ఈ విడతలో ఎకరానికి రూ. 6,000 చొప్పున లబ్ధిదారుల బ్యాంక్ అకౌంట్లలోకి నగదు బదిలీ అయింది. మిగిలిన రైతులకు కూడా అతి త్వరలోనే ఈ సాయం అందనుందని ప్రభుత్వ వర్గాలు వెల్లడించాయి.

రూ. 7,135 కోట్లు విడుదల.. ఐదో విడత పూర్తి

రాష్ట్ర ప్రభుత్వం ఐదో విడత కింద ఈ పెట్టుబడి నిధులను విడుదల చేసింది. ఇందులో భాగంగా దాదాపు 1.69 లక్షల మంది అర్హులైన రైతుల ఖాతాల్లోకి మొత్తం రూ. 7,135 కోట్ల నిధులు చేరాయి. జూన్ 30 నుంచి విడతల వారీగా సాగుతున్న ఈ ప్రక్రియలో.. మొదటి రోజు రెండు ఎకరాల లోపు ఉన్నవారికి, ఆ తర్వాత వరుసగా మూడు, నాలుగు ఎకరాల భూమి ఉన్నవారికి నగదు జమ చేశారు. ఇక నిన్న శుక్రవారం ఐదు ఎకరాల వరకు ఉన్నవారికి అందించగా, నేడు ఆరు ఎకరాల పరిమితి ఉన్న రైతులకు నిధులు కేటాయించారు.

Rythu Bharosa: వర్షాల వేళ రైతుల్లో హర్షాతిరేకాలు

రాష్ట్రంలో ఇప్పుడిప్పుడే వానాకాలం వర్షాలు మొదలవుతుండటంతో రైతన్నలు సాగు పనులకు సమాయత్తమవుతున్నారు. ఈ కీలక సమయంలో ప్రభుత్వం అందిస్తున్న ఆర్థిక సాయం పంట పెట్టుబడులకు ఎంతో ఆసరాగా నిలుస్తోందని సాగుదారులు ఆనందం వ్యక్తం చేస్తున్నారు. రైతులపై ఆర్థిక భారాన్ని తగ్గించడమే ధ్యేయంగా ఈ పథకాన్ని అమలు చేస్తున్న ప్రభుత్వం, రానున్న తొమ్మిది రోజుల్లో రాష్ట్రవ్యాప్తంగా ఉన్న అర్హులందరికీ ప్రక్రియను పూర్తి చేయాలని లక్ష్యంగా పెట్టుకుంది. ఈ పథకం ద్వారా మొత్తం 73 లక్షల మంది రైతులకు రూ. 9,000 కోట్లు అందించేందుకు సర్కారు సిద్ధమైంది.

ఇంకా డబ్బులు రాకపోతే ఏం చేయాలి?

ఒకవేళ అర్హత ఉండి కూడా ఇప్పటివరకు రైతు భరోసా నిధులు అందని వారు ముందుగా తమ బ్యాంక్ ఖాతా వివరాలను సరిచూసుకోవాలి. ముఖ్యంగా ఈ-కేవైసీ (e-KYC) ప్రక్రియ పూర్తయిందా, అలాగే బ్యాంక్ అకౌంట్‌తో ఆధార్ లింక్ అయి ఉందా లేదా అనేది బ్యాంక్‌కు వెళ్లి నిర్ధారించుకోవాలి. ఒకవేళ సాంకేతిక వివరాలన్నీ సరిగ్గా ఉన్నా డబ్బులు రాకుంటే, వెంటనే మీ పరిధిలోని మండల వ్యవసాయ విస్తరణ అధికారిని (AEO) సంప్రదించి సమస్యను పరిష్కరించుకోవచ్చు.

జూలై 10వ తేదీ నాటికి అర్హులైన రైతులందరి ఖాతాల్లో నగదు జమ చేయాలని ప్రభుత్వం భావిస్తోంది కాబట్టి అవాంతరాలు ఉన్నవారు వెంటనే సరిచేసుకోవడం ఉత్తమం. అలాగే, జూన్ 15 లోపు కొత్తగా పట్టాదారు పాసుపుస్తకాలు పొందిన రైతులు జూలై 5వ తేదీ లోపు తమ దరఖాస్తులను అవసరమైన పత్రాలతో సహా స్థానిక ఏఈఓ కార్యాలయంలో సమర్పించాల్సి ఉంటుంది.

Epaper: epaper.vaartha.com

సదాశివపేట12వ వార్డు అభివృద్ధికి ప్రత్యేక నిధులు