നടി അനശ്വര രാജനും ചേച്ചി ഐശ്വര്യ രാജനും തമ്മിലുള്ള ആത്മബന്ധം പലപ്പോഴും സമൂഹമാധ്യമങ്ങളില് ശ്രദ്ധ നേടാറുണ്ട്.
ഇപ്പോഴിതാ അനശ്വര തന്റെ ജീവിതത്തില് എത്രത്തോളം നിർണായകമായിരുന്നുവെന്ന് തുറന്നുപറഞ്ഞിരിക്കുകയാണ് ഐശ്വര്യ. അനശ്വര ഇല്ലായിരുന്നെങ്കില് താൻ മനസിലാക്കാൻ പോലും കഴിയാത്ത പ്രായത്തില് വിവാഹിതയായേനെയെന്നും തന്റെ ജീവിതം അവിടെത്തന്നെ കുടുങ്ങിപ്പോകുമായിരുന്നുവെന്നും ഐശ്വര്യ പറയുന്നു.
ഓസ്ട്രേലിയയില് നിന്നുള്ള സെല്ഫി വീഡിയോയിലൂടെയാണ് ഐശ്വര്യ മനസുതുറന്നത്. 'അനശ്വര രാജന്റെ സഹോദരി' എന്ന വിളിപ്പേരില് തനിക്ക് യാതൊരു തരത്തിലുള്ള അപകർഷതയോ വ്യക്തിത്വപ്രതിസന്ധിയോ ഇല്ലെന്നും, മറിച്ച് ആ വിശേഷണം ഏറെ സന്തോഷത്തോടെയാണ് സ്വീകരിക്കുന്നതെന്നും ഐശ്വര്യ പറഞ്ഞു.
'അനശ്വര എന്റെ ജീവിതത്തില് ഇല്ലായിരുന്നെങ്കില്, ഇന്ന് നിങ്ങള് എന്റെ വാക്കുകള് കേള്ക്കാൻ ഇവിടെ ഉണ്ടായിരിക്കണമെന്നില്ല. ഞാനുമൊരുപക്ഷേ ഇതെല്ലാം പറയാൻ ഇവിടെ ഉണ്ടാകുമായിരുന്നില്ല,' എന്നാണ് ഐശ്വര്യ പറഞ്ഞത്.
തുടർന്നാണ് അനസ്വര തന്നെ എങ്ങനെ ഒരു വലിയ തീരുമാനത്തില് നിന്ന് രക്ഷിച്ചുവെന്ന് ഐശ്വര്യ വെളിപ്പെടുത്തിയത്. വിവാഹം എന്താണെന്ന് പോലും മനസിലാകാത്ത പ്രായത്തില് വിവാഹം കഴിക്കാൻ തീരുമാനിച്ചിരുന്നുവെന്നും അന്ന് അനശ്വര ഇടപെട്ടില്ലായിരുന്നെങ്കില് തന്റെ ജീവിതം മറ്റൊരു വഴിയിലേക്ക് പോയേനെയെന്നും അവർ പറഞ്ഞു.
വിവാഹത്തിന് എതിരല്ല താനെന്നും എന്നാല് എന്താണ് വിവാഹമെന്ന് മനസിലാക്കിയതിന് ശേഷമാണ് ഒരാള് അതിലേക്ക് കടക്കേണ്ടതെന്നും ഐശ്വര്യ വ്യക്തമാക്കി. 'അന്ന് അങ്ങനെ സംഭവിച്ചിരുന്നെങ്കില് ഇന്ന് ഞാൻ നിരന്തരമായ നടുവേദനയുമായി ഒരു കുഞ്ഞിനെ വളർത്തുന്ന അവസ്ഥയിലായേനെ,' എന്നും അവർ പറഞ്ഞു.
ജീവിതത്തിന്റെ പല ഘട്ടങ്ങളിലും തന്നെ രക്ഷിച്ചത് അനസ്വരയാണെന്നും അതുകൊണ്ടുതന്നെ അനശ്വരയുടെ സഹോദരിയെന്ന വിശേഷണം തനിക്ക് ഏറെ അഭിമാനമുള്ളതാണെന്നും ഐശ്വര്യ കൂട്ടിച്ചേർത്തു. അടുത്തിടെ തങ്ങളുടെ കുടുംബവുമായി ബന്ധപ്പെട്ട ഒരു സോഷ്യല് മീഡിയ പോസ്റ്റിന് താഴെ 'എന്റെ സഹോദരി' എന്ന് ഐശ്വര്യ കുറിച്ചതും ശ്രദ്ധ നേടിയിരുന്നു.
സാമ്പത്തികമായി സ്വന്തം കാലില് നില്ക്കുന്ന ഒരാള്ക്ക് പ്രിയപ്പെട്ടവരോട് ഇഷ്ടമുള്ളത് വാങ്ങിക്കൊടുക്കാൻ സിനിമയില് അഭിനയിക്കേണ്ട ആവശ്യമില്ലെന്നും ഐശ്വര്യ പറഞ്ഞു. എന്നാല് അത്തരത്തില് ചിന്തിച്ച് സഹോദരിയോട് കാര്യങ്ങള് പറയുന്നവർ എത്രപേരുണ്ടാകുമെന്ന ചോദ്യവും അവർ ഉന്നയിച്ചു.
ഒമാനില് പോയപ്പോള് മാളിലെത്തിയ സമയത്ത് 'അച്ചു, നിനക്ക് ഇഷ്ടമുള്ളതെല്ലാം വാങ്ങിക്കോളൂ, അതിനാണ് നമ്മള് വന്നത്' എന്ന് അനശ്വര തന്നോട് പറഞ്ഞ അനുഭവവും ഐശ്വര്യ പങ്കുവച്ചു. ഇത്തരമൊരു വാക്ക് തന്നോട് ആദ്യമായി പറഞ്ഞത് അനസ്വരയാണെന്നും അതില് തനിക്ക് ഏറെ സന്തോഷമുണ്ടെന്നും അവർ പറഞ്ഞു.
വീഡിയോയുടെ കുറിപ്പിലും സഹോദരിയോടുള്ള സ്നേഹം ഐശ്വര്യ തുറന്നുകാട്ടി. 'മൂത്ത സഹോദരിമാർക്ക് അസൂയയാണെന്ന് ആളുകള് കരുതിയേക്കാം. എന്നാല് യാഥാർഥ്യം ഞങ്ങള്ക്ക് മാത്രമേ അറിയൂ; ഞങ്ങളുടെ ലോകം മുഴുവൻ അവരെ ചുറ്റിപ്പറ്റിയാണ്,' എന്നായിരുന്നു കുറിപ്പ്. വീഡിയോയ്ക്ക് താഴെ അനസ്വര കണ്ണുനിറഞ്ഞ മുഖത്തിന്റെ ഇമോജിയിലൂടെയാണ് പ്രതികരിച്ചത്.
'ഉദാഹരണം സുജാത', 'തണ്ണീർമത്തൻ ദിനങ്ങള്', 'സൂപ്പർ ശരണ്യ', 'പ്രണയ വിലാസം', 'നേര്', 'അബ്രഹാം ഓസ്ലർ', 'ഗുരുവായൂർ അമ്പലനടയില്', 'രേഖാചിത്രം', 'പൈങ്കിളി' തുടങ്ങിയ ചിത്രങ്ങളിലൂടെ മലയാളികളുടെ പ്രിയ താരമായി മാറിയ നടിയാണ് അനസ്വര രാജൻ. 'വ്യാസന സമേതം ബന്ധുമിത്രാദികള്', 'വിത്ത് ലവ്' എന്നിവയാണ് താരത്തിന്റെ പുതിയ ചിത്രങ്ങള്.