ठाणे महानगरपालिका मुख्यालयातील अरविंद पेंडसे सभागृहात आयोजित विविध विकास प्रकल्पांच्या आढावा बैठकीत राज्याचे परिवहन मंत्री प्रताप सरनाईक यांनी हा विश्वास व्यक्त केला.

या बैठकीला महापालिका आयुक्त सौरभ राव, एमएमआरडीएचे सहआयुक्त आस्तिक कुमार पांडे, अतिरिक्त आयुक्त प्रशांत रोडे, पोलीस उपायुक्त (वाहतूक) पंकज शिरसाट यांच्यासह टीएमसी, एमएमआरडीए, मेट्रो, पीडब्ल्यूडी, जिल्हाधिकारी कार्यालय आणि म्हाडाच्या अनेक वरिष्ठ अधिकाऱ्यांची उपस्थिती होती. विशेष म्हणजे, मार्गाशी संबंधित समस्या मांडण्यासाठी 'जस्टिस फॉर घोडबंदर रोड' या नागरिक संघटनेचे प्रतिनिधी देखील यावेळी हजर होते.

'जस्टिस फॉर घोडबंदर रोड' टीमने मार्गावर भेडसावणाऱ्या अनेक समस्यांचे सादरीकरण केल्यानंतर, मंत्री सरनाईक यांनी तातडीने एमएमआरडीए, टीएमसी, मेट्रो आणि पीडब्ल्यूडीच्या अधिकाऱ्यांकडून चालू कामांचा सद्यस्थिती अहवाल मागवला.

गायमुख घाटाचे काम करताना वाहतूक पोलिसांशी प्रभावी समन्वय साधण्याचे आणि घोडबंदर रोडवरील उड्डाणपुलांची दुरुस्ती व पुनर्बांधणीची कामे एकाच वेळी पूर्ण करण्याचे स्पष्ट निर्देश त्यांनी दिले. तसेच, गायमुख घाटाचे काम पूर्ण झाल्यावर घोडबंदर रोड त्वरित ठाणे महानगरपालिकेकडे हस्तांतरित करण्याची प्रक्रिया जलदगतीने पूर्ण करण्याचे आदेशही त्यांनी दिले आहेत.

या घोषणेमुळे केवळ घोडबंदर रोडवरील प्रवाशांनाच नाही, तर संपूर्ण ठाणे शहराला दिलासा मिळण्याची शक्यता आहे. यासोबतच, नोव्हेंबर अखेर आणि डिसेंबरच्या मध्यापर्यंत वर्तकनगर, माजीवाडा, कासारवडवली, भाईंदर पाडा आणि आनंदनगरसह विविध परिसरातील सामुदायिक सभागृहे, खाड्या आणि बागांचे सुशोभीकरण, उपवनचे दिघे जिमखाना, आनंदीबाई जोशी रुग्णालय, महिला वसतिगृह, प्रशिक्षण आणि प्रशासकीय इमारती, क्रीडा संकुले, ग्रंथालये आणि बाजारपेठ तसेच तलाव पुनर्विकास प्रकल्प अशा अनेक सुरू असलेल्या विकास प्रकल्पांचे उद्घाटन करण्यात येईल, अशी माहितीही मंत्री सरनाईक यांनी दिली.