃതിദത്ത ഭക്ഷണ സ്രോതസ്സാണ്. വയറ്റിലെ അസ്വസ്ഥതയോ ദഹനക്കേടോ അനുഭവപ്പെടുകയാണെങ്കില്‍ ഭക്ഷണത്തിന് മുന്‍പ് ബദാം കുതിര്‍ത്തത് കഴിക്കുന്നത് ദഹനവ്യവസ്ഥയെ സഹായിക്കും.

വേവിച്ച ചിക്കന്‍ എത്ര ദിവസം കേടുകൂടാതെ ഫ്രിഡ്ജില്‍ സൂക്ഷിക്കാം

രോഗ പ്രതിരോധശേഷി വര്‍ദ്ധിപ്പിക്കുന്നു

ഉയര്‍ന്ന അളവിലുള്ള ആന്റിഓക്സിഡന്റ് ഉള്ളടക്കമായ വിറ്റാമിന്‍ ഇ, സിങ്ക് എന്നിവയാല്‍ കുതിര്‍ത്ത ബദാം ഒരു വ്യക്തിയുടെ രോഗപ്രതിരോധ ശേഷി വര്‍ദ്ധിപ്പിക്കുന്നു. അവ ആവര്‍ത്തിച്ചുള്ള അണുബാധകളെ തടയുകയും വൈറസുകള്‍ക്കെതിരെ ശരീരത്തിന്റെ പ്രതിരോധശേഷി വര്‍ദ്ധിപ്പിക്കുകയും പൊതുവായ ശാരീരിക ക്ഷേമം വര്‍ദ്ധിപ്പിക്കുകയും ചെയ്യുന്നു.

Content Highlights :Those who want to lose weight will benefit greatly from including almonds in their snacks.