నాలుగు టేకు చెట్లను రంపంతో కోసి,దుంగల తరలింపు..
రూ.ఒక లక్ష విలువ..
టేకు దుంగలను ఇతర ప్రాంతాలకు తరలించిన స్మగ్లర్లు
జన్నారం, ఆంధ్రప్రభ : కవ్వాల అడవుల్లో కలప స్మగ్లర్లు రంపంతో టేకు చెట్లను కోసి,దుంగలుగా తయారు చేసి ఇతర ప్రాంతాలకు తరలించగా,విషయం తెలుసుకున్న రాష్ట్ర అటవీశాఖ విజిలెన్స్ బృందం మంగళవారం మధ్యాహ్నం ఆ ప్రాంతానికి వచ్చి విచారించారు. ఆదిలాబాద్ ఉమ్మడి జిల్లాలోని కవ్వాల టైగర్ రిజర్వ్, జన్నారం అటవీ డివిజనల్, ఇందనపల్లి రేంజు, కవ్వాల ఫారెస్ట్ సెక్షనులోని బంగారుతాండ ఫారెస్ట్ బీటు అడవుల్లో నాలుగు టేకు చెట్లను రంపముతో స్మగ్లర్లు కోశారు. ఆ తర్వాత రంపంతో దుంగలు తయారు చేసి స్మగ్లర్లు ఇతర ప్రాంతాలకు తరలించి సొమ్ము చేసుకున్నారు.

ఈ వ్యవహారాన్ని రాష్ట్ర అటవీ శాఖ విజిలెన్స్ ఉన్నతాధికారులకు ఓ అపరిచితుడు ఫిర్యాదు చేయడంతో రాష్ట్ర అటవీశాఖ విజిలెన్స్ డీఎఫ్ఓ శివయ్య ఆదేశాల మేరకు హైదరాబాద్ నుంచి రాష్ట్ర అటవీ శాఖ విజిలెన్స్ ఫారెస్ట్ రేంజ్ ఆఫీసర్ మురళిమనోహర్ బృందం మంగళవారం అడవుల్లోకి వచ్చి విచారణ చేపట్టారు. ఈ సందర్భంగా ఆ విజిలెన్స్ రేంజర్ సాయంత్రం ఫోన్లో మాట్లాడుతూ.. అడవుల్లోకి వెళ్లి విచారణ జరిపిమన్నారు. నాలుగు దృఢమైన టేకు చెట్లను రంపంతో కోసి,దుంగలుగా తయారుచేసి ఇతర ప్రాంతాలకు తరలించినట్లు గుర్తించామని ఆయన తెలిపారు. ఆ ఘటన విచారణ నివేదికను ఉన్నతాధికారులకు సమర్పించనున్నట్లు ఆయన స్పష్టం చేశారు. ఆ టేకు కలప విలువ సుమారు రూ.ఒక లక్ష వరకు ఉంటుందని ఇందన పల్లి ఇన్చార్జి ఫారెస్ట్ రేంజ్ ఆఫీసర్ బాబా ఖాదర్ వలీ సాయంత్రం తెలిపారు. ఈ ఘటనపై స్థానిక ఎఫ్డీఓ రామ్మోహన్ ను సంప్రదించగా, బాధ్యులపై చర్యలు తీసుకుంటామన్నారు.