ప్రజ్ఞాన్ ఓజా సెప్టెంబర్ 2025లో జరిగిన 94వ బీసీసీఐ వార్షిక సాధారణ సభ సమయంలోనే ఆర్పీ సింగ్‌తో కలిసి సెలెక్షన్ కమిటీలోకి అడుగుపెట్టాడు. కేవలం ఏడాది కాలంలోనే అతడు ప్యానెల్ ఛైర్మన్ స్థాయికి ఎదగడం విశేషం. ఓజా భారత్ తరఫున 24 టెస్టులు, 18 వన్డేలు, 6 టీ20ఐ మ్యాచ్‌లకు ప్రాతినిధ్యం వహించాడు. కమిటీలోని మిగతా సభ్యుల కంటే ఎక్కువ టెస్టుల అనుభవం ఉండటంతో ఓజాకు ఈ కీలక పదవి దక్కింది. రాబోయే కాలంలో టీమిండియా భవిష్యత్తు సవాళ్లను ఎదుర్కొనేందుకు వీలుగా జట్టును తీర్చిదిద్దే బాధ్యత ఇప్పుడు ఓజా నేతృత్వంలోని ప్యానెల్‌పై ఉంది.

ఇక నూతన సభ్యుడిగా చేరిన రమేష్ పవార్‌కూ అంతర్జాతీయ ఆటగాడిగా, కోచ్‌గా మంచి అనుభవం ఉంది. భారత్ తరఫున 2 టెస్టులు, 31 వన్డేలు ఆడిన పవార్, భారత మహిళల జట్టు హెడ్ కోచ్‌గా, ముంబై, గుజరాత్ జట్ల కోచ్‌గా బాధ్యతలు నిర్వర్తించాడు. పవార్ కోచింగ్‌లో భారత మహిళల జట్టు ఆసియా కప్ విజేతగా నిలవడమే కాకుండా కామన్వెల్త్ గేమ్స్‌లో రజత పతకం సాధించింది. అనుభవజ్ఞులైన ఓజా, పవార్‌ల రాకతో భారత క్రికెట్ సెలెక్షన్ కమిటీ మరింత పటిష్టంగా మారింది.