இந்தியாவில் ஐ.ஏ.எஸ் (IAS) அல்லது ஐ.பி.எஸ் (IPS) அதிகாரியாக வேண்டும் என்பது லட்சக்கணக்கான இளைஞர்களின் தீராத கனவாக உள்ளது.

இதற்காகப் பலரும் இரவு-பகலாகப் படித்து, பெருநகரங்களில் உள்ள விலையுயர்ந்த பயிற்சி மையங்களில் லட்சக்கணக்கான ரூபாய்களைச் செலவிடுகின்றனர். இருப்பினும், ஒரு மாவட்டத்தில் இருந்தோ அல்லது ஒரு பெரிய நகரில் இருந்தோ ஓரிரு அதிகாரிகள் உருவாவதே கடினமான ஒன்றாக இருக்கும் வேளையில், உத்தரப் பிரதேசத்தின் ஒரு சிறிய கிராமம் உலகத்தையே திரும்பிப் பார்க்க வைத்துள்ளது.

உத்தரப் பிரதேச மாநிலத்தின் மாதோபட்டி (Madhopatti) என்ற கிராமம், இன்று இந்தியாவின் 'அதிகாரிகளின் தொழிற்சாலை' என்று அழைக்கப்படுகிறது. வியக்கத்தக்க விஷயம் என்னவென்றால், இந்தக் குக்கிராமத்தில் வெறும் 75 குடும்பங்கள் மட்டுமே வசித்து வருகின்றன, ஆனால் அங்கிருந்து இதுவரை 51 ஐ.ஏ.எஸ் மற்றும் ஐ.பி.எஸ் அதிகாரிகள் உருவாகி தேசத்திற்குச் சேவையாற்றி வருகின்றனர். ஒவ்வொரு வீட்டிலும் குறைந்தது ஒரு அதிகாரியாவது இருக்கும் அளவுக்கு அங்கு கல்விப் புரட்சி ஏற்பட்டுள்ளது.

இந்தக் கிராமத்தின் சாதனையில் உச்சகட்டமாக, ஒரே குடும்பத்தைச் சேர்ந்த நான்கு சகோதரர்கள் ஐ.ஏ.எஸ் அதிகாரிகளாகத் தேர்வாகி தேசிய அளவில் கவனம் ஈர்த்தனர். வினய் குமார் சிங், சத்ரபால் சிங், அஜய் குமார் சிங் மற்றும் சசிகாந்த் சிங் ஆகியோரே அந்தச் சாதனையாளர்கள். இவர்களில் வினய் குமார் சிங் பீகார் மாநிலத்தின் தலைமைச் செயலாளராகப் பணியாற்றி ஓய்வுபெற்றவர் என்பது குறிப்பிடத்தக்கது. இவர்களது வெற்றி அந்த கிராமத்தின் அடுத்தடுத்த தலைமுறை இளைஞர்களுக்குப் பெரும் உத்வேகத்தை அளித்தது.

மாதோபட்டியின் இந்தச் சாதனைப் பயணம் இன்று நேற்றல்ல, நூறு ஆண்டுகளுக்கு முன்பே தொடங்கிவிட்டது. 1914-ல் பிரிட்டிஷ் ஆட்சிக் காலத்தில் முஸ்தபா உசேன் என்பவர் சிவில் சர்வீஸில் சேர்ந்ததே இதற்கு முதல் விதையாக அமைந்தது. சுதந்திரத்திற்குப் பிறகு 1952-ல் இந்து பிரகாஷ் சிங் ஐ.எப்.எஸ் அதிகாரியாகத் தேர்வானார். அதனைத் தொடர்ந்து 2002-ல் அமிதாப் சிங் 298-வது இடத்தைப் பிடித்து கிராமத்தின் புகழைப் புதுப்பித்தார்.