ఆరు నెలలకే తొలగింపు.. కోల్‌కతాలో మెస్సీ విగ్రహం తొలగింపు

Lionel Messi Statue : ఫుట్‌బాల్ దిగ్గజం లియోనెల్ మెస్సీకి గౌరవ సూచకంగా కోల్‌కతాలో ఏర్పాటు చేసిన 70 అడుగుల భారీ విగ్రహాన్ని అధికారులు తొలగిస్తున్నారు.

కేవలం ఆరు నెలల క్రితం ఘనంగా ఆవిష్కరించిన ఈ విగ్రహం ఇప్పుడు భద్రతా కారణాల వల్ల వార్తల్లో నిలిచింది. సోమవారం ఉదయం నుంచి లేక్ టౌన్ ప్రాంతంలో భారీ క్రేన్ల సహాయంతో విగ్రహాన్ని తొలగించే ప్రక్రియ ప్రారంభమైంది.

నిర్మాణ లోపాలు వెలుగులోకి

ఇటీవల బలమైన గాలులు వీచిన సమయంలో ఈ విగ్రహం ప్రమాదకరంగా ఊగినట్లు స్థానికులు ఫిర్యాదు చేశారు. దీంతో అధికారులు సాంకేతిక తనిఖీలు నిర్వహించారు. పరిశీలనలో విగ్రహం పునాది నిర్మాణంలో లోపాలు ఉన్నట్లు, ఫిట్టింగులు సరిగా అమర్చలేదని ఇంజనీర్లు గుర్తించారు. రుతుపవనాల కాలం సమీపిస్తున్న నేపథ్యంలో ఇది ప్రజల భద్రతకు ముప్పుగా మారవచ్చని హెచ్చరించడంతో వెంటనే తొలగింపు నిర్ణయం తీసుకున్నారు.

అభిమానుల్లో నిరాశ

అర్జెంటీనా 2022 ప్రపంచకప్ విజయం సందర్భంగా మెస్సీకి నివాళిగా ఈ విగ్రహాన్ని నిర్మించారు. 2025 డిసెంబర్‌లో (Lionel Messi Statue) జరిగిన ప్రత్యేక కార్యక్రమంలో మెస్సీ వర్చువల్‌గా దీనిని ఆవిష్కరించినట్లు అప్పట్లో ప్రచారం జరిగింది. కోల్‌కతాలో ఫుట్‌బాల్‌కు ఉన్న ప్రత్యేక ఆదరణకు ఈ విగ్రహం ప్రతీకగా నిలుస్తుందని అభిమానులు భావించారు. అయితే ఆవిష్కరించిన కొద్ది నెలల్లోనే విగ్రహాన్ని తొలగించాల్సి రావడం చర్చనీయాంశంగా మారింది. నిర్మాణ నాణ్యతపై ప్రశ్నలు తలెత్తుతున్నాయి. విగ్రహాన్ని పూర్తిగా తొలగించడం కాకుండా ఎకో పార్క్ వంటి మరింత సురక్షిత ప్రాంతానికి తరలించే అవకాశాలను అధికారులు పరిశీలిస్తున్నట్లు సమాచారం. అయితే దీనిపై ఇంకా అధికారిక నిర్ణయం వెలువడలేదు.