எந்த அறிகுறிகளில் வீட்டிலேயே பராமரிக்கலாம், எப்போது உடனடியாக மருத்துவ உதவியை நாட வேண்டும் என்பதையும், குழந்தையின் உடல் மற்றும் மனநலத்தை முழுமையாக பாதுகாப்பதன் முக்கியத்துவத்தையும் குழந்தை நல மருத்துவர் க. இராவணன் விளக்குகிறார்.

ஒரு காலத்தில் குழந்தைகளுக்கு நோய் ஏற்பட்டால், அதைக் கண்டறிந்து மருந்து வழங்கி குணப்படுத்துவதே மருத்துவத்தின் முதன்மையான நோக்கமாக இருந்தது. ஆனால், இன்றைய குழந்தை நல மருத்துவம் அதையும் தாண்டி பல்வேறு பரிமாணங்களுடன் செயல்படுகிறது. நோய் வராமல் தடுப்பது, குழந்தையின் வளர்ச்சியை தொடர்ந்து கண்காணிப்பது, ஆரம்ப அறிகுறிகளிலேயே பாதிப்புகளை கண்டறிவது, உடல் நலத்துடன் மனநலத்தையும் பாதுகாப்பது, குடும்பச் சூழலை கருத்தில் கொள்வது என முழுமையான பராமரிப்பை நோக்கி குழந்தை மருத்துவம் வளர்ந்துள்ளது.

மருத்துவமனை என்பது சிகிச்சை பெறும் இடம் மட்டுமா?
இன்றைய குழந்தைகள் நல மருத்துவமனை என்பது மருந்து கொடுத்து நோயை குணப்படுத்தும் இடமாக மட்டும் இருக்கக்கூடாது. குழந்தைக்கு அச்சம் ஏற்படாத வகையில் பாதுகாப்பான மற்றும் மகிழ்ச்சியான சூழல் அமைந்திருப்பதும் அவசியம். அதேபோல், குழந்தையின் உடல்நிலை, சிகிச்சை முறை மற்றும் மேற்கொள்ள வேண்டிய நடவடிக்கைகள் குறித்து பெற்றோருக்கு தெளிவாக எடுத்துரைக்க வேண்டும்.குழந்தையின் தேவைகளை மையமாகக் கொண்டு சிகிச்சை அளிப்பதுடன், பெற்றோரையும் சிகிச்சை நடைமுறையில் இணைத்துக் கொள்வது மருத்துவப் பராமரிப்பின் தரத்தை மேலும் உயர்த்தும்.

நோய் வந்த பிறகே மருத்துவரை அணுக வேண்டுமா?
அவ்வாறு காத்திருக்க வேண்டிய அவசியமில்லை. நோய் வராமல் தடுப்பதே சிறந்த மருத்துவ அணுகுமுறையாகும். குழந்தைகளுக்கு உரிய காலத்தில் தடுப்பூசிகளை செலுத்துதல், சத்தான உணவை வழங்குதல், தாய்ப்பால் கொடுத்தல், தூய்மையான குடிநீரை பயன்படுத்துதல், தனிநபர் சுகாதாரத்தை பேணுதல் மற்றும் குழந்தையின் வளர்ச்சியை தொடர்ந்து கண்காணித்தல் போன்றவை பல்வேறு உடல்நலப் பிரச்சினைகளைத் தடுக்க உதவும்.குழந்தை ஆரோக்கியமாக இருக்கும்போதே முறையான மருத்துவ ஆலோசனை பெறுவதன் மூலம், எதிர்காலத்தில் ஏற்படக்கூடிய சில பிரச்சினைகளை ஆரம்பத்திலேயே கண்டறிந்து தேவையான நடவடிக்கைகளை மேற்கொள்ள முடியும்.

உயரமும் எடையும் மட்டும் போதுமா?
குழந்தையின் ஆரோக்கியத்தை உயரம் மற்றும் எடையை வைத்து மட்டும் தீர்மானிக்க முடியாது. குழந்தையின் உடல் வளர்ச்சியுடன் மொழித்திறன், அறிவாற்றல், உணர்ச்சி வளர்ச்சி, சமூகப் பழக்கம், சிந்திக்கும் திறன் மற்றும் நடத்தை ஆகியவையும் முறையாக வளர வேண்டும்.குடும்பத்தில் கிடைக்கும் அன்பும் பாதுகாப்பும், குழந்தைகளுடன் பெற்றோர் மேற்கொள்ளும் உரையாடலும், விளையாடுவதற்கான வாய்ப்பும், நல்ல சமூக உறவுகளும் குழந்தையின் மூளை வளர்ச்சிக்கும் மனநலத்திற்கும் முக்கியமான பங்களிப்பை வழங்குகின்றன.

எல்லா நோய்களுக்கும் வீட்டிலேயே சிகிச்சை அளிக்கலாமா?
லேசான சளி, குறைந்த அளவிலான காய்ச்சல் போன்ற சில பொதுவான உடல்நலப் பிரச்சினைகளுக்கு மருத்துவரின் ஆலோசனைக்கு ஏற்ப வீட்டிலேயே போதுமான பராமரிப்பு வழங்க முடியும்.ஆனால், குழந்தைக்கு மூச்சு விடுவதில் சிரமம், உடலில் நீர்ச்சத்து குறைதல், தொடர்ந்து வாந்தி, வலிப்பு, மயக்கம், அதிகப்படியான சோர்வு அல்லது குழந்தையின் வழக்கமான செயல்பாடு மற்றும் நடத்தையில் திடீர் மாற்றம் போன்ற அறிகுறிகள் தென்பட்டால், தாமதிக்காமல் மருத்துவ உதவியை நாட வேண்டும்.குழந்தையின் உடல்நிலை மோசமடைந்துள்ளதா என்பதை பெற்றோர் தாங்களாகவே முடிவு செய்வதைவிட, சந்தேகம் ஏற்பட்டவுடன் மருத்துவரை அணுகுவது பாதுகாப்பானது.

நவீன மருத்துவப் பரிசோதனைகள் அனைவருக்கும் தேவையா?
அனைத்து குழந்தைகளுக்கும் அனைத்து பரிசோதனைகளும் அவசியமில்லை. காந்த அதிர்வு படப்பரிசோதனை, கணினி வழிப் படப்பரிசோதனை, இரத்தப் பரிசோதனை உள்ளிட்ட நவீன மருத்துவப் பரிசோதனைகள் குழந்தையின் உடல்நிலை மற்றும் மருத்துவத் தேவையைப் பொறுத்தே மேற்கொள்ளப்பட வேண்டும்.தொழில்நுட்பப் பரிசோதனைகள் நோயை கண்டறிவதில் முக்கிய உதவியாக இருந்தாலும், பரிசோதனை முடிவுகளை மட்டும் அடிப்படையாகக் கொண்டு சிகிச்சை முடிவெடுக்கக் கூடாது. குழந்தையின் அறிகுறிகள், மருத்துவ வரலாறு மற்றும் உடல் பரிசோதனை ஆகியவற்றையும் ஒருங்கிணைத்தே சரியான முடிவு எடுக்கப்பட வேண்டும்.

குழந்தையின் மனநலத்தையும் கவனிக்க வேண்டுமா?
நிச்சயமாக கவனிக்க வேண்டும். குழந்தைகளின் உடல் நலத்துக்கு இணையாக அவர்களின் மனநலமும் முக்கியமானது. தொடர்ந்து ஏற்படும் பயம், பதற்றம், தூக்கத்தில் மாற்றம், பள்ளிக்குச் செல்வதில் சிரமம், நண்பர்களுடன் பழகுவதில் தயக்கம், சமூகத் தனிமை அல்லது வழக்கத்திற்கு மாறான நடத்தை போன்ற மாற்றங்களை பெற்றோர் கவனிக்க வேண்டும்."குழந்தைதானே, நாளடைவில் சரியாகிவிடும்" என்று அலட்சியப்படுத்தாமல், மாற்றங்கள் தொடர்ந்து நீடித்தால் உரிய மருத்துவ அல்லது மனநல ஆலோசனையைப் பெறுவது நல்லது. உடலும் மனமும் ஒன்றோடொன்று தொடர்புடையவை என்பதால், குழந்தையின் ஒட்டுமொத்த நலனை கருத்தில் கொண்டே பராமரிப்பு வழங்கப்பட வேண்டும்.

சிகிச்சையில் பெற்றோரின் பங்கு என்ன?
குழந்தைக்கு சிகிச்சை அளிப்பதில் பெற்றோரின் பங்களிப்பு மிகவும் முக்கியமானது. குழந்தைக்கு முன்பு ஏற்பட்ட உடல்நலப் பிரச்சினைகள், பயன்படுத்திய மருந்துகள், ஒவ்வாமை விவரங்கள், தடுப்பூசி நிலவரம் உள்ளிட்ட அனைத்து தகவல்களையும் மருத்துவரிடம் தெளிவாக தெரிவிக்க வேண்டும்.மருத்துவர் பரிந்துரைத்த மருந்துகளை உரிய அளவில், குறிப்பிட்ட நேரத்தில் வழங்க வேண்டும். சிகிச்சை தொடர்பாக ஏதேனும் சந்தேகம் இருந்தால் மருத்துவரிடம் கேட்டு தெளிவு பெற வேண்டும். இணையத்தில் கிடைக்கும் தகவல்களை மட்டும் அடிப்படையாகக் கொண்டு குழந்தையின் மருந்துகளை மாற்றுவதோ, சிகிச்சையை நிறுத்துவதோ கூடாது.

முழுமையான குழந்தை நலமே இலக்கு
நேற்றைய மருத்துவம் நோயை எதிர்த்து குணப்படுத்துவதில் அதிக கவனம் செலுத்தியது.இன்றைய குழந்தை நல மருத்துவம் நோய் வராமல் தடுப்பதுடன், குழந்தையின் உடல் வளர்ச்சி, அறிவாற்றல், மனநலம், சமூகப் பழக்கம் மற்றும் குடும்பச் சூழல் என அனைத்து அம்சங்களையும் ஒருங்கிணைத்து கவனிக்கிறது.எனவே, மருத்துவமனைக்குச் செல்வது நோய் ஏற்பட்ட பிறகு மட்டுமே மேற்கொள்ள வேண்டிய நடவடிக்கை அல்ல. குழந்தை ஆரோக்கியமாக வளர்வதற்கான ஒவ்வொரு கட்டத்திலும் பெற்றோருக்கு வழிகாட்டும் துணையாக மருத்துவர்கள் இருக்க வேண்டும்.நோயை குணப்படுத்துவது மட்டும் சிகிச்சை அல்ல; நோய் வராமல் தடுப்பதும், குழந்தையின் உடல் மற்றும் மனநலத்தை பாதுகாப்பதும், ஆரோக்கியமான எதிர்காலத்துக்கு வழிகாட்டுவதுமே முழுமையான குழந்தை நல மருத்துவத்தின் நோக்கமாகும்.