కాంగ్రెస్‌ ప్రభుత్వం వెయ్యి రోజుల పాలనను పూర్తి చేసుకున్న సందర్భంగా మంగళవారం పెద్దపల్లి జిల్లా గోదావరిఖనిలో కాంగ్రెస్‌ శ్రేణులు భారీ ప్రదర్శన నిర్వహించారు. నగరంలో పార్టీ నాయకులు, కార్యకర్తలు పెద్ద ఎత్తున పాల్గొని సంబరాలు జరుపుకున్నారు. ఈ సందర్భంగా ఎమ్మెల్యే మక్కాన్‌సింగ్‌ రాజ్‌ఠాకూర్‌ మాట్లాడుతూ రామగుండం నియోజకవర్గంలో చేపట్టిన అభివృద్ధి పనుల వివరాలను వెల్లడించారు.

ముఖ్యమంత్రి రేవంత్‌రెడ్డి, ఉప ముఖ్యమంత్రి భట్టి విక్రమార్క, మంత్రి దుద్దిళ్ల శ్రీధర్‌బాబు సహకారంతో రామగుండం నియోజకవర్గంలో సుమారు రూ.900 కోట్ల నిధులతో వివిధ అభివృద్ధి పనులు చేపట్టినట్లు తెలిపారు. అన్ని రంగాల్లో నగరాన్ని అభివృద్ధి పథంలోకి తీసుకెళ్లడమే తన ప్రధాన లక్ష్యమని పేర్కొన్నారు. భారీ ప్రదర్శన సందర్భంగా మక్కాన్‌సింగ్‌ రాజ్‌ఠాకూర్‌కు అన్ని వర్గాల ప్రజలు, వివిధ సంఘాల ప్రతినిధులు, అభిమానులు అడుగడుగునా స్వాగతం పలికారు. కాంగ్రెస్‌ నాయకులు, కార్యకర్తలు పెద్ద సంఖ్యలో పాల్గొన్నారు.