பாஜக மாநில தலைவர் அண்ணாமலைக்காக, அக்கட்சி பிரமுகர் கைவிரலை வெட்டிக்கொண்டது தமிழ்நாடு அரசியல் மட்டுமின்றி தேசியளவில் கவனத்தை பெற்றுள்ளது.

கடலூர் மாவட்டம் குறிஞ்சிப்பாடி அருகே ஆண்டாள், முள்ளிபள்ளம் பகுதியைச் சேர்ந்தவர் துரை ராமலிங்கம். இவர் கோவையில் பாஜக சார்பில் போட்டியிடும் மாநிலத் தலைவர் அண்ணாமலைக்கு ஆதரவு கேட்டு வாக்கு சேகரிப்புப் பணிகளில் ஈடுபட்டு வந்தார்.

இந்தநிலையில், பீளமேடு ஹோப் கல்லூரி அருகே களப்பணியில் ஈடுபட்டிருந்த போது, அவரிடம் வந்து அண்ணாமலை தோல்வி அடைந்துவிடுவார் என ஒருவர் கூற, ஆவேசமடைந்த கே.துரை ராமலிங்கம் அருகில் இருந்த காய்கறிக் கடையில் இருந்து கத்தியை எடுத்து தனது விரலை வெட்டிக்கொண்டார்.

இதனால் கையில் இருந்து ரத்தம் கொட்ட… அப்போதும் "அண்ணாமலை தான் வெற்றி பெறுவார்" என்று கூறியிருக்கிறார்.

அவரை அருகில் இருந்தவர்கள் மீட்டு அவிநாசி சாலையில் உள்ள தனியார் மருத்துவமனையில் சிகிச்சைக்காக அனுமதித்தனர். தற்போது அவர் மருத்துவமனையில் சிகிச்சை பெற்று வருகிறார்.

மருத்துவமனையில் இருந்தவாறு வீடியோ வெளியிட்ட அவர், "கடந்த 10 ஆண்டுகளாக கட்சி பணியாற்றி வருகிறேன். கடந்த சட்டமன்றத் தேர்தலில் அண்ணாமலைக்காக அரவக்குறிச்சி தொகுதிக்கு சென்று பிரச்சாரம் செய்தேன்.

தற்போது கோவையில் அண்ணாமலை போட்டியிடும் நிலையில் கடந்த ஒரு வாரத்துக்கு முன் கோவைக்கு வந்து களப்பணியாற்றி வந்தேன். இரண்டு திராவிட கட்சிகளும் புறக்கணிக்கப்பட வேண்டிய சமயம் இது.

நேற்று நண்பர் ஒருவரிடம் பேசிக்கொண்டிருந்த போது, சம்மந்தமில்லாத நபர் ஒருவர் என்னிடம் வந்து அண்ணாமலை வெற்றி பெற மாட்டார் என்றார்.

இதனால், எனது இடது கை ஆள்காட்டி விரலை வெட்டி கொண்டேன். அருகிலிருந்தவர்கள் மீட்டு மருத்துமனையில் அனுமதித்தனர். அறுவை சிகிச்சை செய்யப்பட்டது. இந்த முறை 400 இடங்களுக்கு மேல் பாஜக வெற்றி பெறும்" என்று தெரிவித்துள்ளார்.

துரை ராமலிங்கத்தின் செயல் குறித்து நாம் விசாரித்த போது, " இவர், குறிஞ்சிப்பாடியில் காவல் துறை எஸ்.எஸ்.ஐ-ஆக பணியாற்றி வந்தார். போலீஸ் வேலையில் இருந்து விருப்ப ஓய்வு பெற்றார். 10 ஆண்டுகளுக்கு முன் பாஜகவில் இணைந்தார். பாஜகவை ஆதரித்து வீடியோ வெளியிட்டு வருவார்.

இந்நிலையில்தான் கோவையில் அண்ணாமலைக்காக வாக்குச் சேகரிக்க சென்ற இடத்தில் இப்படி செய்துகொண்டார். சம்பந்தமில்லாத நபர் அண்ணாமலை தோற்பார் என்று சொன்னதாக அவர் சொல்கிறார். ஆனால், சொந்த கட்சிக்காரரே தான் அண்ணாமலை வெற்றி பெற மாட்டார் என துரை ராமலிங்கத்திடம் சொன்னார்.

இல்லை, இல்லை அண்ணாமலை வெற்றி பெறுவார் என்று துரை ராமலிங்கம் சொல்ல… அந்த நபர் திரும்ப திரும்ப வெற்றி பெற மாட்டார் என்று சொல்ல… ஆவேசத்தில் என்ன செய்வதென தெரியாமல் கையை வெட்டிக்கொண்டார். ஆள் காட்டி விரலில் மேல் பகுதியில் பலத்த காயம் ஏற்பட்டுள்ளது" என்கிறார்கள் போலீஸ் வட்டாரத்தில்.