కానీ కట్ చేస్తే.. ఇప్పుడు ఆ లిస్ట్‌లో 15 ఏళ్ల పాల బుగ్గల చిన్నోడు టాప్ ప్లేస్‌లో ఉన్నాడు. బుమ్రా, రబాడా, కమిన్స్, హేజిల్‌వుడ్ లాంటి హేమాహేమీ బౌలర్లను ఊచకోత కోసిన వైభవ్.. ఈ సీజన్‌లో పరుగుల సునామీ సృష్టించాడు. తన బ్యాటింగ్ నైపుణ్యాలతో ప్రపంచ క్రికెట్‌ను అబ్బురపరిచాడు. సమస్త క్రికెట్ అభిమానుల దృష్టిని తనవైపు తిప్పుకున్నాడు.

తన అరంగేట్ర సీజన్ అయిన ఐపీఎల్ 2025లోనే వైభవ్ సత్తాచాటాడు. కానీ ఈ సీజన్‌లో మాత్రం అంతకుమించి రాణించాడు. క్రీజులోకి వచ్చిన మొదటి బంతి నుంచి బాదడం పనిగా పెట్టుకుని.. రికార్డులు కొల్లగొట్టాడు. 19 ఏళ్ల ఐపీఎల్ చరిత్రలో కనీవినీ ఎరుగని రికార్డులను సొంతం చేసుకున్నాడు. విరాట్ కోహ్లీ, రోహిత్ శర్మ లాంటి స్టార్ ప్లేయర్లకు సైతం దక్కని రికార్డులను 15 ఏళ్ల వయసులోనే సొంతం చేసుకున్నాడు. తన జట్టు టైటిల్ గెలవకపోయినా.. ఐపీఎల్ 2026లో హీరోగా మారిపోయాడు. ఈ సీజన్‌ పేరు చెబితేనే.. తన పేరు గుర్తొచ్చేలా చేశాడు.

వైభవ్‌కు వచ్చీ రాగానే బాదతాడనే పేరు ఉంది. కానీ క్వాలిఫయర్-2 మ్యాచులో తనలోని అసలైన క్రికెటర్‌ను అతడు బయటకు తీశాడు. ఎప్పుడూ ఫోర్లు, సిక్సర్లు బాదడమే కాదు.. పరిస్థితులకు తగ్గట్లు తనను తాను అన్వయించుకుని కూడా ఆడగలనని నిరూపించాడు. తాను చూపిన పరిణతితో బ్యాటర్‌గా మరో మెట్టు ఎక్కేశాడు. టోర్నీ ఆసాంతం తన బ్యాటింగ్ విన్యాసాలతో.. లీగ్‌కే ప్రత్యేక ఆకర్షణగా మారిపోయాడు. కోహ్లీ, ధోనీ, రోహిత్‌కు ఉన్నట్లుగా ప్రత్యేక ఫ్యాన్ బేస్‌ను ఏర్పాటు చేసుకున్నాడు. ఈ సీజన్‌లో అతడు అందించిన వినోదానికి ఐపీఎల్ అభిమానులు థ్యాంక్స్ చెబుతున్నారు. వచ్చే సీజన్‌లో టైటిల్ సాధించాలని ఆకాంక్షిస్తున్నారు.

ఈ సీజన్‌లో ఆడిన 16 మ్యాచులలో 766 పరుగులు చేశాడు వైభవ్. ఫైనల్‌లో గిల్, సుదర్శన్ హాఫ్ సెంచరీలు స్కోరు చేయకపోతే.. ఈ ఎడిషన్‌లో ఆరెంజ్ క్యాప్‌ను సైతం ఈ 15 ఏళ్ల కుర్రాడే సొంతం చేసుకుంటాడు.