बिरेस्तार, ९ जुलयाक जाल्ल्या कार्यकारिणीच्या बसकेंत हो निर्णय जाहीर जालो.

मंडळाचे अध्यक्ष सेराफीन कॉता हांणी दिल्ल्या म्हायती प्रमाण, कोंकणी चळवळ उबी करपाखातीर दत्ता नायक हांणी वर्षानुवर्सां केल्ल्या मोलाच्या वावराचो आदर दवरूनच कार्यकारिणीन हो निर्णय घेतला. कोंकणी चळवळीच्या वाटचालींत तांचें योगदान मोलाचें आसून, हाचेफुडेंय तांचो अनुभव आनी मार्गदर्शन चळवळीक गरजेचें आसल्याचें तांणी सांगलें.

दत्ता नायक हांणी कोंकणी भाशा मंडळाक दिल्ली देणगी परत घेवपाचो निर्णय हो पूर्णपणान तांचो वैयक्तिक निर्णय आसून, मंडळ ताचो आदर करता, अशेंय कॉता हांणी सांगलें. त्या निर्णयाचेर मंडळ कोणतेंच भाष्य करपाक सोदना, अशें तांणी स्पष्ट केलें.

वेगवेगळ्या मुद्यांचेर मतभेद आसप हें लोकशाही प्रक्रियेचो भाग आसलो, तरी मतभेदांचें रुपांतर मनभेदांत जावप योग्य न्हय, अशें सेराफीन कॉता हांणी स्पष्ट केलें. उलट, उगड्या मनान संवाद साधून एकवट घडोवन हाडप होच कोंकणी चळवळीचो बळ आसल्याचें तांणी नमूद केलें.

मंडळाची मोख फुडल्या वाटचालीचेर आसून, कोंकणी भाशेची आनी चळवळीची वाट अधिक बळकट करपाचो प्रयत्न चालू दवरपाचो निर्धार कार्यकारिणीन व्यक्त केलो. दत्ता नायक हांचो हाचेफुडेंय मंडळाच्या वाटचालींत सक्रिय वांगड आसतलो, अशी आस्त कार्यकारिणीन व्यक्त केली.