मुंबई : बदलापूरच्या एका शाळेतील दोन अल्पवयीन मुलींवर अत्याचार करणारा आरोपी अक्षय शिंदेचा पोलिसांनी एन्काउंटर केला. या प्रकरणाचे वेगवेगळे पडसाद उमटत आहे. मृत आरोपी अक्षय शिंदे याच्या वडिलांनी आता मुंबई उच्च न्यायालयात धाव घेतली आहे.
पोलिस या प्रकरणातील पुरावे नष्ट करतील असा संशय देखील त्यांनी व्यक्त केला आहे. त्यामुळे या प्रकरणाचा तपास विशेष तपास पथकाकडे सोपवण्यात यावा अशी मागणी त्यांनी केली आहे. तातडीने या प्रकरणावर सुनावणी घेण्यात यावी, अशी विनंती त्यांनी केली आहे. उच्च न्यायालयाने हे प्रकरण आज सुनावणीसाठी ठेवले आहे.
अक्षय शिंदे याचा एन्काउंटर करणारे वरिष्ठ पोलिस निरीक्षक संजय शिंदे यांनी अक्षय शिंदे याला कारागृहातून नेल्यापासून ते एन्काउंटरपर्यंत काय घडलं हे सांगितले. ते म्हणाले की, ‘सोमवारी साधारण संध्याकाळी साडेपाचच्या सुमारास तळोजा मध्यवर्ती कारागृहातून आरोपी अक्षय शिंदे याचा कायदेशीर ताबा घेतला. आम्ही अक्षयला घेऊन ठाणे येथील कार्यालयात घेऊन जात होतो. तेव्हा माझ्यासोबत सहाय्यक पोलिस निरीक्षक निलेश मोरे, पोलिस हवालदार अभिजीत मोरे, पोलिस हवालदार हरीश तावडे हे तिघे होते. अक्षय शिंदे याला आम्ही ताब्यात घेतल्यानंतर आरोपीला घेऊन जाणारी व्हॅन असल्यामुळे मागे एपीआय निलेश मोरे, हवालदार अभिजीत मोरे आणि हरीश तावडे हे तिघे अक्षय शिंदे या आरोपी सोबत बसले होते आणि मी पुढे ड्रायव्हरच्या सीट येथे बसलो होतो. अचानक शीळ डाऊघर येथे पोलिस व्हॅन आली असता मला सहाय्यक पोलिस निरीक्षक निलेश मोरे यांचा फोन आला आणि त्यांनी मला सांगितले की, ‘अक्षय शिंदे हा जोरात ओरडत आहे. यामुळे मी गाडी थांबवली आणि मागे गाडीत जाऊन बसलो. माझ्या समोरच्या सीटवर सहाय्यक पोलिस निरीक्षक निलेश मोरे, त्यांच्या बाजूला आरोपी अक्षय शिंदे आणि त्यानंतर पोलिस हवालदार अभिजीत मोरे असे तिघे बसले होते. मी अक्षय शिंदेला शांत करण्याचा प्रयत्न केला. मात्र, तो शिवीगाळ करत होता.’
पोलिस व्हॅन मुंबई येथील व्हाय जंक्शन ब्रिजवर आली असताना संध्याकाळी सव्वा सहाच्या सुमारास अक्षय शिंदे याने अचानक सहाय्यक पोलिस निरीक्षक निलेश मोरे यांच्या कमरेला असलेले सरकारी पिस्तूल बळाचा वापर करत हिसकावण्याचा प्रयत्न केला. "मला जाऊ द्या," असे तो म्हणत होता. या झटापटीत निलेश मोरे यांचे पिस्तूल लोड झाले व त्यातील एक राऊंड हा निलेश मोरे यांच्या डाव्या मांडीत घुसल्याने निलेश मोरे खाली पडले.
अक्षय शिंदे याने निलेश मोरे यांचे पिस्टल घेऊन "आता मी एकालाही जिवंत सोडणार नाही," असे रागाने ओरडून बोलू लागला होता. अक्षयने अचानक हवालदार हरीश तावडे यांच्या दिशेने पिस्टल रोखून त्यांना जीवे ठार मारण्याचे उद्देशाने दोन गोळ्या झाडल्या. परंतु आमच्या नशिबाने त्या गोळ्या आम्हाला लागल्या नाहीत. आरोपी अक्षय शिंदे यांचे रौद्ररूप व देहबोली पाहून तो त्याच्याकडे असलेल्या पिस्टलमधून गोळ्या झाडून जीवे मारणार अशी आमची पूर्णपणे खात्री झाली. मी प्रसंगावधान राखून व माझे सहकारी यांचे संरक्षणाकरता माझ्याकडील पिस्टलने एक गोळी अक्षयच्या दिशेने झाडली, असे पोलिस अधिकारी संजय शिंदे यांनी सांगितले.
The post बदलापूर अत्याचार! आरोपी अक्षय शिंदे एन्काउंटर प्रकरणाला नवं वळण… appeared first on पोलीसकाका | POLICEKAKA.