ఇంటర్‌నెట్ డెస్క్: ప్రముఖ తమిళ దర్శకుడు వెంకట్ ప్రభు తమిళనాడు ముఖ్యమంత్రి జోసెఫ్ విజయ్‌ని కలిశారు. ముఖ్యమంత్రికి అదిరిపోయే గిఫ్ట్ ఇచ్చారు. ఆ గిఫ్ట్‌ని చూడగానే విజయ్ ఎంతో సంతోషించారు.

అందరికీ ఆ గిఫ్ట్ సాధారణ కారు నంబర్ ప్లేట్‌లా కనిపించినా.. విజయ్‌కి మాత్రం స్పెషలే. ఆ నంబర్ ప్లేట్ వెనుక పెద్ద స్టోరీనే ఉంది. విజయ్, వెంకట్ ప్రభు కాంబినేషన్‌లో 'ది గ్రేటెస్ట్ ఆఫ్ ఆల్ టైమ్ (గోట్)' సినిమా తెరకెక్కింది. ఈ సినిమా 2024లో ప్రేక్షకుల ముందుకు వచ్చింది. విజయ్ ద్విపాత్రాభినయం చేసిన ఈ సినిమా మంచి విజయాన్ని అందుకుంది.

ఈ సినిమాలో హీరో విజయ్ వాడిన కారు నంబర్ ప్లేట్‌పై 'TN07 CM 2026' అని ఉంటుంది. విజయ్ సీఎం కావాలని బలంగా కోరుకుంటూ దర్శకుడు ఈ నంబర్ ప్లేట్‌ను సిద్ధం చేశారు. సీన్ కట్ చేస్తే విజయ్ నిజంగానే 2026 ఎన్నికల్లో భారీ విజయాన్ని అందుకుని తమిళనాడు ముఖ్యమంత్రి అయ్యారు. ఈ నేపథ్యంలోనే వెంకట్ ప్రభు ముఖ్యమంత్రి విజయ్‌కి ఆ నంబర్ ప్లేట్‌ను గిఫ్ట్‌గా ఇచ్చారు. నిన్న (సోమవారం) సాయంత్రం విజయ్‌ని కలిసి ఆ నంబర్ ప్లేట్‌ను గిఫ్ట్‌గా ఇచ్చారు. ఇందుకు సంబంధించిన ఫొటోలను తన ఎక్స్ ఖాతాలో షేర్ చేశారు.