संरक्षण, तंत्रज्ञान आणि कृषी क्षेत्रात मोठे करार
भारत आणि व्हिएतनाम यांनी आपल्या द्विपक्षीय संबंधांना आणखी मजबूत करण्याचा मोठा निर्णय घेतला आहे. दोन्ही देशांनी २०३० पर्यंत परस्पर व्यापार २५ अब्ज डॉलरपर्यंत नेण्याचे लक्ष्य निश्चित केले आहे.
नवी दिल्लीत झालेल्या उच्चस्तरीय बैठकीत पंतप्रधान नरेंद्र मोदी आणि व्हिएतनामचे राष्ट्राध्यक्ष तो लाम यांच्यात विविध महत्त्वाच्या विषयांवर चर्चा झाली. या बैठकीनंतर व्यापार, संरक्षण, तंत्रज्ञान, कृषी आणि डिजिटल व्यवहार क्षेत्रात सहकार्य वाढवण्यावर दोन्ही देशांनी सहमती दर्शवली.
सध्या भारत आणि व्हिएतनाममधील व्यापार जवळपास १६ अब्ज डॉलरच्या आसपास आहे. गेल्या काही वर्षांत दोन्ही देशांतील आर्थिक संबंध वेगाने वाढले आहेत. आता हा व्यापार आणखी वाढवण्यासाठी दोन्ही देशांनी विशेष योजना तयार करण्याचा निर्णय घेतला आहे. बैठकीदरम्यान एकूण १३ महत्त्वाचे करार करण्यात आले. या करारांमुळे औषधनिर्मिती, ऊर्जा, सेमीकंडक्टर, दुर्मिळ खनिजे आणि डिजिटल पेमेंट क्षेत्रात नवी संधी निर्माण होणार आहेत.
गोव्यात बागा-कलंगुट किनाऱ्यावर १७ अतिक्रमणे जमीनदोस्त
भारताच्या निर्यातीचा नवा विक्रम; ८६३ अब्ज डॉलरचा ऐतिहासिक टप्पा पार
सायबर गुन्ह्यांसाठी भारतीयांची तस्करी प्रकरणी नऊ ठिकाणी छापे
पंतप्रधान नरेंद्र मोदी यांनी व्हिएतनामला भारताच्या 'ॲक्ट ईस्ट' धोरणातील महत्त्वाचा मित्रदेश असल्याचे सांगितले. त्यांनी दोन्ही देशांमधील सहकार्यामुळे इंडो-पॅसिफिक क्षेत्रात आर्थिक स्थिरता आणि व्यापाराला बळ मिळेल, असेही स्पष्ट केले. विशेष म्हणजे भारताची यूपीआय डिजिटल पेमेंट प्रणाली आणि व्हिएतनामची पेमेंट व्यवस्था एकमेकांशी जोडण्याचा निर्णय घेण्यात आला आहे. त्यामुळे दोन्ही देशांतील व्यापारी व्यवहार अधिक वेगवान आणि सुलभ होण्याची शक्यता आहे.
संरक्षण क्षेत्रातही भारत आणि व्हिएतनाम अधिक जवळ आले आहेत. सागरी सुरक्षा, नौदल सहकार्य आणि अत्याधुनिक तंत्रज्ञानाच्या देवाणघेवाणीवर भर दिला जाणार आहे. दक्षिण चीन समुद्रातील वाढत्या तणावाच्या पार्श्वभूमीवर दोन्ही देशांनी मुक्त नौवहन आणि सुरक्षित समुद्री मार्गांसाठी एकत्र काम करण्याचा निर्धार व्यक्त केला आहे.
कृषी क्षेत्रातही मोठे बदल होणार आहेत. भारतीय द्राक्षे आणि डाळिंब व्हिएतनाममध्ये निर्यात केली जाणार आहेत, तर व्हिएतनाममधील ड्युरियन आणि पामेलो ही फळे भारतीय बाजारात उपलब्ध होण्याचा मार्ग मोकळा होणार आहे. यामुळे शेतकरी आणि व्यापाऱ्यांना नवीन बाजारपेठ उपलब्ध होणार आहे.
याशिवाय औषधनिर्मिती क्षेत्रातील सहकार्यामुळे भारतीय औषध कंपन्यांना व्हिएतनाममध्ये मोठ्या प्रमाणात व्यवसायाच्या संधी मिळतील. सेमीकंडक्टर आणि दुर्मिळ खनिज क्षेत्रातील भागीदारीमुळे चीनवरील अवलंबित्व कमी करण्यासाठी दोन्ही देश प्रयत्नशील असल्याचेही या बैठकीत स्पष्ट झाले.
भारत आणि व्हिएतनाम यांच्यातील वाढते संबंध केवळ व्यापारापुरते मर्यादित नसून सामरिक आणि तांत्रिक क्षेत्रातही दोन्ही देश आता अधिक मजबूत भागीदार बनत असल्याचे या निर्णयातून दिसून आले आहे.