ही माहिती आयएएस अधिकारी अश्विनी भिडे यांनी सोशल मीडियावर शेअर केली आहे.

'ओरिजिन बायो' ही कंपनी सेल आणि जीन थेरपी अधिक सुरक्षित व प्रभावी करण्यासाठी कृत्रिम बुद्धिमत्ता (AI) तंत्रज्ञानाचा वापर करते. या स्टार्टअपची स्थापना अश्विनी भिडे यांचा मुलगा मल्हार आणि यश राठोड यांनी केली असून, आरोग्य क्षेत्रात विशेषतः कर्करोग उपचारांमध्ये नवे पर्याय उपलब्ध करून देण्याचा त्यांचा प्रयत्न आहे. सीईओ राऊंडटेबलमध्ये मल्हार यांनी थेट पंतप्रधान नरेंद्र मोदी यांच्याशी संवाद साधत कंपनीच्या संशोधनाची आणि तंत्रज्ञानाची सविस्तर माहिती दिली.

भारत-ब्राझील व्यापार डॉलर नाही तर स्थानिक चलनात शक्य

आरोग्य योजनेंतर्गत बनावट कागदपत्रांद्वारे फसवणूक; सात जणांच्या टोळीला अटक

सेल आणि जीन थेरपी या आधुनिक उपचारपद्धती मानल्या जातात. या तंत्रज्ञानाद्वारे रुग्णाच्या पेशींमध्ये बदल करून गंभीर आजारांवर उपचार करण्याचा प्रयत्न केला जातो. मात्र, या उपचारांमध्ये सुरक्षितता, अचूकता आणि दीर्घकालीन परिणामकारकता यांसारखी आव्हाने आहेत. 'ओरिजिन बायो'चे एआय-आधारित प्लॅटफॉर्म या प्रक्रियेला अधिक सुरक्षित बनवण्यास मदत करू शकते, असा दावा कंपनीकडून करण्यात आला आहे.

सीईओ राऊंडटेबलमध्ये देशातील विविध क्षेत्रांतील नाविन्यपूर्ण स्टार्टअप्सना आपले संशोधन आणि कल्पना मांडण्याची संधी देण्यात आली. भारताला 'हेल्दी इंडिया'च्या दिशेने नेण्यासाठी अत्याधुनिक वैद्यकीय तंत्रज्ञानाची गरज असल्याचे अधोरेखित करत, कर्करोगासारख्या गंभीर आजारांवर स्वदेशी उपाय विकसित करण्यावर भर देण्यात आला.

मल्हार यांनी पंतप्रधानांसमोर कंपनीच्या तंत्रज्ञानामुळे भविष्यात कर्करोग उपचार अधिक अचूक, वैयक्तिक आणि सुरक्षित होऊ शकतात, असे स्पष्ट केले. यामुळे उपचारांचा खर्च कमी होण्यास आणि अधिक रुग्णांपर्यंत प्रगत उपचार पोहोचण्यास मदत होऊ शकते.

पंतप्रधान कार्यालयात झालेल्या या बैठकीमुळे भारतीय स्टार्टअप इकोसिस्टमला नवी ऊर्जा मिळाल्याचे मानले जात आहे. 'ओरिजिन बायो'सारख्या स्टार्टअप्सना मिळणारे हे व्यासपीठ भारतातील आरोग्य क्षेत्रात मोठा बदल घडवू शकते. कृत्रिम बुद्धिमत्ता आणि जैवतंत्रज्ञान यांचा संगम साधत देश कर्करोग उपचारांच्या नव्या युगाकडे वाटचाल करत असल्याचे या घडामोडींमधून स्पष्ट होते.