सीबीआयच्या तपासात धक्कादायक खुलासे

देशातील लाखो विद्यार्थ्यांच्या भवितव्याशी जोडलेल्या 'नीट' परीक्षेभोवती पुन्हा एकदा संशयाचे सावट गडद झाले आहे. नाशिकपासून हरियाणापर्यंत पसरलेल्या कथित पेपरफुटी प्रकरणामुळे शिक्षण व्यवस्थेवर गंभीर प्रश्नचिन्ह निर्माण झाले असून, केंद्रीय अन्वेषण विभाग अर्थात सीबीआयच्या तपासात धक्कादायक धागेदोरे समोर येत आहेत.

प्राथमिक माहितीनुसार, प्रश्नपत्रिका गळतीचा पहिला दुवा नाशिकमधून समोर आल्याने तपास यंत्रणांनी महाराष्ट्रासह अनेक राज्यांमध्ये चौकशीची व्याप्ती वाढवली आहे. दरम्यान या प्रकरणी पेपरफुटी प्रकरणात नाशिकमधून (Nashik) ३० वर्षीय शुभम खैरनारला (Shubham Khairnar) ताब्यात घेतल्याने मोठी खळबळ उडाली आहे. या प्रकरणात शुभमवर गंभीर आरोप ठेवण्यात आले आहेत.

तपासात समोर आलेल्या माहितीनुसार, परीक्षा सुरू होण्यापूर्वीच काही विद्यार्थ्यांपर्यंत प्रश्नपत्रिका पोहोचवण्यात आली होती. यासाठी मध्यस्थ, एजंट आणि काही कोचिंग नेटवर्कच्या माध्यमातून संघटित पद्धतीने व्यवहार झाल्याचा संशय आहे. लाखो रुपयांच्या बदल्यात विद्यार्थ्यांना प्रश्नपत्रिका उपलब्ध करून देण्यात आल्याची माहिती तपास यंत्रणांच्या हाती लागली आहे. या व्यवहारासाठी सोशल मीडिया, एन्क्रिप्टेड मेसेजिंग अॅप्स आणि डिजिटल माध्यमांचा वापर झाल्याचाही संशय व्यक्त केला जात आहे.

शेअर बाजारात हाहाकार! सेन्सेक्स-निफ्टीची मोठी घसरण

अमेरिका-इराण तणावामुळे कच्च्या तेलाच्या किमतीत उसळी

पेपर लीक प्रकरणानंतर NEET-UG 2026 परीक्षा रद्द

सीबीआयने नाशिकमध्ये काही ठिकाणी छापे टाकून महत्त्वाचे डिजिटल पुरावे जप्त केले आहेत. मोबाईल फोन, लॅपटॉप आणि इतर इलेक्ट्रॉनिक उपकरणांची फॉरेन्सिक तपासणी सुरू असून, संशयितांचे हरियाणातील आरोपींशी संपर्क असल्याचेही समोर येत आहे. या संपूर्ण रॅकेटमागे मोठे आर्थिक जाळे कार्यरत असल्याची शक्यता तपास यंत्रणा व्यक्त करत आहे.

या प्रकरणामुळे देशभरातील विद्यार्थ्यांमध्ये संताप आणि अस्वस्थता निर्माण झाली आहे. वर्षानुवर्षे मेहनत करून परीक्षा देणाऱ्या विद्यार्थ्यांच्या न्याय्य स्पर्धेवरच या प्रकारामुळे प्रश्न उपस्थित झाले आहेत. पालकांकडूनही संतप्त प्रतिक्रिया उमटत असून, स्पर्धा परीक्षांच्या सुरक्षेबाबत कठोर धोरण राबवण्याची मागणी जोर धरू लागली आहे.