पुणे : पुणे शहरातील अराई टेकडीवर अल्पवयीन मुलींनी नशा केल्याचा आरोप अभिनेते रमेश परदेशी यांनी केला होता. हे आरोप करताना रमेश परदेशी यांनी फेसबुक लाईव्ह केलं, पण हेच फेसबुक लाईव्ह रमेश परदेशी यांच्यासाठी अडचणीचे ठरण्याची शक्यता निर्माण झाली आहे.
अभिनेते रमेश परदेशी यांनी फेसबुक लाईव्ह वरून हा व्हिडिओ शेअर केला होता. यात एक मुलगी नशेत बडबड करत आहे तर दुसरी मुलगी बेशुद्ध पडली आहे, असा दावा रमेश परदेशी यांनी केला. टेकडीवर वॉकसाठी आलेलो असताना आम्हाला या मुली दिसल्या, त्यांना आता हॉस्पिटलमध्ये घेऊन जात आहे, असे रमेश परदेशी यांनी लाईव्हमध्ये सांगितले होते.
रमेश परदेशी यांच्याविरोधात नेहा पुरव यांनी महिला आयोगाकडे तक्रार दाखल केली आहे. तसेच या मुलींनी ड्रग्स घेतले नव्हते, तर पोटात अन्न नसताना बिअर प्यायल्यामुळे नशेत असल्याचे पोलिसांनी आपल्याला सांगितल्याचेही नेहा पुरव म्हणाल्या आहेत. त्या म्हणाल्या, ‘एक महिला म्हणून आणि एका मुलीची आई म्हणून मी या प्रकाराने खूपच अस्वस्थ झाले आहे. पुण्यात दोन मुली नशेच्या अमलाखाली so called संस्कृती रक्षकांना आढळून आल्या. सगळ्यात आधी त्या मुलींनी जे केले ते अत्यंत चूकच आहे, त्या बद्दल त्यांना माफ करताच येणार नाही. पण या मुलींचे वय आणि त्यांची पुढची करिअर, पुढील आयुष्य बघता हा व्हीडिओ viral करणे किती योग्य होते? त्यांचे चेहरे न दाखवता स्वतःच्या समाजसेवेचा डांगोरा पिटता आला नसता का? या प्रकारात मुलींचे फोटो दाखवणे हा गुन्हा आहे. या मुलींच्या पालकांना सांगून आणि या मुलींचे काउन्सल्लिंग करून योग्य मार्ग निवडता आला नसता का?’
‘मी या प्रकारानंतर पुण्याच्या कोथरूड पोलीस स्टेशन मधुन पत्रकार म्हणून माहिती घेतली, तेव्हा या मुली बिअर प्यायला होत्या आणि पोटात अन्न नसल्याने त्यांना नशा आल्याचे पोलिसानी सांगितले. या मुलींनी drugs घेतले नव्हते. पुन्हा सांगते मी मुलींना पाठीशी घालत नाही पण अशा प्रकारे व्हीडिओ viral करण्याला माझा आक्षेप आहे मी महिला आयोगाकडे एक महिला म्हणून तक्रार नोंदवली आहे,’ असे नेहा पुरव यांनी सांगितले.
The post पिट्याभाईला टेकडीवरील मुलींचे फेसबुक लाईव्ह भोवणार? appeared first on पोलीसकाका | POLICEKAKA.