ఇంటర్నెట్ డెస్క్: నేటి బిజీ జీవనశైలిలో చాలామంది ఒంటరిగానే భోజనం చేస్తున్నారు. ఆఫీసు పనులు, వేరే నగరాల్లో ఒంటరిగా నివసించడం, సమయం లేకపోవడం వంటి కారణాలతో కుటుంబ సభ్యులు, స్నేహితులతో కలిసి భోజనం చేసే అవకాశం తగ్గుతోంది.
అయితే, తరచూ ఒంటరిగా తినడం వల్ల మానసిక ఆరోగ్యంపై ప్రభావం పడే అవకాశం ఉందని కొన్ని అధ్యయనాలు సూచిస్తున్నాయి.
అయితే ఒంటరిగా భోజనం చేయడం వల్ల ఆరోగ్యానికి నేరుగా హాని కలుగుతుందని చెప్పలేం. అప్పుడప్పుడు ఒంటరిగా తినడం సాధారణమే. కానీ ఎప్పుడూ ఒంటరిగానే ఉంటూ, ఇతరులతో కలవకుండా భోజనం చేసే అలవాటు ఉంటే అది ఒంటరితన భావనను పెంచే అవకాశం ఉంది.
కలిసి భోజనం చేయడం వల్ల ప్రయోజనం
కుటుంబ సభ్యులు, స్నేహితులు లేదా సహోద్యోగులతో కలిసి భోజనం చేయడం కేవలం ఆహారం తినడానికే పరిమితం కాదు. ఆ సమయంలో ఒకరితో ఒకరు మాట్లాడుకోవడం, నవ్వుకోవడం, తమ విషయాలను పంచుకోవడం ద్వారా సామాజిక సంబంధాలు మరింత బలపడతాయి. ఇది మనసుకు కూడా సంతోషాన్ని కలిగిస్తుంది.
ఇప్పటికే సామాజికంగా దూరంగా ఉంటున్నవారిలో ఒంటరిగా భోజనం చేసే అలవాటు మరింత ఒంటరితనానికి కారణం కావచ్చు. దీర్ఘకాలంగా ఒంటరితనాన్ని అనుభవించడం మానసిక ఆరోగ్యంపై ప్రతికూల ప్రభావం చూపే అవకాశం ఉంది.
మొబైల్ చూస్తూ తినడం కూడా మంచిది కాదు
ఒంటరిగా తినేటప్పుడు చాలామంది మొబైల్ ఫోన్ చూస్తూ లేదా టీవీ చూస్తూ భోజనం చేస్తుంటారు. ఇలా స్క్రీన్పై దృష్టి పెట్టి తినడం వల్ల మనం ఎంత ఆహారం తీసుకుంటున్నామో గుర్తించకపోవచ్చు. ఫలితంగా అవసరానికి మించి లేదా తక్కువగా తినే అవకాశం ఉంటుంది. అందుకే భోజనం చేసేటప్పుడు వీలైనంత వరకు మొబైల్ ఫోన్, టీవీ వంటి వాటికి దూరంగా ఉండటం మంచిది. ఆహారం రుచి, వాసన, పరిమాణంపై దృష్టి పెట్టి నెమ్మదిగా తినే అలవాటు చేసుకోవాలి.
వీలైనప్పుడు కలిసి భోజనం చేయండి
ఆఫీసులో పనిచేసేవారు వీలైతే రోజూ కాకపోయినా, రోజులో కనీసం ఒకసారైనా సహోద్యోగులతో కలిసి భోజనం చేయవచ్చు. ఇంట్లో ఉన్నప్పుడు కుటుంబ సభ్యులతో కలిసి భోజనం చేసే అలవాటు పెంచుకోవడం మంచిది. ఇలా చేయడం వల్ల కుటుంబ సభ్యుల మధ్య అనుబంధం మరింత పెరుగుతుంది. అయితే ఒంటరిగా భోజనం చేయాల్సి వచ్చినప్పుడు ఆందోళన చెందాల్సిన అవసరం లేదు. ముఖ్యంగా ఆ సమయంలో మొబైల్ లేదా టీవీకి బదులుగా ఆహారంపై దృష్టి పెట్టడం ముఖ్యం.
ప్రెషర్ కుక్కర్ విజిల్ వేస్తూ నీరు కారుతోందా? ఈ సింపుల్ చిట్కాలతో సమస్యకు చెక్