எஞ்சிய கட்சிகளிடம் தான் தெளிவான நிலைப்பாடு வெளிவரவில்லை. விசிக, ஐயூஎம்எல் ஆகிய கட்சிகள் தவெக அமைச்சரவையில் இடம்பெற்றுவிட்டன. இடதுசாரிகள் வெளியில் இருந்து தங்கள் ஆதரவை அளித்து வருகின்றனர். அடுத்ததாக கூட்டணிக்குள் வருவதற்கு மதிமுக காய் நகர்த்தி கொண்டிருக்கிறது. எனவே அடுத்த 5 ஆண்டுகளுக்கு நிலையான ஆட்சியை வழங்குவதற்கு சாதகமான சூழல் நிலவுகிறது.

தவெக கூட்டணியா? தெளிவில்லாத கூட்டணி கட்சிகள்

அதேசமயம் தவெக தலைமையில் புதிய கூட்டணியை அமைப்பதில் தான் இழுபறி நீடிக்கிறது. காங்கிரஸ் கட்சியை தவிர்த்து மற்ற கட்சிகள் அனைத்தும் உறுதியான நிலைப்பாட்டை தெரிவிக்கவில்லை. திமுக உடன் நட்புறவு, ஆட்சி கவிழ்ந்து விடக் கூடாது என ஆதரவு, குடியரசு தலைவர் ஆட்சி வந்துவிடக் கூடாது, மதச்சார்பற்ற முற்போக்கு கூட்டணியே தற்போது இல்லை, தவெக கூட்டணியை பற்றி பரிசீலிப்போம் என்றெல்லாம் பேசி வருகின்றனர்.

திருமாவளவன் சர்ச்சையும், தவெக கூட்டணி குழப்பமும்

• குறிப்பாக விசிக தலைவர் திருமாவளவன் பேசும் கருத்துகளை சுட்டிக் காட்டி, முன்னுக்கு முன் முரணாக பேசுகிறார். ஒவ்வொரு நாளும் ஒவ்வொரு கருத்தை முன்வைப்பதாக விமர்சிக்கின்றனர்.
• 2026 தமிழக சட்டமன்றத் தேர்தல் முடிவுகளுக்கு பின்னர் நம்பகத்தன்மையை இழந்துவிட்டார் என கடும் விமர்சனங்கள் முன்வைக்கப்பட்டு வருகின்றன.
• இந்த சூழலில் திமுக உடன் நட்புறவு தொடர்கிறது என திருமாவளவன் பேசியது பற்றி மதிமுக பொதுச் செயலாளர் வைகோவிடம் செய்தியாளர்கள் கேட்டதற்கு, அவருக்கு நோபல் பரிசு தான் கொடுக்க வேண்டும் என்று சலசலப்பை ஏற்படுத்தும் வகையில் பதிலளித்தார்.
• இதுபற்றி திருமாவளவன் பேசும் போது, வைகோவின் பரிந்துரைக்கு நன்றி. எனக்கு நோபல் பரிசு கிடைத்தால் அவருக்கு நன்றி சொல்வேன் என்று பதிலடி கொடுத்தார்.
• கிளைகள் கூட இல்லாத கட்சிக்கு 8 சீட்டை திமுக அளித்ததாக விசிகவை சீண்டும் வகையில் வைகோ ஏற்கனவே பேசியிருந்தார்.
• இதுபோன்ற கருத்து மோதல்கள் தவெக உடன் கூட்டணி கட்சிகள் இணக்கமான சூழலில் இல்லையா என்ற கேள்வியை எழுப்புகின்றன.
• மேலும் பாமக உடன் தவெக நெருங்கி செல்வது போன்ற காட்சிகளையும் பார்க்க முடிகிறது.