பாமக அதிமுக கூட்டணியில் இணையப் போகிறதா அல்லது பாஜக கூட்டணியில் இணையப் போகிறதா என்ற கேள்விக்கு நேற்று விடை எட்டப்பட்டிருக்கிறது.

நேற்று (மார்ச் 17) பாமக நிறுவனர் மருத்துவர் ராமதாசின் உத்தரவின் பேரில் பாமக எம்.எல்.ஏ அருள் சேலத்திலிருந்து கிளம்பி 4 மணி நேரம் பயணம் செய்து சென்னை கிரீன்வேஸ் சாலையில் உள்ள எடப்பாடி பழனிச்சாமி இல்லத்திற்கு சென்று, தனது ஐபோனில் இருந்து ஃபேஸ் டைம் செயலி வழியாக அன்புமணியும் எடப்பாடி பழனிசாமியும் நேரடியாக பேசுவதற்கு பாலம் அமைத்துக் கொடுத்தார்.

இந்த பேச்சுவார்த்தையில் அதிமுக-பாமக கூட்டணி உறுதியானது. இந்நிலையில் இன்று மதியத்திற்கு மேல் நவமி முடிவடைந்ததற்குப் பிறகு, பாமக மாவட்ட செயலாளர்கள் கூட்டம் மாலை 4 மணியளவில் தைலாபுரம் தோட்டத்தில் நடைபெற உள்ளது. இந்த கூட்டத்திற்குப் பிறகு பாமக தரப்பிலிருந்து அருள், ஏ.கே.மூர்த்தி உள்ளிட்ட 5 பேர் கொண்ட குழு அதிமுக தரப்புடன் தொகுதிப் பங்கீடு குறித்து பேசவுள்ளது.