अफगाणिस्तानातील क्षयरोग विरोधातील बाललसीकरण कार्यक्रमाला भारताकडून मदत

भारताने मंगळवार, १४ एप्रिल रोजी अफगाणिस्तानातील क्षयरोग (टीबी) विरोधातील बाललसीकरण कार्यक्रमाला मदत म्हणून १३ टन बीसीजी (बॅसिलस कॅलमेट-ग्युरिन) लस आणि संबंधित साहित्य पाठवले आहे.

परराष्ट्र मंत्रालयाचे (MEA) प्रवक्ते रणधीर जायसवाल यांनी एक्सवरील पोस्टमध्ये सांगितले की, 'भारताने अफगाणिस्तानच्या आरोग्य मंत्रालयाला १३ टन बीसीजी लस आणि त्यासोबतचे साहित्य पाठवले आहे, ज्यामुळे तेथील टीबीविरोधी लसीकरण मोहिमेला बळ मिळेल.'

बीसीजी लस ही फ्रीज-ड्राइड (लायोफिलाइज्ड) पांढऱ्या पावडरच्या स्वरूपात असते, जी वापरण्यापूर्वी द्रव (डायल्यूएंट) मिसळून तयार केली जाते. ही लस १० ते २० डोस असलेल्या व्हायल्समध्ये पॅक केली जाते. यासाठी ट्यूबरक्युलिन सिरिंज/26G सुई लागते आणि ही लस २ ते ८ अंश सेल्सिअस तापमानात साठवली जाते.

भारताने यापूर्वीही अफगाणिस्तानला अनेक वेळा मदतीचा हात दिला आहे. अलीकडेच आलेल्या पूर आणि भूकंपामुळे अफगाणिस्तानातील जनतेला मोठ्या अडचणींचा सामना करावा लागला होता. त्यावेळीही भारताने ५ एप्रिल रोजी मानवीय मदत आणि आपत्ती निवारण साहित्य (HADR) पाठवले होते. जायसवाल यांनी त्या वेळीही अफगाण जनतेप्रती भारताची एकजूट आणि मदतीची बांधिलकी व्यक्त केली होती. त्यांनी सांगितले की, 'पूर आणि भूकंपाच्या पार्श्वभूमीवर भारताने किचन सेट, स्वच्छता किट, प्लास्टिक शीट, स्लीपिंग बॅग आदी साहित्य पाठवले आहे. भारत या कठीण काळात अफगाणिस्तानच्या जनतेसोबत ठामपणे उभा आहे.'