ਵਿਆਹ ਦੇ ਕੁਝ ਘੰਟਿਆਂ ਪਿੱਛੋਂ ਹੀ ਵਾਪਰ ਗਿਆ ਹਾਦਸਾ

ਹਵਾਈ ਹਾਦਸੇ 'ਚੋਂ ਬਚ ਗਈ ਪਤਨੀ

ਐਟਲਾਂਟਾ (ਜਾਰਜੀਆ, ਅਮਰੀਕਾ): ਅਮਰੀਕਾ ਦੇ ਜਾਰਜੀਆ ਸੂਬੇ ਤੋਂ ਇੱਕ ਬਹੁਤ ਹੀ ਦੁਖਦਾਈ ਅਤੇ ਦਿਲ ਨੂੰ ਝੰਜੋੜ ਦੇਣ ਵਾਲੀ ਘਟਨਾ ਸਾਹਮਣੇ ਆਈ ਹੈ। ਵਿਆਹ ਦੇ ਕੁਝ ਹੀ ਘੰਟਿਆਂ ਬਾਅਦ ਇੱਕ ਹੈਲੀਕਾਪਟਰ ਹਾਦਸੇ ਵਿੱਚ ਭਾਰਤੀ ਮੂਲ ਦੇ ਨੌਜਵਾਨ ਪਾਇਲਟ ਡੇਵ ਫਿਜੀ ਦੀ ਮੌਤ ਹੋ ਗਈ, ਜਦਕਿ ਉਸ ਦੀ ਨਵ-ਵਿਆਹੀ ਪਤਨੀ ਗੰਭੀਰ ਸੱਟਾਂ ਨਾਲ ਬਚ ਗਈ।

ਇਹ ਘਟਨਾ ਉਸ ਵੇਲੇ ਵਾਪਰੀ ਜਦੋਂ ਨਵ-ਵਿਆਹਿਆ ਜੋੜਾ ਆਪਣੇ ਜੀਵਨ ਦੀ ਨਵੀਂ ਸ਼ੁਰੂਆਤ ਕਰਨ ਲਈ ਰਵਾਨਾ ਹੋਇਆ ਸੀ। ਪਰ ਕੁਝ ਹੀ ਪਲਾਂ ਵਿੱਚ ਉਨ੍ਹਾਂ ਦੀਆਂ ਖੁਸ਼ੀਆਂ ਇੱਕ ਭਿਆਨਕ ਹਾਦਸੇ ਵਿੱਚ ਬਦਲ ਗਈਆਂ। 26 ਸਾਲਾ ਡੇਵ ਫਿਜੀ ਅਮਰੀਕਾ ਦੀ ਮਸ਼ਹੂਰ ਹਵਾਈ ਕੰਪਨੀ ਡੈਲਟਾ ਏਅਰਲਾਈਨਜ਼ ਵਿੱਚ ਪਾਇਲਟ ਵਜੋਂ ਕੰਮ ਕਰਦਾ ਸੀ। ਉਸ ਦਾ ਪਰਿਵਾਰ ਮੂਲ ਰੂਪ ਵਿੱਚ ਭਾਰਤ ਦੇ ਕੇਰਲ ਰਾਜ ਨਾਲ ਸਬੰਧਤ ਹੈ।

ਪਰਿਵਾਰਕ ਮੈਂਬਰਾਂ ਅਤੇ ਦੋਸਤਾਂ ਅਨੁਸਾਰ ਡੇਵ ਇੱਕ ਮਿਹਨਤੀ, ਖੁਸ਼ਮਿਜ਼ਾਜ਼ ਅਤੇ ਆਪਣੇ ਸੁਪਨਿਆਂ ਨੂੰ ਪੂਰਾ ਕਰਨ ਵਾਲਾ ਨੌਜਵਾਨ ਸੀ। ਪਾਇਲਟ ਬਣਨਾ ਉਸ ਦਾ ਬਚਪਨ ਦਾ ਸੁਪਨਾ ਸੀ, ਜੋ ਉਸ ਨੇ ਸਖ਼ਤ ਮਿਹਨਤ ਨਾਲ ਪੂਰਾ ਕੀਤਾ ਸੀ।

ਡੇਵ ਨੇ ਸ਼ੁੱਕਰਵਾਰ ਨੂੰ ਆਪਣੀ ਮੰਗੇਤਰ ਜੈਸਨੀ ਨਾਲ ਵਿਆਹ ਕੀਤਾ ਸੀ। ਦੋਵਾਂ ਦੀ ਮੁਲਾਕਾਤ ਲਗਭਗ ਦਸ ਸਾਲ ਪਹਿਲਾਂ ਇੱਕ ਚਰਚ ਵਿੱਚ ਹੋਈ ਸੀ ਅਤੇ ਸਮੇਂ ਦੇ ਨਾਲ ਉਨ੍ਹਾਂ ਦਾ ਰਿਸ਼ਤਾ ਮਜ਼ਬੂਤ ਹੁੰਦਾ ਗਿਆ। ਜਾਰਜੀਆ ਦੇ ਡੌਸਨਵਿਲ ਸਥਿਤ "ਦ ਰੇਵੀਅਰ" ਵਿੱਚ ਹੋਏ ਇਸ ਸ਼ਾਨਦਾਰ ਵਿਆਹ ਸਮਾਗਮ ਵਿੱਚ ਕਰੀਬ 400 ਮਹਿਮਾਨ ਸ਼ਾਮਲ ਹੋਏ। ਪਰਿਵਾਰ ਅਤੇ ਦੋਸਤਾਂ ਨੇ ਇਸ ਖਾਸ ਮੌਕੇ ਨੂੰ ਬੜੇ ਉਤਸ਼ਾਹ ਨਾਲ ਮਨਾਇਆ।

ਵਿਆਹ ਦੇ ਰਿਸੈਪਸ਼ਨ ਤੋਂ ਬਾਅਦ ਇਹ ਨਵ-ਵਿਆਹਿਆ ਜੋੜਾ ਰੌਬਿਨਸਨ R66 ਹੈਲੀਕਾਪਟਰ ਵਿੱਚ ਸਵਾਰ ਹੋ ਕੇ ਡੇਕਾਲਬ-ਪੀਚਟ੍ਰੀ ਹਵਾਈ ਅੱਡੇ ਵੱਲ ਰਵਾਨਾ ਹੋਇਆ। ਇਹ ਉਡਾਣ ਉਨ੍ਹਾਂ ਲਈ ਇੱਕ ਵਿਸ਼ੇਸ਼ ਸਰਪ੍ਰਾਈਜ਼ ਅਤੇ ਵਿਆਹ ਤੋਂ ਬਾਅਦ ਦੀ ਯਾਦਗਾਰ ਵਿਦਾਈ ਵਜੋਂ ਰੱਖੀ ਗਈ ਸੀ। ਇਸ ਤੋਂ ਬਾਅਦ ਦੋਵਾਂ ਨੇ ਅਟਲਾਂਟਾ ਦੇ ਇੱਕ ਹੋਟਲ ਵਿੱਚ ਰਾਤ ਬਿਤਾਉਣੀ ਸੀ ਅਤੇ ਫਿਰ ਆਪਣੇ ਹਨੀਮੂਨ ਦੀ ਸ਼ੁਰੂਆਤ ਕਰਨੀ ਸੀ।

ਪਰ ਕਿਸਮਤ ਨੂੰ ਕੁਝ ਹੋਰ ਹੀ ਮਨਜ਼ੂਰ ਸੀ। ਉਡਾਣ ਦੌਰਾਨ ਹੈਲੀਕਾਪਟਰ ਡੌਸਨ ਕਾਊਂਟੀ ਦੇ ਇੱਕ ਦੂਰ-ਦੁਰਾਡੇ ਜੰਗਲੀ ਇਲਾਕੇ ਵਿੱਚ ਕਰੈਸ਼ ਹੋ ਗਿਆ। ਹਾਦਸਾ ਇੰਨਾ ਭਿਆਨਕ ਸੀ ਕਿ ਡੇਵ ਅਤੇ ਹੈਲੀਕਾਪਟਰ ਚਲਾ ਰਹੇ ਪਾਇਲਟ ਦੀ ਮੌਕੇ 'ਤੇ ਹੀ ਮੌਤ ਹੋ ਗਈ। ਹਾਲਾਂਕਿ ਪਾਇਲਟ ਦੀ ਪਛਾਣ ਬਾਰੇ ਅਧਿਕਾਰੀਆਂ ਵੱਲੋਂ ਅਜੇ ਕੋਈ ਅਧਿਕਾਰਤ ਜਾਣਕਾਰੀ ਜਾਰੀ ਨਹੀਂ ਕੀਤੀ ਗਈ।

ਹਾਦਸੇ ਤੋਂ ਬਾਅਦ ਡੇਵ ਦੀ ਪਤਨੀ ਜੈਸਨੀ ਜ਼ਿੰਦਾ ਤਾਂ ਬਚ ਗਈ, ਪਰ ਉਹ ਗੰਭੀਰ ਸੱਟਾਂ ਨਾਲ ਹੈਲੀਕਾਪਟਰ ਦੇ ਮਲਬੇ ਵਿੱਚ ਫਸੀ ਰਹੀ। ਡੇਵ ਦੇ ਪਿਤਾ ਜਾਰਜ ਫਿਜ਼ੀ ਅਨੁਸਾਰ, ਹਾਦਸੇ ਵਾਲੀ ਥਾਂ ਜੰਗਲ ਦੇ ਅੰਦਰ ਹੋਣ ਕਾਰਨ ਬਚਾਅ ਟੀਮਾਂ ਨੂੰ ਹੈਲੀਕਾਪਟਰ ਦਾ ਪਤਾ ਲਗਾਉਣ ਵਿੱਚ ਕਾਫ਼ੀ ਸਮਾਂ ਲੱਗ ਗਿਆ। ਇਸ ਦੌਰਾਨ ਜੈਸਨੀ ਲਗਭਗ ਛੇ ਘੰਟੇ ਤੱਕ ਇਕੱਲੀ ਮਲਬੇ ਵਿੱਚ ਪਈ ਰਹੀ। ਆਖ਼ਰਕਾਰ ਬਚਾਅ ਕਰਮਚਾਰੀਆਂ ਨੇ ਉਸ ਨੂੰ ਲੱਭ ਲਿਆ ਅਤੇ ਹਸਪਤਾਲ ਪਹੁੰਚਾਇਆ।

ਜੈਸਨੀ, ਜੋ ਪੇਸ਼ੇ ਤੋਂ ਇੱਕ ਨਰਸ ਹੈ, ਇਸ ਸਮੇਂ ਅਟਲਾਂਟਾ ਦੇ ਇੱਕ ਹਸਪਤਾਲ ਵਿੱਚ ਇਲਾਜ ਅਧੀਨ ਹੈ। ਡਾਕਟਰਾਂ ਅਨੁਸਾਰ ਉਸ ਨੂੰ ਕਈ ਸੱਟਾਂ ਅਤੇ ਖੁਰਚਾਂ ਲੱਗੀਆਂ ਹਨ, ਪਰ ਉਸ ਦੀ ਹਾਲਤ ਸਥਿਰ ਦੱਸੀ ਜਾ ਰਹੀ ਹੈ। ਪਰਿਵਾਰ ਲਈ ਸਭ ਤੋਂ ਵੱਡਾ ਸਦਮਾ ਇਹ ਹੈ ਕਿ ਜਿਸ ਦਿਨ ਨੂੰ ਉਹ ਜ਼ਿੰਦਗੀ ਦਾ ਸਭ ਤੋਂ ਖੁਸ਼ੀ ਭਰਿਆ ਦਿਨ ਮੰਨ ਰਹੇ ਸਨ, ਉਹੀ ਦਿਨ ਉਨ੍ਹਾਂ ਲਈ ਸਭ ਤੋਂ ਵੱਡੇ ਦੁੱਖ ਦਾ ਕਾਰਨ ਬਣ ਗਿਆ।

ਡੇਵ ਦੀ ਮੌਤ ਦੀ ਖ਼ਬਰ ਨਾਲ ਭਾਰਤੀ-ਅਮਰੀਕੀ ਭਾਈਚਾਰੇ ਵਿੱਚ ਸੋਗ ਦੀ ਲਹਿਰ ਦੌੜ ਗਈ ਹੈ। ਉਸ ਦੇ ਦੋਸਤਾਂ, ਸਹਿਕਰਮੀਆਂ ਅਤੇ ਪਰਿਵਾਰਕ ਮੈਂਬਰਾਂ ਨੇ ਉਸ ਨੂੰ ਇੱਕ ਨਿਮਰ, ਮਿਹਨਤੀ ਅਤੇ ਹਰ ਵੇਲੇ ਮੁਸਕਰਾਉਣ ਵਾਲੇ ਨੌਜਵਾਨ ਵਜੋਂ ਯਾਦ ਕੀਤਾ ਹੈ। ਡੇਵ ਦੇ ਪਿਤਾ ਨੇ ਭਾਵੁਕ ਹੋ ਕੇ ਕਿਹਾ ਕਿ ਉਨ੍ਹਾਂ ਦਾ ਪੁੱਤਰ ਆਪਣੇ ਵਿਆਹ ਨੂੰ ਲੈ ਕੇ ਬਹੁਤ ਖੁਸ਼ ਸੀ ਅਤੇ ਆਪਣੇ ਭਵਿੱਖ ਬਾਰੇ ਕਈ ਸੁਪਨੇ ਦੇਖ ਰਿਹਾ ਸੀ।