येत्या ३० सप्टेंबराक कोंकणी भाशा मंडळाक ६४ वर्सां पुराय जातलीं. त्या निमतान २ ऑक्टोबराक जावपी कार्यावळीन हे पुरस्कार विजेत्यांक प्रदान करपाचें मंडळान जाहीर केलां.

ह्या पुरस्कारांत रॉक बारेटो साहित्य पुरस्कार, श्रीधर कामत साहित्य पुरस्कार, रमेश वेळुस्कार साहित्य पुरस्कार, डॉ. मनोहरराय सरदेसाय बालसाहित्य पुरस्कार, रामनाथ मणेरकार अणकार पुरस्कार आनी फा. मोरेन डिसौझा युवा साहित्य पुरस्कार हांचो समावेश आसा.

1 जानेवारी 2024 ते 31 डिसेंबर 2025 ह्या काळांत उजवाडाक आयिल्लीं कथा, कविता, नाटक, तियात्र, कादंबरी, एकांकी, निबंद, संशोधन आनी अणकार ह्या प्रकारांतलीं पुस्तकां पुरस्कारा खातीर पात्र आसतलीं. देवनागरी आनी रोमी लिपयेंत बरयिल्लीं कोंकणी पुस्तकांक अर्ज करपाची सुवात आसा.

लेखक वा प्रकाशकान आपल्या पुस्तकांच्यो चार प्रती सचीव, कोंकणी भाशा मंडळ, कोंकणी भवन, शंकर भांडारी मार्ग, विद्यानगर, घोगळ, मडगांव, गोंय हांगाचेर २८ जुलय २०२६ मेरेन पावोवपाची विनंती मंडळाचे सचीव मंगलदास भट हांणी केल्या.

साहित्य अकादेमी पुरस्कार वा हेर राष्ट्रीय पुरस्कार मेळिल्ल्या साहित्यकारांच्या पुस्तकांचो ह्या पुरस्कारां खातीर विचार जावचो ना. तशेंच, आदीं त्याच साहित्य प्रकारांत कोंकणी भाशा मंडळाचो पुरस्कार मेळिल्ल्या साहित्यकारांच्या पुस्तकांचोय ह्या वेळी विचार जावचो ना, अशें मंगलदास भट हांणी स्पश्ट केलां.

हाच वेळार फेलिस्यू कार्दोझ कोंकणी शिक्षक पुरस्कार (शालेय पांवड्यार), माधवी सरदेसाय शिक्षक पुरस्कार (उच्च माध्यमिक विद्यालय, म्हाविद्यालय आनी विद्यापीठ पांवड्यार), जुझे क्वाद्रूश कार्यकर्तो पुरस्कार, लिगोर फुर्तादो ट्रस्ट पत्रकरिता पुरस्कार, चंद्रकांत केणी स्तंभ लेखन पुरस्कार आनी कोंकणी भाशा मंडळ सेवा पुरस्कार हांका खातीरय शिफारशी मागयल्यात.

ह्या सगळ्या पुरस्कारां खातीर सुचोवपी उमेदवारांची सविस्तर म्हायती शिफारशी वांगडाच धाडपाची विनंती कोंकणी भाशा मंडळान केल्या.