మెగాస్టార్ చిరంజీవి (Megastar Chiranjeevi)కి వయసు అనేది కేవలం ఒక నంబర్ మాత్రమే అని మరోసారి నిరూపిస్తున్నారు. ప్రతి రోజూ మన హద్దులను అధిగమించడానికి లభించే ఒక సరికొత్త అవకాశం అని నమ్మే చిరంజీవి, తన తదుపరి ప్రతిష్టాత్మక చిత్రం 'Mega158' కోసం ఎంతో ఉత్సాహంతో సన్నద్ధమవుతున్నారు.

దర్శకుడు బాబీ కొల్లి (కె.ఎస్. రవీంద్ర) దర్శకత్వంలో తెరకెక్కనున్న ఈ చిత్రం కోసం చిరంజీవి జిమ్‌లో తీవ్రంగా శ్రమిస్తున్నారు. తాజాగా విడుదల చేసిన వీడియోలో ఆయన సరికొత్త లుక్, బాడీ లాంగ్వేజ్, అంకితభావం చూస్తుంటే.. ఈ సినిమాతో అభిమానులకు మరో భారీ యాక్షన్ విందు ఖాయమనిపిస్తోంది.

ఈ వీడియోలో చిరంజీవి విభిన్న రకాల హెవీ వర్కవుట్స్ చేస్తూ కనిపించారు. 'సమయం ఆ మనిషిని పరీక్షించింది.. కానీ అతని ఆకలిని కాదు' అనే పవర్‌ఫుల్ క్యాప్షన్‌తో మెగాస్టార్ చూపిస్తున్న కసి, సినిమాపై అంచనాలను అమాంతం పెంచేస్తోంది. వెయిట్ లిఫ్టింగ్, లెగ్ ప్రెస్, చేతుల వ్యాయామాలు చేస్తూ పూర్తి ఫిట్‌నెస్‌తో ఆయన కనిపిస్తున్న తీరు, యువ హీరోలకు సైతం పోటీనిచ్చేలా ఉంది. వర్కవుట్ ముగిసిన తర్వాత కెమెరా వైపు చూస్తూ చిరంజీవి ఇచ్చిన పవర్‌ఫుల్ లుక్, యాక్షన్ గెట్-రెడీ సైన్ మెగా అభిమానుల్లో పూనకాలు తెప్పిస్తోంది. వీడియోలో మెగాస్టార్ చిరంజీవి మాట్లాడుతూ... ''గెట్టింగ్ రెడీ ఫర్ 158.. బాబీ.. మే 21 ముహూర్తం.. KVN ప్రొడక్షన్స్ వారిది..అంటే ఇంకో నాలుగైదు రోజుల్లో కలుస్తున్నాం. గెట్ రెడీ'' అంటూ ఫ్యాన్స్‌కు ట్రీట్ ఇచ్చేశారు.