Venezuela-Elections : ప్రజాస్వామ్యం దిశగా Andhra Prabha Top News

• ఎన్నికలు జరుపుతాం
• ప్రజాస్వామ్యం' దిశగా
• ప్రతిపక్షంతో చర్చలు ప్రారంభించాం
• ఐరాస వేదికగా డెల్సీ రోడ్రిగ్స్ హామీ

(న్యూయార్క్, ఆంధ్రప్రభ)

వెనెజువెలాలో ప్రజాస్వామ్య పునరుద్ధరణ దిశగా అడుగులు వేస్తున్నామని ఆ దేశ మధ్యంతర అధ్యక్షురాలు డెల్సీ రోడ్రిగ్స్‌ ప్రకటించారు. 'పూర్తిస్థాయి ప్రజాస్వామ్యం' సాధించే క్రమంలో ఎన్నికలు నిర్వహిస్తామని స్పష్టం చేశారు. అయితే, ఓటింగ్‌ ఎప్పుడు జరుగుతుందనే దానిపై మాత్రం ఎలాంటి గడువునూ వెల్లడించలేదు. ఐక్యరాజ్యసమితి సర్వసభ్య సమావేశంలో బుధవారం ప్రసంగించిన ఆమె.. దేశంలో ఎన్నికలు జరగడం ఖాయమని పునరుద్ఘాటించారు.

అమెరికా బలగాలు జనవరిలో అప్పటి అధ్యక్షుడు నికోలస్‌ మదురోను సైనిక దాడిలో అదుపులోకి తీసుకున్న అనంతరం రోడ్రిగ్స్‌ అధికార పగ్గాలు చేపట్టారు. ఈ పరిణామాల నేపథ్యంలో వెనెజువెలాలో రాజకీయ పరివర్తన, ప్రజాస్వామ్య పునరుద్ధరణపై అంతర్జాతీయంగా ఆసక్తి నెలకొంది. ఎన్నికల ప్రక్రియలో అన్ని రాజకీయ శక్తులకూ భాగస్వామ్యం కల్పిస్తామని, ఇందుకోసం ప్రతిపక్షంతో చర్చలు ప్రారంభించినట్లు రోడ్రిగ్స్‌ తెలిపారు. ఎన్నికల నిర్వహణకు అవసరమైన జాతీయ సంస్థలను సైతం సిద్ధం చేస్తున్నట్లు వెల్లడించారు.

దేశంలో ప్రజాస్వామ్య పరివర్తన ప్రక్రియ మొదలైందని, అది క్రమబద్ధంగా, సంస్థాగతంగా, ధ్రువీకరించదగిన రీతిలో సాగుతుందని ఆమె పేర్కొన్నారు. స్వేచ్ఛాయుత, సుసంపన్న, సమైక్య వెనెజువెలా నిర్మాణమే తమ లక్ష్యమని చెప్పారు.

ఎన్నికలపై హామీ

వెనెజువెలాలో ఎన్నికలు జరగాల్సిన అవసరాన్ని గతంలో అమెరికా, ఆ దేశ అధికారులు పలుమార్లు ప్రస్తావించారు. అయినప్పటికీ, ఇప్పటివరకు ఎన్నికల తేదీ ఖరారు కాలేదు. కనీసం తాత్కాలిక షెడ్యూల్‌ కూడా ప్రకటించలేదు. స్వతంత్ర సుప్రీంకోర్టు, జాతీయ ఎన్నికల మండలి ఏర్పాటు చేసిన తర్వాతే ఎన్నికలకు మార్గం సుగమమవుతుందని ప్రతిపక్షం భావిస్తోంది.

మరోవైపు, స్వేచ్ఛాయుత ఎన్నికల కోసం ఒత్తిడి చేయాల్సిన వాషింగ్టన్‌.. చమురు, పెట్టుబడుల ఒప్పందాలకే ప్రాధాన్యమిస్తూ ప్రతిపక్షాన్ని పక్కనపెట్టిందని విమర్శకులు ఆరోపిస్తున్నారు. రోడ్రిగ్స్‌ ప్రభుత్వంతో అర్థవంతమైన ప్రజాస్వామ్యపరమైన రాయితీలు సాధించడంలో ట్రంప్‌ యంత్రాంగం విఫలమైందని కొందరు అమెరికా చట్టసభ సభ్యులు సైతం విమర్శిస్తున్నారు. ఈ విమర్శల నడుమ ప్రతిపక్ష వర్గాలతో రాజకీయ చర్చలు ప్రారంభించామని రోడ్రిగ్స్‌ వెల్లడించారు. అన్ని పక్షాలకూ సమాన అవకాశాలు కల్పించే ప్రక్రియను ముందుకు తీసుకెళ్లడమే ఈ చర్చల లక్ష్యమని పేర్కొన్నారు.

చర్చలకు కొరినా మచాడో దూరం

వెనెజువెలా ప్రతిపక్షంలో కీలక నేత, నోబెల్‌ శాంతి బహుమతి గ్రహీత మరియా కొరినా మచాడో మాత్రం ఈ చర్చల్లో కనిపించకపోవడం గమనార్హం. 2024 అధ్యక్ష ఎన్నికల వివాదం తర్వాత ఎక్కువకాలం అజ్ఞాతంలో గడిపిన ఆమె.. నోబెల్‌ బహుమతి స్వీకరించేందుకు గత ఏడాది చివర్లో దేశం విడిచి వెళ్లారు. అప్పటి నుంచి తిరిగి వెనెజువెలాలో అడుగుపెట్టేందుకు ప్రయత్నిస్తున్నా అడ్డంకులు ఎదురవుతున్నాయని ఆమె బృందం, మీడియా వర్గాలు మంగళవారం వెల్లడించాయి.

జూన్‌లో సంభవించిన తీవ్ర ప్రభావం చూపిన జంట భూకంపాల అనంతర సహాయక చర్యల్లో భాగస్వామి అయ్యేందుకు స్వదేశానికి తిరిగి వస్తానని మచాడో ప్రకటించారు. అయితే, ఇది సరైన సమయం కాదని భావిస్తున్న అమెరికా అధికారుల వైఖరి ఆమె ప్రయత్నాలకు ఆటంకంగా మారినట్లు సమాచారం.

వెనెజువెలాకు తిరిగి రావడానికి మచాడో చేసిన ప్రయత్నాలను ఏడుసార్లు అడ్డుకున్నారని ఆమె రాజకీయ కమిటీ 'కమాండో కాన్‌ వెనెజువెలా' ఆరోపించింది. విమానాలను దారి మళ్లించడం, కోపా వంటి విమానయాన సంస్థలను బెదిరించడం, నౌకలను విధ్వంసం చేయడం, సమీప ద్వీప దేశాలపై ఒత్తిడి తెచ్చి విమానాల ల్యాండింగ్‌కు అనుమతించకుండా చేయడం వంటి చర్యలు చోటుచేసుకున్నాయని ఎక్స్‌ వేదికగా పేర్కొంది.

ట్రంప్‌తో రోడ్రిగ్స్‌ భేటీ

ఐరాస సర్వసభ్య సమావేశం సందర్భంగా మంగళవారం అమెరికా అధ్యక్షుడు డొనాల్డ్‌ ట్రంప్‌తో రోడ్రిగ్స్‌ కొద్దిసేపు సమావేశమయ్యారు. వెనెజువెలాతో చర్చలను పునఃప్రారంభించినందుకు ట్రంప్‌ను ఆమె అభినందించారు. ఈ భేటీలో దక్షిణ అమెరికా దేశానికి చెందిన బిలియన్ల డాలర్ల సార్వభౌమ రుణాల పునర్వ్యవస్థీకరణ అంశం చర్చకు వచ్చినట్లు అమెరికా విదేశాంగ మంత్రి మార్కో రూబియో వెల్లడించారు. అదే సమయంలో రాజకీయ మార్పుల దిశగా అడుగులు వేయాలని వాషింగ్టన్‌ ఒత్తిడి తెచ్చినట్లు తెలిపారు.

ఈ ప్రక్రియ విజయవంతం కావాలంటే చివరకు స్వేచ్ఛాయుత, నిష్పాక్షిక ఎన్నికలు జరగాల్సిందేనని అమెరికా స్పష్టం చేసినట్లు రూబియో పేర్కొన్నారు. ఎన్నికలకు ముందు వెనెజువెలా రాజకీయంగా స్థిరపడటంతో పాటు ఆర్థికంగా కోలుకోవాల్సిన అవసరం ఉందని అమెరికా భావిస్తోంది. దేశ పునర్నిర్మాణానికి ఇది సరైన సమయమని రోడ్రిగ్స్‌ పేర్కొన్నప్పటికీ.. ఆర్థిక వ్యవస్థ కోలుకోవడానికి కొంత సమయం పడుతుందని అంగీకరించారు.

ప్రజాస్వామ్యం వైపు!

అనిశ్చితి, సంఘర్షణల దశ నుంచి పూర్తిస్థాయి ప్రజాస్వామ్యం దిశగా వెనెజువెలా పయనిస్తోందని రోడ్రిగ్స్‌ పేర్కొన్నారు. ఈ ప్రజాస్వామ్య వ్యవస్థకు దేశ ప్రజలతో పాటు అంతర్జాతీయ సమాజం గుర్తింపు లభించేలా ముందుకు సాగుతామని తెలిపారు. దేశ పునర్నిర్మాణానికి, ప్రజాస్వామ్య పరివర్తనకు అంతర్జాతీయ సమాజం సహకరించాలని కోరారు. ఎన్నికలు నిర్వహిస్తామన్న మధ్యంతర అధ్యక్షురాలి ప్రకటన వెనెజువెలా రాజకీయాల్లో కీలక పరిణామమే అయినప్పటికీ.. తేదీ ఖరారు, స్వతంత్ర ఎన్నికల సంస్థల ఏర్పాటు, ప్రతిపక్ష నేతల భాగస్వామ్యం వంటి అంశాలపై స్పష్టత రావాల్సి ఉంది. ప్రకటనలు కార్యరూపం దాల్చి ప్రజాస్వామ్య పరివర్తన ఎంతవరకు ముందుకు సాగుతుందన్నది ఇప్పుడు ఆసక్తికరంగా మారింది.