திருவாரூர் மாவட்டம், சீர்காழி பகுதியில் இலைய முதுகூடம், ஆரண்யேஸ்வரம், மதங்காசிரமம், திருநாங்கூர், பெருந்தோட்டம், யோகீஸ்வரம், மேலையூர், காவிரிப்பூம்பட்டினம், திருவெண்காட்டுப் பகுதிகளைச் சுற்றி இந்த பீடங்கள் உள்ளன. விநாயகப் பெருமானுக்குரிய ஒன்பது பீடங்கள் குறித்து இந்தப் பதிவில் காண்போம்.

கணேச பீடம்: இது நவசக்தி மயம், சித்திபிலம் என்கிற கீழப்பெரும்பள்ளத்தில் உள்ளது. இங்குள்ள கணேச சக்திக்கு 'மயூரா' என்று பெயர்.

ஸ்வானந்த கணேச பீடம்: சிவன், சக்தி, சூரியன், விஷ்ணு, பிரம்மா இவர்களால் ஸ்தாபிக்கப்பட்டது. இங்கு சித்தி, புத்தி சமேதராகக் கோயில் கொண்டுள்ளார் விநாயகர்.

புஷ்டி பீடம்: நாகநாதர் சன்னிதியில் இந்த புஷ்டி பீடம் உள்ளது. ‌இந்த பீடம் 8,800 ரிஷிகளால் பூஜிக்கப்பட்டு ஸ்தாபனம் செய்யப்பட்டதாகும். இதில் உள்ள விநாயகர், புஷ்டி கணேசர் எனப்படுகிறார்.

ஷட்சக்தி பீடம்: இதுவும் நாகநாத கேந்திரத்தில் உள்ளது. இதில் கஜானனர் முதலான கணேச மூர்த்திகள் உள்ளனர்.

தர்ம பீடம்: காவிரிப்பூம்பட்டினம் செல்லும் பாதையில், தர்மபுரம் என்று இன்று வரை இத்தலம் விளங்குகிறது. பாண்டவர்களால் பூஜிக்கப்பட்ட தர்மகுள விநாயகர் இங்கு வீற்றுள்ளார். யட்ச ரூபிணியான தர்ம தேவதையால் பூஜிக்கப்பட்ட கணபதி இவர்.

நாராயண பீடம்: காவிரி சங்கமமாகின்ற இடத்தில் சமுத்திர ராஜனால் பூஜிக்கப்பட்டு, தீர்த்த விநாயகர் என்ற பெயரில் இவர் விளங்குகிறார்.

ஓங்கார பீடம்: தெப்பத்தூர் என்னும் வேதபுரத்தில், பரமேஸ்வரனால் பிரதிஷ்டையான பரமேச விநாயகர் இத்தலத்தில் அருள் தருகிறார்.

காமாயினீ பீடம்: செங்கழுநீர் படித்துறை உள்ள கௌதமாசிரத்தில் (மேலையூர்) இந்திரனால் பூஜிக்கப்பட்ட கல்கார விநாயகர் கோயில் கொண்டுள்ளார்.

புருஷார்த்த பீடம்: திருநாங்கூர் அருகே மதங்காசிரமத்தில் மதங்க முனிவரால் ஏற்படுத்தப்பட்ட புருஷார்த்த விநாயகர், சிவசக்தியால் பிரதிஷ்டை செய்யப்பட்ட மூர்த்தியாய் உள்ளார். இதன் உள்ளேயே உப விநாயகர் ரூபங்களாக தர்ம, அர்த்த, காம, சிருஷ்டி, மோட்ச பீடங்கள் உள்ளன.