40 தொகுதிகளுக்கும் தேர்தல் பணிக்குழு பொறுப்பாளர்களை அதிமுக பொதுச்செயலாளர் எடப்பாடி பழனிச்சாமி இன்று (மார்ச் 23) நியமித்துள்ளார்.

நாடாளுமன்றத் தேர்தல் வரும் ஏப்ரல் 19ஆம் தேதி தமிழகம் மற்றும் புதுச்சேரியில் ஒரே கட்டமாக நடைபெறும் என தேர்தல் ஆணையம் அறிவித்துள்ளது.

இதன் காரணமாக, அரசியல் கட்சியினர் தேர்தல் ஏற்பாடுகளில் மும்மரமாக ஈடுபட்டு வருகின்றனர். அந்தவகையில், தமிழகத்தில் போட்டியிடும் அதிமுக மற்றும் அதன் கூட்டணி கட்சிகளின் வேட்பாளர்கள் பட்டியல் வெளியாகி உள்ளது.

இதனைத் தொடர்ந்து, இன்று தமிழகம் மற்றும் புதுச்சேரியில் உள்ள 40 தொகுதிகளுக்கும் தேர்தல் பணிக்குழு பொறுப்பாளர்களை அதிமுக நியமித்துள்ளது.

அதன்படி, திருவள்ளூர் தொகுதிக்கு டாக்டர்.வேணுகோபால் தலைமையில் பொறுப்பாளர்கள் நியமனம் செய்யப்பட்டுள்ளனர்.

வடசென்னைக்கு முன்னாள் அமைச்சர் ஜெயக்குமார், தென்சென்னைக்குக் கோகுல இந்திரா, மத்திய சென்னைக்கு தமிழ்மகன் உசேன் ஆகியோர் பொறுப்பாளர்களாக நியமிக்கப்பட்டுள்ளனர்.

கோவை, திருப்பூர், பொள்ளாச்சி, நீலகிரி தொகுதிகளுக்கு முன்னாள் அமைச்சர் வேலுமணி பொறுப்பாளராக நியமிக்கப்பட்டுள்ளார்.

திண்டுக்கல் தொகுதிக்கு சீனிவாசன், திருச்சி தொகுதிக்கு விஜயபாஸ்கர் உள்ளிட்டோர் பணிக்குழு பொறுப்பாளர்களாக நியமிக்கப்பட்டு இருக்கிறார்கள்.

காஞ்சிபுரம் தொகுதிக்கு வளர்மதி, கிருஷ்ணகிரி தொகுதிக்கு கே.பி.முனுசாமி ஆகியோர் பொறுப்பாளர்களாக நியமனம் செய்யப்பட்டுள்ளனர்.