மனித உடலில் வயது அதிகரிக்கும் போது ரத்தச் செல்களில் ஏற்படும் சிறிய மரபணு மாற்றங்கள், ரத்த நாளங்களில் வீக்கத்தை உண்டாக்குகின்றன.
மாரடைப்பு மற்றும் பக்கவாதத்தைத் தடுக்கும் எளிய வாழ்க்கை முறை மாற்றங்கள்
வயது அதிகரிக்கும் போது மனித உடலில் பலவிதமான இயல்பான மாற்றங்கள் நிகழ்கின்றன. இருப்பினும், நமது ரத்தச் செல்களில் ஏற்படும் சிறிய அளவிலான மரபணு மாற்றங்கள், நமக்குத் தெரியாமலேயே ரத்த நாளங்களில் வீக்கத்தை ஏற்படுத்தி, இறுதியாக மாரடைப்பு மற்றும் பக்கவாதம் போன்ற கடுமையான பாதிப்புகளுக்கு வழிவகுக்கின்றன. இத்தகைய பாதிப்புகளில் இருந்து தப்பிக்க உடற்பயிற்சியும் நிம்மதியான தூக்கமும் மிகச் சிறந்த அரணாக விளங்குவதாகப் புதிய மருத்துவ ஆய்வுகள் சுட்டிக்காட்டுகின்றன.ரத்தச் செல்களில் ஏற்படும் மரபணு மாற்றங்கள்
மனித உடலில் செல்கள் தொடர்ச்சியாகப் பிரிந்து புதிய செல்கள் உருவாகும் பணியில் ஈடுபடுகின்றன. இந்தச் செயல்பாட்டின் போது செல்களின் DNA கட்டமைப்பில் எதிர்பாராத சிறிய தவறுகள் அல்லது மாற்றங்கள் ஏற்படுவது உண்டு. குறிப்பாக, வயதாகும் போது ரத்தம் மற்றும் நோய் எதிர்ப்புச் செல்களை உருவாக்கும் மூலச் செல்களில் இத்தகைய மாற்றங்கள் அடிக்கடி நிகழ்கின்றன. மருத்துவ உலகில் இது 'க்ளோனல் ஹெமடோபோயசிஸ்' என குறிப்பிடப்படுகிறது. இவ்வாறாக மாறுபட்ட செல்கள் ரத்தத்தில் அதிகளவில் பெருக்கமடைவதால், ரத்த நாளங்களின் உட்பகுதியில் கழிவுகள் படிந்து பாதை சுருங்கத் தொடங்குகிறது. இதுவே பிற்காலத்தில் பக்கவாதம் மற்றும் மாரடைப்பு ஏற்படுவதற்கு முதன்மையான காரணியாக அமைகிறது. : வாழ்க்கையில் சந்தோஷம் குறைகிறதா? மீண்டும் குழந்தை மனம் வேண்டுமா?உடற்பயிற்சியால் அடங்கும் ரத்த நாள வீக்கம்
அமெரிக்காவின் மவுண்ட் சினாய் ஐகான் மருத்துவப் பள்ளி ஆராய்ச்சியாளர்கள் மேற்கொண்ட ஆய்வில், உடற்பயிற்சி செய்வதன் மூலம் மரபணு மாற்றங்களால் ஏற்படும் ஆபத்துகளைக் குறைக்க முடியும் என்பது தெரியவந்துள்ளது. மிதமான பயிற்சி முதல் தீவிரமான உடற்பயிற்சி வரை தவறாமல் செய்பவர்களுக்கு, குறிப்பிட்ட மரபணு மாற்றங்களால் உண்டாகும் ரத்தச் செல் மாற்றங்களும் வீக்கங்களும் பெருமளவில் கட்டுப்படுத்தப்படுகின்றன. இதன் மூலம், தினசரி உடற்பயிற்சியானது ஒவ்வொரு மரபணு அமைப்பிற்கு ஏற்ப நேர்மறையான ஆரோக்கியப் பலன்களைத் தருகிறது என்பது உறுதியாகிறது.ஆரோக்கியமான தூக்கமும் ரத்த ஓட்டமும்
இரவில் முறையான மற்றும் ஆழ்ந்த தூக்கம் இல்லாத நபர்களுக்கு, ரத்தச் செல்களில் ஆபத்தான மரபணு மாற்றங்களும் ரத்த நாள அடைப்புகளும் மிக வேகமாகக் கூடுகின்றன என்று ஆய்வுகள் எச்சரிக்கின்றன. அதே வேளையில், தூக்கமின்மைப் பிரச்னை உள்ளவர்கள் கூட சீரான உடற்பயிற்சியை மேற்கொள்ளும் போது, ரத்த நாளங்களில் ஏற்படும் வீக்கத்தின் தீவிரத்தன்மை குறைந்து இதய ஆரோக்கியம் மேம்படுகிறது. எனவே, வயதுக் கட்டுப்பாடின்றி தினமும் உடலைச் சுறுசுறுப்பாக வைத்துக்கொள்வதும், சீரான தூக்க முறையைப் பின்பற்றுவதும் மாரடைப்பு மற்றும் பக்கவாதப் பாதிப்புகளில் இருந்து நம்மைப் பாதுகாக்கும். பொறுப்புத் துறப்பு: இத்தளத்தில் உள்ள லைப்ஸ்டைல், ஆரோக்கியம் மற்றும் உணவு சார்ந்த தகவல்கள் பொதுவான விழிப்புணர்விற்காக மட்டுமே; இவை மருத்துவ ஆலோசனையல்ல. இதில் உள்ள குறிப்புகளைப் பின்பற்றும் முன் தகுந்த நிபுணர் அல்லது மருத்துவரின் ஆலோசனையைப் பெறுவது அவசியமாகும்.