ऐन सणासुदीच्या पार्श्वभूमीवर सोन्या-चांदीच्या दरात वाढ झाल्याने गुंतवणूकदारांना दिलासा मिळाला असला, तरी ग्राहकांच्या खिशावर मात्र अतिरिक्त भार पडण्याची शक्यता आहे.

देशांतर्गत वायदे बाजारात एमसीएक्सवर ऑक्टोबर सोन्याचा वायदा ०.३४ टक्क्यांनी वाढून सुमारे १,५९,९६५ रुपये प्रति १० ग्रॅमवर पोहोचला. तर सप्टेंबर चांदीच्या वायद्यात ०.७४ टक्क्यांची वाढ नोंदवली गेली आणि चांदीचा भाव सुमारे २,४५,०७५ रुपये प्रति किलोवर व्यवहार करत होता. त्यामुळे आठवड्याच्या अखेरीस दोन्ही मौल्यवान धातूंमध्ये पुन्हा तेजीचा माहोल निर्माण झाला आहे.

'हिंदू-मुस्लिम मानसिकतेतून बाहेर या'

'वंदे मातरम्'च्या पहिल्या दोन कडव्यांवरच थांबा!

साखरेच्या दरांना लगाम! केंद्राचा मोठा निर्णय

सोन्याच्या दरवाढीमागे अमेरिकेतील घडामोडींचा मोठा प्रभाव आहे. अमेरिकी डॉलर निर्देशांकात सुमारे ०.२० टक्क्यांची घसरण झाल्याने डॉलरमध्ये किंमत ठरवली जाणाऱ्या सोन्याला आधार मिळाला. त्याचवेळी अमेरिकेच्या ट्रेझरी विभागाने दीर्घ मुदतीच्या कर्जरोख्यांच्या बायबॅकचे प्रमाण वाढवण्याची घोषणा केली आहे. या निर्णयामुळे अमेरिकन रोख्यांच्या परताव्यावर दबाव निर्माण होण्याची शक्यता असून त्याचा परिणाम सोन्याच्या मागणीवर सकारात्मक झाला आहे.

जागतिक बाजारातील अनिश्चिततेमुळेही गुंतवणूकदार सुरक्षित गुंतवणुकीचा पर्याय म्हणून सोन्याकडे वळत आहेत. अमेरिका आणि इराणमधील तणाव कायम असून पश्चिम आशियातील संघर्षामुळे जागतिक बाजारात अस्थिरता वाढली आहे. अशा परिस्थितीत जोखीम असलेल्या मालमत्तेऐवजी सोने आणि चांदीसारख्या सुरक्षित गुंतवणुकीकडे गुंतवणूकदारांचा कल वाढतो. मागील सत्रात ट्रेझरी यील्डमध्ये झालेली घटदेखील सोन्या-चांदीच्या दरांसाठी अनुकूल ठरली.

मात्र अमेरिकन फेडरल रिझर्व्हच्या जुलै बैठकीच्या मिनिट्समधून व्याजदराच्या धोरणाबाबत तुलनेने कठोर भूमिका समोर आली आहे. त्यामुळे पुढील काळात व्याजदर आणि डॉलरची दिशा सोन्या-चांदीच्या बाजारासाठी महत्त्वाची ठरणार आहे. सध्या जागतिक आर्थिक अनिश्चितता, अमेरिका-इराण तणाव, डॉलरमधील कमजोरी आणि स्पॉट मार्केटमधील मागणी या सर्व घटकांमुळे मौल्यवान धातूंच्या किमतींना आधार मिळत आहे.

सणासुदीचा हंगाम जवळ आल्याने भारतातील सोन्या-चांदीच्या मागणीत वाढ होण्याची शक्यता आहे. त्यामुळे आंतरराष्ट्रीय बाजारातील संकेत आणि देशांतर्गत मागणी यांचा दुहेरी परिणाम दरांवर होऊ शकतो. मात्र भाव विक्रमी पातळीवर असल्याने प्रत्यक्ष दागिने खरेदी करणाऱ्या ग्राहकांसाठी वाढलेले दर आव्हान ठरणार आहेत. आगामी काळात अमेरिकी फेडचे व्याजदरविषयक निर्णय, डॉलरची हालचाल आणि पश्चिम आशियातील परिस्थिती याकडे सोन्या-चांदीच्या बाजाराचे लक्ष राहणार आहे.