राज ठाकरे यांनी पंतप्रधान नरेंद्र मोदी आणि उद्योगपती गौतम अदानी यांच्या संबंधांवर आधारित 'द फ्रेंडशिप फाइल्स' या डॉक्युमेंट्रीची लिंक समाजमाध्यमांवर शेअर करत ही डॉक्युमेंट्री सरकारकडून सोशल मीडियावरून हटवली जाऊ शकते, असा दावा करत राज ठाकरे यांनी ती गायब होण्याआधी पाहून घेण्याचे आवाहन केले.

आमदार अतुल भातखळकर यांनी राज ठाकरेंच्या जुन्या भूमिकेची आठवण करून देत त्यांना लक्ष्य केले. 'मनसेचे अध्यक्ष राज ठाकरे यांना सोशल मीडियावरील व्हिडिओ पाहून बरेच प्रश्न पडतायत. २०११ मध्ये त्यांनी गुजरातचा दौरा केला होता. तत्कालीन मुख्यमंत्री नरेंद्र मोदी यांची भेट घेतली होती. तेव्हा त्यांनी नरेंद्र मोदींवर कौतुकाचा वर्षाव केला होता. हे सगळे प्रश्न त्यावेळी सुचले नव्हते?' असा सवाल त्यांनी केला.

इतकेच नव्हे, तर अलीकडेच उद्योगपती गौतम अदानी हे ठाकरे यांच्या घरी आले होते, याची आठवणही भातखळकर यांनी करून दिली. 'अलीकडेच गौतम अदानी ठाकरेंच्या घरी आले होते. त्यावेळी तरी या प्रश्नांची उत्तरे विचारून घ्यायची. एवढ्या कोलांट्या तर शरद पवार यांनीसुद्धा मारल्या नव्हत्या,' अशा शब्दांत त्यांनी राज ठाकरेंना टोला लगावला. राज ठाकरेंच्या भूमिकेतील बदलावर बोट ठेवत अतुल भातखळकर यांनी ही टीका केली.