Fatima Sana World Record: అంతర్జాతీయ మహిళల టీ20 క్రికెట్ చరిత్రలో సరికొత్త అధ్యాయం లిఖించబడింది. పాకిస్థాన్ మహిళల జట్టు కెప్టెన్ ఫాతిమా సనా తన విధ్వంసకర బ్యాటింగ్‌తో ప్రపంచ రికార్డులను తిరగరాశారు.

ఉమెన్స్ టీ20 ఇంటర్నేషనల్స్ లోనే అత్యంత వేగంగా అర్ధ శతకం (Fastest T20I Fifty) బాదిన ఘనతను ఆమె సొంతం చేసుకున్నారు. కరాచీ వేదికగా జింబాబ్వే ఉమెన్స్ టీమ్‌తో జరిగిన మూడో టీ20 మ్యాచ్‌లో ఫాతిమా కేవలం 15 బంతుల్లోనే ఈ చారిత్రాత్మక మైలురాయిని అందుకోవడం విశేషం.

Read Also:IPL 2026 Tickets Scam: SRH vs RCB మ్యాచ్ టికెట్ల పేరిట కొత్త సైబర్ దందా.. సీపీ సజ్జనార్ హెచ్చరిక!

మైదానంలో పరుగుల వర్షం.. బౌలర్లపై ఆకాశమే హద్దుగా దాడి

ఈ మ్యాచ్‌లో మొదట బ్యాటింగ్ చేసిన పాకిస్థాన్ జట్టు 17 ఓవర్లు ముగిసేసరికి 152 పరుగులకు 4 వికెట్లు కోల్పోయింది. ఈ దశలో క్రీజులోకి వచ్చిన కెప్టెన్ ఫాతిమా సనా రాకరాకతోనే జింబాబ్వే బౌలర్లపై విరుచుకుపడ్డారు. ముఖ్యంగా నోమ్వెలో సిబండా వేసిన 19వ ఓవర్‌లో ఫాతిమా వరుసగా 4, 4, 6, 6, 4 బాదడంతో ఆ ఒక్క ఓవర్‌లోనే 24 పరుగులు వచ్చాయి. దీనితో 14 బంతుల్లోనే 48 పరుగులకు చేరుకున్న ఆమె.. ఆఖరి ఓవర్ రెండో బంతికి రెండు పరుగులు తీసి తన రికార్డు హాఫ్ సెంచరీని పూర్తి చేసుకున్నారు. మొత్తంగా 19 బంతులు ఎదుర్కొన్న ఫాతిమా 10 ఫోర్లు, 2 సిక్సర్ల సాయంతో 62 పరుగులు చేసి అజేయంగా నిలిచారు. ఆమె మెరుపులతో పాక్ జట్టు నిర్ణీత 20 ఓవర్లలో 4 వికెట్లకు 223 పరుగుల భారీ స్కోరు సాధించింది.

Fatima Sana World Record: రిచా ఘోష్, సోఫీ డెవిన్ రికార్డులు బద్దలు

ఇంతకుముందు అంతర్జాతీయ మహిళల క్రికెట్‌లో 18 బంతుల్లో హాఫ్ సెంచరీ సాధించిన సోఫీ డెవిన్ (న్యూజిలాండ్), ఫోబీ లిచ్‌ఫీల్డ్ (ఆస్ట్రేలియా), భారత్‌కు చెందిన రిచా ఘోష్‌ల పేరిట ఉన్న రికార్డును ఫాతిమా సనా అధిగమించారు. అలాగే గతంలో పాక్ తరఫున 20 బంతుల్లో ఫిఫ్టీ కొట్టిన సీనియర్ ప్లేయర్ నిదా దార్ రికార్డును కూడా ఆమె బద్దలు కొట్టారు. ప్రస్తుతం అద్భుతమైన ఫామ్‌లో ఉన్న ఫాతిమా సనా, ఈ ఏడాది ఆడిన 5 టీ20 ఇన్నింగ్స్‌లలో 206.30 స్ట్రైక్ రేట్‌తో 229 పరుగులు చేసి పాక్ ఉమెన్స్ జట్టులో టాప్ స్కోరర్‌గా కొనసాగుతున్నారు.