అటుగా వెళ్తున్న ఓ కుటుంబం అత్యంత సాహసోపేతంగా ఆ యువకుడిని కాపాడేందుకు ముందుకొచ్చింది. తమ ప్రాణాలకు తెగించి మరీ అతడిని సురక్షితంగా ప్రమాదం నుంచి బయటపడేసింది. ఈ ఘటనకు సంబంధించిన వీడియో ఇప్పుడు నెట్టింట వైరల్ అయ్యింది.

భటియత్ జిల్లా భర్మాలా ప్రాంతంలో సోమవారం సాయంత్రం భారీ వర్షం కురిసింది. పెద్దఎత్తున కురిసిన వానకు వరదనీరు పోటెత్తింది. నిమిషాల వ్యవధిలోనే ఆ ప్రాంతమంతా పెద్ద ఏరులా మారిపోయింది. కకియారా-తునుహట్టి రహదారిపైకి కూడా వరదనీరు దూసుకొచ్చింది. ఇదే సమయంలో ఆ రహదారిపై ప్రయాణిస్తున్న మమ్లా గ్రామానికి చెందిన ఓ బైకర్ వరదనీటిలో చిక్కుకుపోయాడు. ప్రవాహం ఉధృతికి ద్విచక్రవాహనంతో సహా అతను కొంతదూరం కొట్టుకుపోయాడు. అనంతరం రోడ్డుపక్కన ఉన్న ఓ చెట్టును పట్టుకుని వరదనీటిలో కొట్టుకుపోకుండా బలంగా నిలబడిపోయాడు. అదే రహదారిపై ప్రయాణిస్తున్న ఓ కుటుంబం బైకర్‌ను కాపాడేందుకు ముందుకొచ్చింది.

కారులో ఉన్న ఓ యువకుడు, ఇద్దరు మహిళలు తమ ప్రాణాలు పణంగా పెట్టి మరీ ముందుకొచ్చారు. బైకర్ సమీపానికి తమ వాహనాన్ని తీసుకెళ్లి ఆపారు. అనంతరం కారు డోర్లు తెరిచిన యువకుడు వరదనీటిలో నిలుచోగా.. తమ చున్నీలను తాడుగా కట్టిన మహిళలు ఆ యువకుడి సాయంతో బైకర్ వైపుగా విసిరారు. చివరికి బాధితుడు తాడును పట్టుకోగా.. సురక్షితంగా అతడిని ఒడ్డుకు చేర్చారు. ఆ కుటుంబం సమయస్ఫూర్తి, ధైర్యం ఓ ప్రాణాన్ని నిలబెట్టడంతో ఈ ఘటనకు సంబంధించిన వీడియో సోషల్ మీడియాలో వైరల్‌గా మారింది. ఆపదలో ఉన్న అపరిచిత వ్యక్తిని కాపాడిన ఆ కుటుంబంపై నెటిజన్లు ప్రశంసల వర్షం కురిపిస్తున్నారు.