सांगली : एका व्यक्तीने प्राण्याच्या बाबतीत क्रुरतेचा कळसच गाठला आहे. एका माथेफिरुने एका वळू बैलाच्या पाठीवर कुऱ्हाडीने घाव घातला आहे. संतापजनक म्हणजे हा घाव खूपच खोल होता. कुऱ्हाड बैलाच्या पाठीतच खुपसली आहे.
बैल अंगावर कुऱ्हाड घेऊनच जखमी अवस्थेत फिरत होता. सदर घटनेची माहिती मिळाल्यानंतर प्राणिमित्र संघटनेकडून जखमी बैलाला पकडून वर्मी घाव घातलेली कुऱ्हाड तब्बल एक तासाच्या अथक प्रयत्नानंतर काढून टाकली. बैलाच्या बाबतीत अत्यंत क्रूर पद्धतीने घडलेल्या या प्रकाराबाबत प्राणीमित्रांकडून निषेध व्यक्त केला जात आहे. याप्रकरणी संजयनगर पोलिस ठाण्यामध्ये अज्ञात व्यक्तीच्या विरोधात तक्रार दाखल केली आहे. संबंधित व्यक्तीचा शोध घेऊन कडक कारवाईची मागणी देखील ॲनिमल राहत प्राणिमित्र संघटनेकडून करण्यात आली आहे.