శ్రీవారి ఆలయంలో జూలై 14, 17న కీలక ఆగమశాస్త్ర కార్యక్రమాలు
తిరుమలలో కోయిల్ ఆళ్వార్ తిరుమంజనం, ఆణివార ఆస్థానం నిర్వహణ
ఆలయ పవిత్రత నేపథ్యంలో పలు ఆర్జిత సేవలు నిలిపివేత
భక్తులకు ముందస్తు సమాచారం ఇచ్చిన టీటీడీ

july5th Tirumala | ఆంధ్రప్రభ వెబ్‌డెస్క్ : తిరుమలలోని శ్రీవారి ఆలయంలో ఈ నెల 14వ తేదీన కోయిల్ ఆళ్వార్ తిరుమంజనం, 17వ తేదీన ఆణివార ఆస్థానం నిర్వహించనున్నట్లు తిరుమల తిరుపతి దేవస్థానం (టీటీడీ) అధికారికంగా ప్రకటించింది. ఈ పవిత్ర ఆగమశాస్త్ర కార్యక్రమాల నేపథ్యంలో ఆలయ శుద్ధి, ప్రత్యేక ఆచారాలు నిర్వహించనుండటంతో భక్తుల దర్శన విధానాల్లో తాత్కాలిక మార్పులు చోటుచేసుకున్నాయి.

టీటీడీ ప్రకటన ప్రకారం జూలై 14 మరియు 17 తేదీల్లో వీఐపీ బ్రేక్ దర్శనాలను పూర్తిగా రద్దు చేసినట్లు స్పష్టం చేసింది. అలాగే జూలై 17న నిర్వహించాల్సిన పలు ఆర్జిత సేవలను కూడా నిలిపివేశారు. ఆరోజు కల్యాణోత్సవం, ఆర్జిత బ్రహ్మోత్సవం, ఊంజల్ సేవ, సహస్ర దీపాలంకరణ సేవలను కూడా రద్దు చేసినట్లు టీటీడీ తెలిపింది. ఆలయ సంప్రదాయాలు, శాస్త్రోక్త నియమాల ప్రకారం ఈ నిర్ణయం తీసుకున్నట్లు అధికారులు పేర్కొన్నారు. ఈ నేపథ్యంలో భక్తులు తమ దర్శన ప్రణాళికలను ముందుగానే సవరించుకోవాలని టీటీడీ సూచించింది. పవిత్ర కార్యక్రమాల అనంతరం సాధారణ సేవలు యథావిధిగా కొనసాగుతాయని అధికారులు వెల్లడించారు.