एका महिन्यात १,००० हून अधिक व्यवहार
अमेरिकेचे राष्ट्राध्यक्ष डोनाल्ड ट्रम्प यांच्या शेअर बाजारातील मोठ्या प्रमाणावरील व्यवहारांचा खुलासा झाल्यानंतर अमेरिकेच्या राजकीय आणि आर्थिक वर्तुळात चर्चेला उधाण आले आहे.
सरकारी आर्थिक खुलाशानुसार, ट्रम्प यांच्या गुंतवणूक खात्यांमधून जून महिन्यात तब्बल १,००० हून अधिक शेअर व्यवहार करण्यात आले. या व्यवहारांची अंदाजे एकूण किंमत ७८.१ दशलक्ष ते २६३.१ दशलक्ष डॉलर इतकी असल्याचे समोर आले आहे. अमेरिकेच्या नियमांनुसार व्यवहारांची अचूक रक्कम न सांगता ती विशिष्ट श्रेणीमध्ये जाहीर केली जाते.
ट्रम्प यांच्या पोर्टफोलिओमध्ये बर्कशायर हॅथवे, व्हिसा, मास्टरकार्ड, कॉइनबेस, होम डेपो आणि पालांटिर यांसारख्या मोठ्या कंपन्यांच्या समभागांचा समावेश असल्याचे दिसून आले आहे. विशेषतः पालांटिरच्या शेअर्समध्ये खरेदी-विक्रीची मोठी उलाढाल झाली. ३ जून रोजी पालांटिरचे शेअर खरेदी करण्यात आले. त्यानंतर १६ आणि १८ जून रोजी त्यातील मोठ्या प्रमाणावर विक्री झाली, तर २३ आणि २४ जून रोजी पुन्हा या कंपनीचे शेअर खरेदी करण्यात आले. त्यामुळे ट्रम्प यांच्या गुंतवणुकीत सातत्याने बदल होत असल्याचे स्पष्ट झाले आहे.
गर्भवती सरकारी अधिकारी महिलेचा संशयास्पद मृत्यू; सासरच्या मंडळींवर छळाचा आरोप
आरक्षणाच्या मागणीवरून व्यवस्था संपणार नाही; चिराग पासवानांची भूमिका
हातात तिरंगा…अंतराळ.. १४० कोटी देशवासियांचे स्वप्न हा आपला संकल्प
बर्कशायर हॅथवेच्या शेअर्समध्येही १८ जून रोजी १० लाख ते ५० लाख डॉलरची गुंतवणूक करण्यात आली. याशिवाय मेटा, व्हिसा, मास्टरकार्ड, कॉइनबेस आणि होम डेपो यांसारख्या कंपन्यांमध्येही मोठे व्यवहार झाले. ट्रम्प यांच्या गुंतवणूक पोर्टफोलिओची ही सक्रियता याआधीही चर्चेत आली आहे. २०२५ मध्ये त्यांच्या खात्यांमधून २१ हजारांहून अधिक सिक्युरिटीज व्यवहार झाल्याचे आर्थिक खुलाशातून समोर आले होते.
राष्ट्राध्यक्षपदासारख्या प्रभावशाली पदावर असताना सरकारी निर्णयांचा परिणाम होऊ शकणाऱ्या कंपन्यांमध्ये मोठ्या प्रमाणावर गुंतवणूक होत असल्याने हितसंबंधांच्या संघर्षाचा मुद्दा पुन्हा ऐरणीवर आला आहे. विरोधकांकडून या व्यवहारांच्या वेळेबाबत आणि पारदर्शकतेबाबत प्रश्न उपस्थित केले जात आहेत.
मात्र, व्हाइट हाऊसने हे आरोप फेटाळले आहेत. ट्रम्प यांच्या गुंतवणुकीचे व्यवस्थापन स्वतंत्र गुंतवणूक व्यवस्थापकांकडून केले जाते आणि कोणते शेअर कधी खरेदी किंवा विक्री करायचे याचा थेट निर्णय ट्रम्प किंवा त्यांच्या कुटुंबीयांकडून घेतला जात नसल्याचा प्रशासनाचा दावा आहे. त्यामुळे ट्रम्प यांच्या प्रचंड शेअर व्यवहारांमुळे अमेरिकेतील राजकारण आणि बाजारपेठेतील संबंधांवर नव्याने चर्चा सुरू झाली आहे.